కాంటాలు కాక.. తంటాలు

నల్లగొండ జిల్లాలోని పలు ధాన్యం కొనుగోలు కేంద్రాల్లో రైతులకు పడిగాపులు తప్పడంలేదు. గత నెల రెండు, మూడో వా రంలో ధాన్యం తెచ్చిన రైతులు సైతం నేటికి కాంటాల కోసం ఎదురు చూస్తూనే ఉన్నారు. కేసీఆర్‌ హయాంలో సజావుగా సాగిన కొనుగోళ్ల ప్రక్రియ కాంగ్రెస్‌ సర్కార్‌ హయాంలో మాత్రం ఆగుతూ... సాగుతూ ఉంది.

• నెల రోజులకు పైగా కాంటాల కోసం రైతులు పడిగాపులు
• మరో పక్షం రోజులకు పైగా తప్పని ఎదురుచూపులు
• లారీల కొరతే ప్రధాన సమస్య
• పలుచోట్ల హమాలీలు, గన్నీ బ్యాగుల కొరత
• మిల్లర్ల వద్ద కొనసాగుతున్న తరుగు దోపిడీ
• జి.యడవెల్లిలో తరుగుపై కలెక్టర్‌కు కంచర్ల ఫిర్యాదు
• కాంటా అయిన ధాన్యం 5.91లక్షల మెట్రిక్‌ టన్నులు
• ట్రక్‌ షీట్‌ పెండింగ్‌లో ఉన్నది 2.78లక్షలు
• కాంటా కావాల్సిన ధాన్యం 1.09 లక్షల మెట్రిక్‌ టన్నులు

నల్లగొండ ప్రతినిధి, మే20 (నమస్తే తెలంగాణ): నల్లగొండ జిల్లాలోని పలు ధాన్యం కొనుగోలు కేంద్రాల్లో రైతులకు పడిగాపులు తప్పడంలేదు. గత నెల రెండు, మూడో వా రంలో ధాన్యం తెచ్చిన రైతులు సైతం నేటికి కాంటాల కోసం ఎదురు చూస్తూనే ఉన్నారు. కేసీఆర్‌ హయాంలో సజావుగా సాగిన కొనుగోళ్ల ప్రక్రియ కాంగ్రెస్‌ సర్కార్‌ హయాంలో మాత్రం ఆగుతూ… సాగుతూ ఉంది. ఈ విషయమై క్షేత్రస్థాయి కేంద్రాల్లో ఏ రైతును కదిలించినా ప్రభుత్వ తీరుపై మండిపడుతున్నారు. కొన్ని కేంద్రాల్లో ఒక్కో రైతు నెల రోజులకు పైగానే కాంటాల కోసం ఎదురుచూస్తున్నారు.

కొనుగోళ్లల్లో కీలకమైన మిల్లర్ల తీరు, లారీల సరఫరా, హామాలీల కొరత, గన్నీ బ్యాగుల సేకరణపై పర్యవేక్షణ కొరవడిందని క్షేత్రస్థాయి పరిస్థితులు స్పష్టం చేస్తున్నాయి. జిల్లాలో ఏప్రిల్‌ 5వ తేదీ నుంచి ధాన్యం కొనుగోళ్లకు శ్రీకారం చుట్టగా మరో పక్షం రోజులకు పైగా సమయం పట్టేట్లు ఉంది. అధికారిక లెక్కల ప్రకారం ఇప్పటివరకు జిల్లాలోని 410 కేంద్రాలకు గాను 7,01,249 మెట్రిక్‌ టన్నుల ధాన్యం కొనుగోళ్ల కోసం వచ్చింది. అయితే బుధవారం నాటికి 5.91లక్షల మెట్రిక్‌ టన్నుల ధాన్యం కాంటా అయినట్లు అధికారులు వెల్లడించారు. అయితే గత నాలుగైదు రోజులుగా రోజూ సగటున 20వేల మెట్రిక్‌ టన్నుల ధాన్యం కాంటా అవుతున్నట్లు చెప్తున్నారు.

అయితే ఇందులో కేంద్రాల్లో కాంటా అయ్యాక కూడా ట్యాబ్‌ ఎంట్రీ, ట్రక్‌ షీట్‌ జారీ, మిల్లర్లు ఓకే చెప్పడంలో తీవ్ర జాప్యం జరుగుతున్నట్లు స్పష్టం అవుతోంది. కాంటా అయ్యాక చాలా చోట్ల లారీలు, హామాలీలు, మిల్లుల్లో దిగుమతికి స్థలం కొరతతో ధాన్యం తరలింపులో కాలాయాపన జరుగుతోంది. అందువల్ల కాంటా అయిన లెక్కలకు, ట్రక్‌షీట్‌ జారీ లెక్కకు మధ్య భారీ వ్యత్యాసం ఉంది. కాంటా అయిన ధాన్యంలో 4.56 లక్షల మెట్రిక్‌ టన్నుల ధాన్యమే ట్యాబ్‌ ఎంట్రీ కాగా అందులోనూ 4.39 లక్షల టన్నులకు ట్రక్‌ షీట్‌ జనరేటైంది.

ఇందులోనూ రైసు మిల్లర్లు తమ మిల్లుల్లో దిగుమతి అయ్యాక ఒకే చెప్పిన ధాన్యం 4.23లక్షల మెట్రిక్‌ టన్నులు. అంటే కాంటా అయిన ధాన్యంలోనూ ఇంకా 2.78లక్షల టన్నుల ధాన్యానికి అధికారిక గుర్తింపు రావాల్సి ఉంది. అలా వస్తేనే రైతులకు ధాన్యం డబ్బులు చెల్లించేందుకు వీలవుతుంది. రూ.1413.57 కోట్ల విలువైన ధాన్యం కాంటా కాగా ఇప్పటివరకు రూ.1010.67 కోట్లు చెల్లించినట్లు అధికారిక లెక్కలు వెల్లడిస్తున్నాయి. ఇంకా కాంటా పూర్తయిన 16వేల మంది రైతులకు సంబంధించిన రూ.403 కోట్ల విలువైన ధాన్యానికి చెల్లింపులు చేయాల్సి ఉంది.

కొనసాగుతున్న తరుగు కోతలు
జిల్లాలో తాలు, తరుగు పేరుతో ఆది నుంచి మొదలైన కోతలు కొనసాగుతూనే ఉన్నాయి. కేంద్రాల్లో క్వింటాల్‌కు నాలుగైదు కిలోలు, మిల్లుల వద్ద మరో మూడు నాలుగు కిలోల చొప్పున కోతలు పెడుతున్నారు. దీంతో రైతులు క్వింటాల్‌ ధాన్యంపై 8 నుంచి 10 కిలోల వరకు నష్టపోతున్నారు. దీనికి ఒప్పుకుంటేనే చాలాచోట్ల ధాన్యం కాంటాలు వేయడంతో పాటు మిల్లుల్లో దిగుమతి చేస్తున్నారు. లేకుంటే రైతులు అలాగే నిరీక్షించాల్సి వస్తోంది. తాజాగా కనగల్‌ మండలం జి.యడవెల్లిలో గత నెల 15న ముగ్గురు రైతులకు చెందిన ధాన్యాన్ని కేంద్రంలో తూకం వేసి 713 బస్తాల్లో 285.20 క్వింటాళ్ల ధాన్యం మిల్లుకు పంపించారు.

అయితే అదే ధాన్యం మిల్లులో దిగుమతి అయ్యాక ట్రక్‌ షీట్‌లో తరుగు పేరుతో కోత విధించి మరో లెక్క రాశారు. 691 బస్తాలే వచ్చినట్లుగా వాటిల్లో 276.40 క్వింటాళ్ల ధాన్యమే దిగుమతి చేసుకున్నట్లుగా ట్రక్‌షీట్‌లో ఫైనల్‌గా నమోదు చేశారు. అంటే ఈ ఒక్క లోడ్‌ లారీలోనే 19 బస్తాల ధాన్యం మాయం కాగా 8.80 క్వింటాళ్ల ధాన్యానికి కోత విధించారు. దాదాపు రూ.21వేలు రైతులు నష్టపోయారు. దీనిపై ఆధారాలతో సహా నల్లగొండ మాజీ ఎమ్మెల్యే కంచర్ల భూపాల్‌రెడ్డి కలెక్టర్‌ చంద్రశేఖర్‌కు ఫిర్యాదు చేశారు. రైతులు నష్టపోయిన ధాన్యం డబ్బులు ఇప్పించాలని ఈ సందర్భంగా డిమాండ్‌ చేశారు. ఇలాగే దాదాపు అన్ని చోట్ల కోతలు విధిస్తూ రైతుల కష్టాన్ని దోచుకుంటున్నారన్న ఆరోపణలు వెల్లువెత్తుతున్నాయి.

క్షేత్రస్థాయిలో పరిస్థితులు ఇలా..
క్షేత్రస్థాయిలో జిల్లాలో ధాన్యం కొనుగోలు కేంద్రాల్లో నెలకొన్న తాజా పరిస్థితులను బుధవారం నమస్తే తెలంగాణ బృందం పరిశీలించింది. కేంద్రాల వారీగా వచ్చిన ధాన్యం… కాంటా అయిన ధాన్యం… ఎన్ని రోజుల నుంచి రైతులు పడిగాపులు పడుతున్నారు… ప్రధాన సమస్యలు ఏమిటనే అంశాలపై రైతులను, కేంద్ర నిర్వాహకులను కదలించగా పలు విషయాలు వెలుగులోకి వచ్చాయి. లారీల కొరత, హమాలీల సమస్య, గన్నీ బ్యాగుల కొరత, మిల్లుల్లో దిగుమతి కోసం ఎదురు చూపుల వంటి సమస్యలు ఎక్కువగా కనిపించాయి.

• నల్లగొండ మండలం దండంపల్లి కేంద్రంలో 330 మంది రైతులు ధాన్యం తెస్తే 235 మంది ధాన్యమే కాంటా అయ్యింది. ఇంకా 9వేల క్వింటాళ్ల ధాన్యం కాంటా కావాల్సి ఉంది. ఇక్కడ లారీల రాకపోవడంతో పాటు గన్నీ బ్యాగుల సమస్య తీవ్రంగా ఉంది.
• తిప్పర్తి మండలంలో 6 పీఏసీఎస్‌ కేంద్రాల్లో కొనుగోళ్లు జరుగుతుండగా 430 లారీలు కాంటా కాగా మరో 120 లారీల ధాన్యం కాంటా కోసం 15 రోజులకు పైగా ఎదురుచూస్తోంది. ఇక్కడ లారీల కొరతనే ప్రధాన సమస్య.
• కనగల్‌ మండలంలో ఇటీవల మంత్రులు సందర్శించిన చెట్లచెన్నారం పీఏసీఎస్‌ కేంద్రంలో ఇంకా 4500 క్వింటాళ్ల కాంటాకు సిద్ధంగా ఉంది. నెల రోజులుగా రైతులు ఎదురుచూస్తున్నారు. మరో వారం రోజులు పట్టవచ్చని అంచనా.
• చండూరు మండలం అంగడిపేటలో 3వేలు, కొండాపురంలో 4వేలు, పుల్లెంలలో 4500 క్వింటాళ్ల ధాన్యం కాంటాల కోసం ఎదురుచూస్తోంది. లారీల కొరతే ప్రధాన సమస్య.
• నార్కట్‌పల్లి మండలం నక్కలపల్లి ఐకేపీ కేంద్రంలో 258 మంది రైతులు ధాన్యం తెస్తే 125 మంది రైతుల ధాన్యమే కాంటా అయ్యింది. ఇంకా ఇక్కడ 42 లారీల ధాన్యం కాంటా వేయాల్సి ఉంది. నెల రోజులుగా రైతులు ఎదురు చూస్తున్నారు. లారీల సమస్యలతో పాటు హమాలీల కొరత ఇక్కడ ప్రధానంగా ఉంది.
• శాలిగౌరారం మండలం చిత్తలూరులో పెద్ద ఎత్తున ధాన్యం నిల్వలు ఉన్నాయి. ఇక్కడ లారీల కొరతతో కాంటా కావడం లేదని రైతులు చెప్తున్నారు.
• కట్టంగూరు మండలం ఈదులూరు ఐకేపీ కేంద్రంలో 215 మంది రైతులకు గానూ 75 మంది రైతులకు చెందిన 20 లారీల ధాన్యం కాంటా కోసం సిద్ధంగా ఉన్నది. ప్రారంభంలో ఇక్కడ లారీల కొరత తీవ్రంగా ఉండగా, ప్రస్తుతం గన్నీ బ్యాగుల కొరత ఉంది. దీంతో ఐదు రోజులుగా కాంటా కావడం లేదు.
• కేతేపల్లి మండలం భీమారం ఐకేపీలో 215 మంది రైతులు ధాన్యం తీసుకొస్తే కేవలం 95 మంది ధాన్యమే కాంటా అయ్యింది. మిగతా రైతులంతా నెల రోజులుగా కాంటాల కోసం ఎదురుచూస్తున్నారు. ఇక్కడ ఇంకా 20 లారీల ధాన్యం కాంటా వేయాల్సి ఉంది.
• నిడమనూరు మండలం ఊట్కూరు ఐకేపీ కేంద్రంలో 15 రోజుల నుంచి 5వేల క్వింటాళ్ల ధాన్యం కాంటా కోసం ఎదురు చూస్తోంది. మిల్లుల వద్ద దిగుమతి ఆలస్యం కావడంతో పాటు తరుగు పేరుతోనూ వేధిస్తున్నారు.
• చందంపేట మండలం చిత్రియాల సొసైటీ పరిధిలోని పోలేపల్లిలో 220 మంది రైతులకు చెందిన 10వేల క్వింటాళ్ల ధాన్యం కాంటా కావాల్సి ఉంది. లారీలు రాక కాంటాలు కావడం లేదని రైతులు చెప్తున్నారు.
• నేరడుగొమ్మ మండలం తిమ్మాపూర్‌ సొసైటీ పరిధిలోని 140 మంది రైతులకు చెందిన 5వేల క్వింటాళ్ల ధాన్యం 15 రోజులుగా కాంటాలకు నోచుకోలేదు. ఇక్కడా మిల్లుల్లో ధాన్యం దిగుబడికి స్థలం లేదన్న సాకుతో లారీలను పంపడం లేదు.
• గుడిపల్లి మండలంలో నాలుగు కేంద్రాలు ఉండగా గణపురం కేంద్రంలో 329, కొదండపురంలో 126, గుడిపల్లిలో 106, కేశంనేనిపల్లిలో 73 కుప్పులు కాంటాకు సిద్ధంగా ఉన్నాయి. లారీలు రాకనే ఇక్కడ కాంటాలు కావడం లేదని రైతుల ఆరోపణ.
• పీఏ పల్లి మండల కేంద్రంలోని పీఏసీఎస్‌ కేంద్రంలో ఇంకా 35 లారీల లోడ్లకు సంబంధించిన 12వేల క్వింటాళ్ల ధాన్యం కాంటాకు సిద్ధంగా ఉంది. 160 మంది రైతులు 20 రోజులకు పై నుంచి కాంటా కోసం ఎదురు చూస్తున్నారు. అంగడిపేట కొనుగోలు కేంద్రంలో 25 వేల క్వింటాళ్ల ధాన్యం ఇప్పటివరకు కాంటా కాగా మరో 18వేల క్వింటాళ్ల ధాన్యం కాంటా కావాల్సి ఉంది. అంటే 55 లారీల ధాన్యం కాంటాల కోసం ఎదరుచూస్తోంది.