వానలకు పంటలు పైలం

వారం నుంచి విస్తృతంగా వర్షాలు కురుస్తున్నాయి. ఈ వానలతో మెట్టపంటల్లో సమస్యలు తలెత్తే అవకాశం ఉంది. ఈ సమయంలో రైతులు తగిన జాగ్రత్తలు పాటిస్తే పంటలను సాధారణ స్థాయికి తీసుకురావచ్చని వ్యవసాయ శాఖ అధికారులు సూచిస్తున్నారు.

అధిక వర్షాలతో మెట్ట పంటలకు నష్టం
చేలల్లో నీరు నిల్వ ఉండకుండా చూసుకోవాలి
చీడపీడల నివారణకు చర్యలు తప్పనిసరి

తిరుమలగిరి, జూలై 13 : వారం నుంచి విస్తృతంగా వర్షాలు కురుస్తున్నాయి. ఈ వానలతో మెట్టపంటల్లో సమస్యలు తలెత్తే అవకాశం ఉంది. ఈ సమయంలో రైతులు తగిన జాగ్రత్తలు పాటిస్తే పంటలను సాధారణ స్థాయికి తీసుకురావచ్చని వ్యవసాయ శాఖ అధికారులు సూచిస్తున్నారు.

 

పత్తి పంటలో తీసుకోవాల్సిన జాగ్రత్తలు

• పత్తి పంట ప్రస్తుతం 5-6 ఆకుల దశలో ఉంది. అధిక వర్షాల వల్ల చేనులో తేమ, నీరు నిల్వ ఉంటుంది. సాధ్యమైనంత త్వరగా నీరు నిల్వకుండా కాల్వలు ఏర్పాటు చేసి బయటకు పంపాలి.
• వర్షాలకు ఆకులు లేతాకు పచ్చ రంగుకు మారితే మొక్క వయసును బట్టి లీటరు నీటికి 10-20 గ్రాముల యూరియా లేదా 10గ్రాముల పొటాషియం నైట్రేట్‌ 5 రోజుల వ్యవధిలో రెండుసార్లు పైరుకు పిచికారీ చేయాలి.
• వర్షాల తర్వాత బ్యాక్టీరియా ఆకుమచ్చ తెగులు ఆశించే ప్రమాదం ఉంటుంది. దీని నివారణకు కాపర్‌ ఆక్సీక్లోరైడ్‌ 30 గ్రా + ఒక గ్రా స్ట్రెప్టోసైక్లిన్‌ 10 లీటర్ల నీటికి కలిపి వారం వ్యవధిలో రెండు సార్లు మొక్కలపై పిచికారీ చేయాలి.
• నేలలో అధిక తేమ ఉన్నప్పుడు వేరుకుళ్లు/ఎండు తెగులు ఆశించే ప్రమాదం ఉంది. దీని నివారణకు కాపర్‌ ఆక్సీక్లోరైడ్‌ 3 గ్రా లేదా 2 గ్రా కార్బండిజిమ్‌ లీటరు నీటికి కలిపి తెగులు సోకిన మొక్కల మొదళ్లను తడపాలి.
• రసం పీల్చే పచ్చదోమ, పేనుబంక, తెల్లదోమ, తామరపురుగులు పత్తి పంటను ఆశించే ప్రమాదం ఉంది. పత్తి మొక్కలు 30 నుంచి 45 రోజుల దశలో మోనోక్రొటోఫాస్‌, నీరు 1.4 నిష్పత్తిలో, ఇమిడాక్లోప్రిడ్‌, నీరు 1.10 నిప్పత్తిలో కలిపి పిచికారీ
  చేయాలి.

పెసర పంటలో..

• పెసర ప్రస్తుతం 3-4 ఆకుల దశలో ఉంది. చేలలో ఉన్న నీటిని కాల్వల ద్వారా సాధ్యమైనంత త్వరగా బయటకు పంపాలి. నేలలో అధిక తేమ ఉండే పరిస్థితుల్లో వేర్ల నుంచి లభించే పోషకాల లభ్యత తక్కువగా ఉంటుంది. పొటాషియం నైట్రేట్‌ 10 గ్రాములు లీటరు నీటికి కలిపి మొక్కలపై పిచికారీ చేస్తే పంటను సాధారణ స్థాయికి తీసుకురావచ్చు.
• ప్రస్తుత వాతావరణంలో పొగాకు లద్దెపురుగు పెరిగే ప్రమాదం ఉంది. దీని నివారణకు నోవాల్యూరాన్‌ మిల్లీలీటర్‌ లేదా థయోడికార్స్‌ ఒక గ్రాము లీటరు నీటికి కలిపి పిచికారీ చేయాలి.
• n ప్రస్తుతం మొగ్గ, పూత, పిందె దశలో ఉన్న పెసరలో మరూకా మచ్చల పురుగు ఆశించే ప్రమాదం ఉంది. నివారణకు థయోడికార్‌ ఒక గ్రాము లేదా స్పైనోసాడ్‌ 0.3 మిల్లీలీటర్‌ లేదా వ్లూబెండమైడ్‌ 0.2 మి.లీ లేదా 0.3 మి.లీ క్లోరాంత్ర నిలిప్రోల్‌ లీటరు నీటికి కలిపి పిచికారీ చేయాలి.

మొక్కజొన్నలో..

• ప్రస్తుతం మొక్కజొన్న 20 రోజుల నుంచి కండె గట్టిపడే దశలో ఉంది. మొక్కజొన్న అధిక తేమను తట్టుకోదు. సాధ్యమైనంత వరకు త్వరగా నీటిని తీసివేసి అంతర కృషి చేయడం ద్వారా తేమను తగ్గించవచ్చు.
• మొక్కజొన్నకు ఎకరాకు 25 కిలోల నత్రజని, 10 కిలోల పొటాష్‌లనిచ్చే ఎరువులు వేయాలి. ప్రస్తుతం మోకాళ్ల ఎత్తు దశలో ఉన్న మొక్కజొన్నలో కాండం తొలిచే పురుగు ఆశించే అవకాశం ఉంది. నివారణకు కార్బోప్యూరాన్‌ 3జీ గుళికలు సుడుల్లో వేయాలి. మొక్కజొన్న వేసిన ప్రాంతాల్లో కత్తెర పురుగును గమనిస్తే నివారణకు స్పైనోసాడ్‌ 0.3 మిల్లీటర్‌ లేదా ఇమామెక్టిన్‌ బెంబోయేట్‌ 0.4 గ్రా లేదా క్లోరాంత్రనిలిప్రోల్‌ 0.3 మి.లీ లేదా స్పైనోటోరామ్‌ 0.5 మి.లీ లీటరు నీటికి కలిపి మొక్కల సుడుల్లో పడేలా పిచికారీ చేయాలి.

ముందే కాల్వలు తీసుకోవాలి
అధిక వర్షాల నేపథ్యంలో రైతులు ముందస్తు జాగ్రత్తలు తీసుకోవాలి. ఆగస్టు, సెప్టెంబర్‌ వరకు వర్షాలు కురిసే అవకాశం ఉంది. చేలల్లో నీరు నిల్వ ఉండగా ముందస్తుగానే కాల్వలు ఏర్పాటు చేసుకోవాలి. చీడపీడలు ఆశించకుండా నివారణ చర్యలు పాటించాలి.
– వెంకటేశ్వర్లు, తిరుమలగిరి ఏఓ