నల్లగొండ జిల్లాలో వరి ధాన్యం కొనుగోళ్ల‌ అల‌సత్వంపై సీపీఎం ధర్నా

నల్లగొండ జిల్లాలో రైతులు పండించిన వరి ధాన్యాన్ని యుద్ధ ప్రాతిపదికన కొనుగోలు చేయాలని డిమాండ్ చేస్తూ భారత కమ్యూనిస్టు పార్టీ (సిపిఎం) జిల్లా కమిటీ ఆధ్వర్యంలో సోమవారం జిల్లా కలెక్టరేట్ ఎదుట ధర్నా నిర్వహించారు. అనంతరం కలెక్టర్‌ను కలిసి సమస్యలను పరిష్కరించాలని వినతిపత్రం అందజేశారు.

– సమస్యలు పరిష్కరించాలని కలెక్టర్‌కు వినతి

రామగిరి, మే 11 : నల్లగొండ జిల్లాలో రైతులు పండించిన వరి ధాన్యాన్ని యుద్ధ ప్రాతిపదికన కొనుగోలు చేయాలని డిమాండ్ చేస్తూ భారత కమ్యూనిస్టు పార్టీ (సిపిఎం) జిల్లా కమిటీ ఆధ్వర్యంలో సోమవారం జిల్లా కలెక్టరేట్ ఎదుట ధర్నా నిర్వహించారు. అనంతరం కలెక్టర్‌ను కలిసి సమస్యలను పరిష్కరించాలని వినతిపత్రం అందజేశారు. ఈ సందర్భంగా సిపిఎం జిల్లా కార్యదర్శి తుమ్మల వీరారెడ్డి, రాష్ట్ర కమిటీ సభ్యుడు ముదిరెడ్డి సుధాకర్ రెడ్డి మాట్లాడుతూ.. జిల్లాలో ఏర్పాటు చేసిన 459 కొనుగోలు కేంద్రాల ద్వారా సుమారు 6.5 లక్షల మెట్రిక్ టన్నుల ధాన్యం కొనుగోలు చేయాలని నిర్ణయించినప్పటికీ, ఇప్పటివరకు కనీసం సగం కూడా కొనుగోలు చేయలేదన్నారు. ధాన్యం విక్రయించేందుకు రైతులు రోజుల తరబడి కేంద్రాల వద్ద పడిగాపులు కాస్తున్నారని వారు ఆవేద‌న వ్య‌క్తం చేశారు.

రైతులు ఎదుర్కొంటున్న ప్రధాన సమస్యలు

అకాల వర్షాలు : ధాన్యం సేకరణలో జాప్యం కారణంగా అకాల వర్షాలకు ధాన్యం తడిసిపోతోందని, కేంద్రాల్లో కనీసం టార్పాలిన్లు కూడా అందుబాటులో లేవని వారు విమర్శించారు.
అదనపు తూకం : తాలు, తేమ పేరుతో 40 కిలోల బస్తాకు అదనంగా 2 నుండి 10 కిలోల వరకు తూకం వేస్తూ రైతులను దోచుకుంటున్నారని ఆరోపించారు.
రవాణా ఇబ్బందులు : తూకం వేసిన ధాన్యాన్ని మిల్లులకు తరలించడానికి సరిపడా లారీలు రావడం లేదని, దీనివల్ల కేంద్రాల్లో నిల్వలు పెరిగిపోతున్నాయని తెలిపారు.
అదనపు వసూళ్లు : మిల్లుల వద్ద వెయిటింగ్ చార్జీల పేరుతో, గన్నీ బ్యాగుల కోసం, చివరకు ట్రక్కు షీట్ల జారీ కోసం కూడా రైతుల నుండి అక్రమంగా డబ్బులు వసూలు చేస్తున్నారని వారు కలెక్టర్ దృష్టికి తీసుకెళ్లారు.

సీపీఎం డిమాండ్లు

– జిల్లా యంత్రాంగం నిరంతరం పర్యవేక్షణ చేసి, యుద్ధప్రాతిపదికన ధాన్యం కొనుగోలు చేయాలి
– తడిసిన ధాన్యాన్ని ఎలాంటి కటింగ్ లేకుండా కొనుగోలు చేయాలి
– అదనపు లారీలను ఏర్పాటు చేసి మిల్లుల వద్ద జాప్యం జరిగితే ప్రైవేట్‌ గోదాములను లీజుకు తీసుకుని ధాన్యాన్ని దించాలి
– తూకం వేసిన వెంటనే ట్రక్కు షీట్లు ఇచ్చి, 2-3 రోజుల్లోనే రైతుల ఖాతాల్లో డబ్బులు జమ చేయాలి.

ఈ కార్యక్రమంలో డబ్బికార్ మల్లేషం, కందాల ప్రమీల, నారి ఐలయ్య, పాలడుగు నాగార్జున, పుచ్చకాయ నర్సిరెడ్డి, పెద్ద సంఖ్యలో సిపిఎం శ్రేణులు, రైతు సంఘం నాయకులు పాల్గొన్నారు.