పత్తి రైతుల ఆగ్రహం..!

తేమశాతం ఎక్కువగా ఉన్నందున తాము పత్తిని కొనుగోలు చేయబోమని అధికారులు తేల్చి చెప్పడంతో మంగళవారం పత్తి రైతులు మండలంలోని మాధారం గ్రామంలోని హైవేపై ధర్నాకు దిగారు. పత్తిని హైవేపై ఉంచి నిప్పంటించారు. పత్తిని వెంటనే కొనుగోలు చేయాలని డిమాండ్‌ చేశారు. ఓ పక్క అధికారులు పత్తిని కొనుగోలు చేయకపోవడం, మరో పక్క మొంథా తుఫాను భయపెడుతుంటంతో అన్నదాతలు ఆగ్రహంతో ఆందోళనకు దిగారు.

• తేమ శాతం ఎక్కువగా ఉందంటూ కొనుగోలు చేయని సీసీఐ అధికారులు
• మాధారం గ్రామ హైవే పత్తికి నిప్పంటించి ఆందోళనకు దిగిన రైతులు

శాలిగౌరారం, అక్టోబర్‌ 28: తేమశాతం ఎక్కువగా ఉన్నందున తాము పత్తిని కొనుగోలు చేయబోమని అధికారులు తేల్చి చెప్పడంతో మంగళవారం పత్తి రైతులు మండలంలోని మాధారం గ్రామంలోని హైవేపై ధర్నాకు దిగారు. పత్తిని హైవేపై ఉంచి నిప్పంటించారు. పత్తిని వెంటనే కొనుగోలు చేయాలని డిమాండ్‌ చేశారు. ఓ పక్క అధికారులు పత్తిని కొనుగోలు చేయకపోవడం, మరో పక్క మొంథా తుఫాను భయపెడుతుంటంతో అన్నదాతలు ఆగ్రహంతో ఆందోళనకు దిగారు. నల్లగొండ జిల్లా శాలిగౌరారం మండలంలోని మాధారం కలాన్‌లోని టీఆర్‌ఆర్‌ కాటన్‌ మిల్లులో పత్తి కొనుగోలు కేంద్రం ఏర్పాటు చేశారు.

ప్రారంభం రోజే స్లాట్‌ బుక్‌ చేసుకొని 26 ట్రాక్టర్ల పత్తి లోడ్లతో రైతులు కేంద్రానికి వచ్చారు. మొదటగా రైతులు తమ పత్తిని విక్రయించేందుకు కపాస్‌ కిసాన్‌ యాప్‌లో స్లాట్‌ బుక్‌ చేసుకోవాలని అధికారులు చెప్పడంతో బుక్‌ చేసుకున్నామని 27న డేట్‌ ఇవ్వడంతో విక్రయించేందుకు వచ్చామని రైతులు చెప్పారు. అయితే తేమ శాతం అధికంగా ఉన్నందున కొనుగోలు చేయబోమని సీసీఐ అధికారులు చెప్పి, మళ్లీ ఆన్‌లైన్‌లో స్లాట్‌ బుక్‌ చేసుకోవాలని చెప్పడంతో ఆగ్రహించిన పత్తి రైతులు ధర్నాకు దిగారు. రూ.లక్షలు అప్పు తెచ్చి పత్తి పంట సాగు చేస్తున్నామని కూలీలకు కేజీకి రూ.16 చెల్లించి పత్తి తీయిస్తున్నామని తెలిపారు.

ఈఏడాది వర్షాలు అధికంగా కురవడంతో పంట దిగుబడి తగ్గిందని, కనీసం పెట్టుబడి కూడా వస్తుందో లేదో తెలియదని రైతులు ఆవేదన వ్యక్తం చేశారు. మొంథా తుఫాను ప్రభావంతో మళ్లీ పత్తి తడుస్తుందని, మిల్లుకు తెచ్చిన పత్తిని వెంటనే కొనుగోలు చేయాలని డిమాండ్‌ చేశారు. సుమారు 2గంటల పాటు పత్తి రైతులు ధర్నా చేశారు. ధర్నాతో హైవేపై భారీగా వాహనాల రాకపోకలు స్తంభించిపోయాయి. విషయం తెలుసుకున్న శాలిగౌరారం సీఐ కొండల్‌రెడ్డి, శాలిగౌరారం తాసీల్దార్‌ వరప్రసాద్‌ సిబ్బందితో అక్కడికి చేరుకున్నా రు. రైతుల సమస్యను అడిగి తెలుసుకున్నారు. సమస్యను ఫోనులో పై అధికారులకు తెలియజేశారు.

మళ్లీ స్లాట్‌ బుక్‌ చేసుకోవాలన్నారు..
పత్తిని విక్రయించేందుకు కపాస్‌ కిసాన్‌ యాప్‌లో స్లాట్‌ బుక్‌ చేసుకోవాలన్నారు. చేసుకొని కేంద్రానికి పత్తిని తీసుకొస్తే తేమ శాతం ఎక్కవగా ఉందంటూ కొనుగోలు చేయకుండా కొర్రీలు పెడుతున్నారు. నేను 15 ఎకరాల్లో పత్తి సాగు చేశా. వర్షం వల్ల పత్తి ఆరబెట్టేందుకు స్థలం లేదు. మా బాధలు అర్థం చేసుకోని తక్షణమే పత్తి కొనుగోలు చేయాలి.
– చింతల శంకర్‌, మాధారం కలాన్‌

కేజీకి రూ.16 చెల్లించి..
పదెకరాల్లో పత్తి పంట సాగు చేశా. వర్షాలు ఎక్కువగా కురవడంతో దిగుబడి తగ్గినప్పటికీ పత్తిని తీసేందుకు కూలీలకు కేజీకి రూ.16 చెల్లించి పత్తి తీయించా. స్లాట్‌ బుక్‌ చేసుకొని కేంద్రానికి తీసుకొస్తే కొనుగోలు చేయకుండా ఇబ్బందులు పెడుతున్నారు. తేమశాతం ఉన్నందున కొనుగోలు చేయబోమని అంటున్నారు.
-నూక శంకర్‌, పెర్కకొండారం