చెక్‌డ్యామ్‌లతో జలకళ వచ్చె

స్వరాష్ట్రంలో బీఆర్‌ఎస్‌ ప్రభుత్వం రైతులకు కాల్వలు, చెక్‌డ్యామ్‌లతో సాగునీరు అందిస్తుండటంతో గతంలో ఎన్నడూ లేని విధంగా కరువు ప్రాంతమైన తుంగుతుర్తి నియోజకవర్గం సాగునీటితో పరవళ్లు తొక్కుతున్నది.

• నెర్రెలు బారిన నేలల్లో నీటి గలగలలు
• తుంగతుర్తి నియోజకవర్గంలో రూ.50 కోట్లతో ఆరు చెక్‌ డ్యామ్‌ల నిర్మాణం
• ఉబికి వస్తున్న భూగర్భ జలాలు.. పెరిగిన సాగు విస్తీర్ణం
• సంతోషం వ్యక్తం చేస్తున్న అన్నదాతలు
• తిరుమలగిరి మండలం

తాటిపాముల వద్ద బిక్కేరు వాగులో నిర్మించిన చెక్‌డ్యాం
తిరుమలగిరి, డిసెంబర్‌ 18 : స్వరాష్ట్రంలో బీఆర్‌ఎస్‌ ప్రభుత్వం రైతులకు కాల్వలు, చెక్‌డ్యామ్‌లతో సాగునీరు అందిస్తుండటంతో గతంలో ఎన్నడూ లేని విధంగా కరువు ప్రాంతమైన తుంగుతుర్తి నియోజకవర్గం సాగునీటితో పరవళ్లు తొక్కుతున్నది. దాంతో నాడు నెర్రెలు బారిన బీళ్లు నేడు పాడి పంటలతో కళకళలాడుతూ వ్యవసాయం పండుగలా మారింది. ఈక్రమంలో నిమోజకవర్గంలోని మండలాల నుంచి ప్రవహిస్తున్న మూసీ, బిక్కేరు వాగుల వెంట ఇసుక బోర్లు (పిల్టర్‌ పాయింట్లు)వేసుకొని వేలాది ఎకరాల్లో వరి పండిస్తున్నారు. ఒక్కో గ్రామ పరిధిలో 150 నుంచి 200 పైగా ఇసుక బోర్లపై ఆధారపడి రైతులు వ్యవసాయం చేస్తున్నారు.

పెరిగిన భూగర్భజలాలు
నియోజకవర్గంలోని మోత్కూర్‌, అడ్డగూడూరు, తిరుమలగిరి, నాగారం, మండలాల్లో ఎమ్మెల్యే గాదరి కిశోర్‌కుమార్‌ చొరవతో ప్రభుత్వం చెక్‌డ్యామ్‌ల నిర్మాణానికి నిధులు మంజూరు చేసింది. ఈ నిధులతో పనులు ప్రారంభించి చెక్‌డ్యామ్‌లు నిర్మించింది. కొన్నిచోట్ల చెక్‌డ్యామ్‌లు పూర్తి కాగా మరికొన్ని చోట్ల చివరి దశలో ఉన్నాయి. ఈ చెక్‌డ్యామ్‌లు నిర్మించిన ప్రాంతంలో సుమారు 5 కిలోమీటర్ల మేర ఇసుకలో భూగర్భజలాలు పెరుగుతాయి. ఒక్కో చెక్‌డ్యాం పరిధిలో 1,500 నుంచి 2 వేల ఎకరాలకు ఇసుక బోర్ల ద్వారా సాగునీరు అందించే అవకాశం ఉంది. కొన్ని గ్రామాలు ఈ బిక్కేరు వాగు నుంచే తాగునీటి సౌకర్యం కూడా పొందుతున్నాయి. ఈ చెక్‌డ్యామ్‌లతో వేసవిలోనూ ఇసుక బోర్లు వట్టిపోయే పరిస్థితి ఉండదు.

ప్రయోజనం పొందే గ్రామాలు..
ధర్మారం, చిన్నపడిశాల, తాటిపాముల, నందాపురం, అనంతారం, కోటమర్తి, లక్మీదేవికాల్వ, ఈటూరు, వర్ధమాన్‌కోట, మాచిరెడ్డిపల్లి, కొండగడప, మోత్కూర్‌, వస్తాకొండూరు, జానకిపురం, చిర్రగూడూరు, సదర్శాపురం గ్రామాల పరిధిలో భూగర్భజలాలు పెరిగి సాగు, తాగునీటి సౌకర్యం మరింతగా పెరిగే అవశం ఉన్నది.

చెక్‌డ్యామ్‌ల నిర్మాణం-నిధులు..

• అనంతారం రూ.10కోట్లు, 385 మీటర్ల పొడవు
• తాటిపాముల రూ.10 కోట్లు, 400 మీటర్లు
• వర్ధమాన్‌కోట రూ.10 కోట్లు, 308 మీటర్లు
• చిన్నపడిశాల రూ.6.20 కోట్లు, 182 మీటర్లు
• ధర్మారం రూ.8.40 కోట్లు, 260 మీటర్లు
• సదర్శాపురం రూ.6.09 కోట్లు, 285 మీటర్ల పొడవు n మోత్కూర్‌లో రూ.17.15 కోట్లు, 575 మీటర్ల పొడవు, కొండగడపలో రూ.9.17కోట్లు, 305 మీటర్ల పొడవుతో చెక్‌డ్యామ్‌లు నిర్మించేదుకు ప్రతిపాదనలు పంపారు.

ఎమ్మెల్యే చొరవతో నిర్మాణం
బిక్కేరు వాగులో చెక్‌డ్యాం నిర్మించాలని ఎంతో కాలంగా కోరుతున్నాం. అయినా ఎవరూ నిధులు మంజూరు చేయలేదు. ఎమ్మెల్యే గాదరి కిశోర్‌కుమార్‌ నిధులు మంజూరు చేయించి చెక్‌డ్యామ్‌లు నిర్మించడంతో భూగర్భజలాలు పెరిగి ఈ ప్రాంతంలో సాగు విస్తీర్ణం పెరుగుతుంది. దాంతో రైతులకు సాగునీటి కష్టాలు తీరుతున్నాయి.

-ఎర్ర శోభ, సర్పంచ్‌, తాటిపాముల

చెక్‌డ్యామ్‌లతో ఎంతో మేలు
మా ప్రాంతంలో ఒక్కో గ్రామంలో 150 నుంచి 200 వరకు ఇసుక బోర్లుంటాయి. వేసవిలో ఇసుక బోర్లుకు నీరు అందక ఇబ్బందులు పడేవాళ్లం. ఎమ్మెల్యే గాదరి కిశోర్‌కుమార్‌ కృషితో ఈ చెక్‌డ్యామ్‌ల నిర్మాణంతో వేసవిలోనూ నీరు లభించి పంటలు మరింత సాగవుతున్నాయి. వీటితో మా ప్రాంతానికి ఎంతో మేలు జరుగుతున్నది.

– కారుపోతుల నరేశ్‌, అనంతారం