రైతుబండి కదిలింది

• ఉమ్మడి మెదక్‌ జిల్లా వ్యాప్తంగా అంబరాన్నంటిన రైతుబంధు సంబురాలు
• సీఎం కేసీఆర్‌కు రైతన్నల జేజేలు
• పల్లెల్లో పండుగ వాతావరణం

ఉమ్మడి జిల్లా నెట్‌వర్క్‌, నమస్తే తెలంగాణ, జనవరి 10 :ఉమ్మడి జిల్లాలో ఊరూ.. వాడా పండుగ చేసుకున్నది. రైతుబంధు ద్వారా నాలుగేండ్లలో రూ.50వేల కోట్ల సాయం చేసినందుకు కృతజ్ఞతలు తెలుపుతూ రైతులు పెద్ద ఎత్తున కార్యక్రమాలు చేపట్టారు. సోమవారం రైతుబంధు వారోత్సవాల్లో భాగంగా నియోజకవర్గ, మండల కేంద్రాలతో పాటు పల్లెపల్లెనా ఎడ్లబండ్లు, ట్రాక్టర్లు, బైక్‌ ర్యాలీలు నిర్వహించారు. సీఎం కేసీఆర్‌ చిత్రపటాలకు క్షీరాభిషేకాలు చేశారు. వివిధ విభాగాల్లో పోటీలు నిర్వహించి విజేతలకు బహుమతులు అందజేశారు. ర్యాలీల్లో జై తెలంగాణ.. జైజై కేసీఆర్‌ నినాదాలు మార్మోగాయి. ఈ సందర్భంగా పలువురు ఉత్తమ రైతులను అధికారులు, టీఆర్‌ఎస్‌ నాయకులు సన్మానించారు. కార్యక్రమాల్లో పాల్గొన్న ఎమ్మెల్యేలు, ఎమ్మెల్సీలు, ప్రజాప్రతినిధులు మాట్లాడుతూ దేశ చరిత్రలో రూ.యాభై వేలకోట్లను రైతుల ఖాతాల్లో జమ చేసిన ఘనత సీఎం కేసీఆర్‌కే దక్కిందన్నారు. రైతు ఆత్మహత్యలకు అడ్డుకట్ట వేసి, 24గంటల ఉచిత విద్యుత్‌, రైతుబంధు, రైతుబీమా, ధాన్యం కొనుగోళ్లు, మద్దతు ధర ఇస్తూ వారిలో ఆత్మస్తైర్యం కల్పించారని తెలిపారు. బీజేపీ, కాంగ్రెస్‌ ఏనాడూ వ్యవసాయరంగాన్ని పట్టించుకోలేదని, అడ్డగోలు విమర్శలు చేస్తే సహించేది లేదని హెచ్చరించారు.

• కరెంటు కష్టం, సాగునీటి సమస్యలు, వీటికి తోడు నకిలీ విత్తనాలు, ఎరువులు.. వెరసి ఎవుసం ఇక దండుగ అని బతుకుదెరువుకు వలస వెళ్లిన మెతుకుసీమ పల్లె జనం ఇప్పుడు పండుగ చేసుకుంటున్నారు. తెలంగాణ ఏర్పాటు అనంతరం టీఆర్‌ఎస్‌ సర్కారు వ్యవసాయానికి వెన్నుదన్నుగా నిలుస్తూ అనేక పథకాలను విజయవంతంగా అమలు చేస్తుండడంతో వలసలు వాపస్‌ వచ్చాయి. స్వరాష్ట్రంలో ప్రభుత్వమే రైతు బంధు ద్వారా పెట్టుబడి సాయం అందిస్తుండడంతో రైతుల్లో ఆనందం వెల్లివిరుస్తున్నది. పంటకు పెట్టుబడి అందజేస్తుండడంతో ముఖ్యమంత్రి కేసీఆర్‌పై కర్షకలోకం అభిమానాన్ని చాటుకుంటున్నది. ఊరూవాడ, చేను చెల్కల్లో రైతుబంధు సంబురాలు నిర్వహిస్తున్నారు. రైతులంతా కలిసి బండ్లు, ట్రాక్టర్ల ఊరేగింపు ర్యాలీలు తీస్తున్నారు. వీరి ఆనందంలో ప్రజాప్రతినిధులు సైతం పాలుపంచుకుంటూ వారిలో మరింత ఉత్సాహాన్ని నింపుతున్నారు. సోమవారం సిద్దిపేట జిల్లా గజ్వేల్‌లో ఎమ్మెల్సీ డాక్టర్‌ యాదవరెడ్డి ఆధ్వర్యంలో గజ్వేల్‌ పట్టణంతో పాటు మండలంలోని అన్ని గ్రామాల నుంచి రైతులు ట్రాక్టర్లు, ఎద్దుల బండ్లపై తరలివచ్చి రైతుబంధు పథకం అమలుచేస్తున్నందుకు కృతజ్ఞతగా భారీ ర్యాలీ నిర్వహించారు. వేడుకల్లో భాగంగా హుస్నాబాద్‌ రైతు వేదికలో ఎమ్మెల్యే వొడితెల సతీశ్‌కుమార్‌ రైతులను సన్మానించారు. మెదక్‌ జిల్లా నర్సాపూర్‌ పట్టణంలో రైతుబంధు వారోత్సవాలు ఎమ్మెల్యే చిలుముల మదన్‌రెడ్డి ఆధ్వర్యంలో పెద్ద ఎత్తున నిర్వహించారు. ఈ సందర్భంగా నిర్వహించిన ఎడ్లబండ్లు, ట్రాక్టర్ల ర్యాలీ జాతరను తలపించింది. పెద్దశంకరంపేట పట్టణంలో రైతుబంధు వారోత్సవాల్లో భాగంగా నారాయణఖేడ్‌ ఎమ్మెల్యే మహారెడ్డి భూపాల్‌రెడ్డి ఎడ్ల బండి, ట్రాక్టర్ల ర్యాలీలో పాల్గొని రైతులను ఉత్సాహపరిచారు. ఉమ్మడి మెదక్‌ జిల్లాలోని అన్ని గ్రామాల్లో రైతుబంధు సంబురాలు ఘనంగా నిర్వహించారు. సందర్భంగా ముగ్గుల పోటీలు నిర్వహించి, విజేతలకు బహుమతులు అందజేశారు.