ఆఖరిరోజూ ఆగ్రహావేశాలు

కాంగ్రెస్‌ ప్రభుత్వం నిర్వహించిన గ్రామసభలు అట్టర్‌ప్లాప్‌ అయ్యాయి. ప్రభుత్వానికి మైలేజీ వస్తది అనుకున్న కాంగ్రెస్‌ పార్టీ ఆశలు ఆడియాశలు అయ్యాయి. ఏడా ది పాలనలోనే కాంగ్రెస్‌ ప్రభుత్వంపై తీవ్ర వ్యతిరేకత వచ్చింది. నాలుగు రోజులపాటు సిద్దిపేట, మెద క్‌, సంగారెడ్డి జిల్లాల్లో జరిగిన గ్రామసభలతో తేటతెల్లమైంది.

• నాలుగో రోజూ నిరసనలు, నిలదీతలు
• అధికారులకు ప్రజలు ప్రశ్నల వర్షం
• జాబితాల్లో అనర్హుల పేర్లు ఉండడంపై ఆగ్రహం
• కాంగ్రెస్‌ కార్యకర్తలకే పథకాలా అంటూ ఆక్రోశం
• ప్రభుత్వ తీరును ఎక్కడికక్కడ ఎండగట్టిన ప్రజలు
• పోలీస్‌ పహారా మధ్య ముగిసిన గ్రామసభలు
• ఉమ్మడి మెదక్‌ జిల్లాలో కాంగ్రెస్‌ ప్రభుత్వ తీరుపై ప్రజల గుర్రు

సిద్దిపేట, జనవరి 24(నమస్తే తెలంగాణ ప్రతినిధి): కాంగ్రెస్‌ ప్రభుత్వం నిర్వహించిన గ్రామసభలు అట్టర్‌ప్లాప్‌ అయ్యాయి. ప్రభుత్వానికి మైలేజీ వస్తది అనుకున్న కాంగ్రెస్‌ పార్టీ ఆశలు ఆడియాశలు అయ్యాయి. ఏడా ది పాలనలోనే కాంగ్రెస్‌ ప్రభుత్వంపై తీవ్ర వ్యతిరేకత వచ్చింది. నాలుగు రోజులపాటు సిద్దిపేట, మెద క్‌, సంగారెడ్డి జిల్లాల్లో జరిగిన గ్రామసభలతో తేటతెల్లమైంది. గ్రామాల్లో నిరసనలు, నిలదీతలతో నాలుగు రోజుల పాటు పల్లెలు దద్దరిల్లాయి. గ్రామ సభకు హాజరైన అధికారులకు ప్రజల నుంచి ప్రశ్నల వర్షం కురిసింది.

ప్రజలు అడిగిన ప్రశ్నలకు సమాధానం అధికారులు చెప్పలేక పోయారు.. గ్రామాలకు వెళ్లామా..? జాబితా చదివామా..? మమ అనిపించామా..? అన్నట్లుగా గ్రామ సభలు నిర్వహించారు. జాబితాలు చదవడం మొదలవ్వగానే ప్రజలు తమ ఆక్రోశాన్ని వెల్లగక్కారు. రేవంత్‌రెడ్డి ఎన్నికల ముందు ఏం హామీలు ఇచ్చారు. ఇప్పడు చేస్తున్నది ఏమిటి అంటూ గ్రామాల్లో ప్రజలు నిలదీశారు. మొత్తంగా నాలుగు రోజుల గ్రామసభల్లో అటు ప్రభుత్వానికి, ఇటు అధికార యంత్రాంగానికి ప్రజలు ముచ్చెమటలు పట్టించారు.

ఒక్కోచోట ఒక్కోలా..

• శుక్రవారం సిద్దిపేట మున్సిపాలిటీతో పాటు సిద్దిపేట అర్బన్‌, నారాయణరావుపేట, సిద్దిపేట రూరల్‌, నంగునూరు, చిన్నకోడూరు మండలాల్లో జరిగిన గ్రామసభలో ప్రభుత్వ తీరుపై ప్రజలు మండిపడ్డారు. జాబితాలు ఎలా సిద్ధ్దం చేశారు. అర్హులకు ఈ ప్రభుత్వంలో పథకాలు రావా..? అంటూ అధికారులను ప్రజలు ప్రశ్నించారు. ఆయా గ్రామాల్లో జరిగిన గ్రామ సభలు రసాభసాగా ముగిశాయి.
• గజ్వేల్‌ నియోజకవర్గంలోని మర్కూక్‌ మండలం ఎర్రవల్లిలో జరిగిన గ్రామ సభలో అధికారులు అత్యుత్సాహం ప్రదర్శించారు. గ్రామసభలో కాంగ్రెస్‌ నేత చేత మాట్లాడించారు. ప్రభుత్వ తీరుపై ప్రజలు తమ నిరసనను వ్యక్తం చేశారు. జగదేవ్‌పూర్‌ అల్లిరాజ్‌పేట లో గ్రామసభల్లో ప్రభుత్వ తీరును ఎండగట్టారు. అర్హులకు ఈ ప్రభుత్వం ఏం చేయదంటూ తమ అసహనం వ్యక్తం చేశారు.
• దుబ్బాక మున్సిపాలిటీలోని 11వ వార్డు లచ్చపేటలో వార్డుకు చెందిన మామిడాల రాజు అనే యువకుడు ఇందిరమ్మ ఇండ్ల జాబితాలో తనపేరు రాలేదని సెల్‌టవర్‌ ఎక్కి ఆత్మహత్యాయత్నానికి ప్రయత్నిస్తున్నానంటూ నిరసన చేపట్టాడు. అక్కడికి పోలీసులు, మున్సిపల్‌ అధికారులు చేరుకొని న్యాయం చేస్తామని హామీ ఇవ్వడంతో తన నిరసనను విరమించుకున్నాడు.
• మిరుదొడ్డి మండలం కాస్లాబాద్‌ గ్రామసభలో ఇం దిరమ్మ ఇండ్ల జాబితాలో తమ పేరు రాలేదని నిరుపేదలు అధికారుల తీరుపై ప్రజలు తమ ఆగ్రహం వ్యక్తం చేశారు. తొగుట్ట మండలకేంద్రంలో నిర్వహించిన గ్రామసభ రసాభసాగా ముగిసింది. ఇందిరమ్మ ఇండ్లపై అధికారులను నిలదీశారు. రాయపోల్‌ మండలంలోని ఎల్కల్‌లో ప్రజలు తమ నిరసను వ్యక్తం చేశారు.
• హుస్నాబాద్‌ మున్సిపాలిటీలోని 19వ వార్డులో ప్రభుత్వ సంక్షేమ పథకాలు అర్హులకు రావడం లేదం టూ గ్రామసభలో ప్రజలు నిరసన వ్యక్తం చేశారు. హు స్నాబాద్‌ మండలంలోని మహ్మదాపూర్‌, పొట్లపల్లి గ్రా మాల్లో అక్కన్నపేట, బెజ్జంకి, కోహెడ మండలాల్లో జరిగిన గ్రామ సభల్లో ప్రభుత్వ తీరుపై ప్రజలు ఆగ్రహం వ్యక్తం చేశారు.
• కొమురవెల్లి మండలంలోని గురువన్నపేట గ్రామ సభలో ప్రజలు తమ నిరసనను తెలియజేశారు. కాం గ్రెస్‌, బీఆర్‌ఎస్‌ కార్యకర్తల మధ్య వాగ్వాదం చోటు చేసుకుంది.
• మునిపల్లి మండలంలోని పెద్దగోపులారంలో కొత్త రేషన్‌ కార్డులు, ఇందిరమ్మ ఇండ్ల కోసం ఆర్డీవోను ప్రజలు ప్రశ్నించారు. పథకాలకు ఎన్నిసార్లు దరఖాస్తు చేసుకోవాలని నిలదీశారు. రాయికోడ్‌ మండలంలోని సింగీతం, ఇసునూరు, సీరూర్‌ గ్రామాల్లో రుణమాఫీ కాలేదని, అర్హులకు పథకాలు ఇవ్వలేదని అధికారులను గ్రామస్తులు నిలదీశారు. హత్నూర మండంలోని దౌ ల్తాబాద్‌, శేర్‌ఖాన్‌పల్లి, కొన్యాల గ్రామాల్లో ప్రభుత్వ పథకాలకు అర్హులకు అందడం లేదని ప్రజలు అధికారులను నిలదీశారు.
• నారాయణ్‌ఖేడ్‌, సిర్గాపూర్‌ మండలాల్లో కొత్తరేషన్‌కార్డులు, ఇందిరమ్మ ఇండల కోసం ఎన్నిసార్లు దరఖాస్తు చేసుకోవాలని గ్రామసభల్లో గ్రామస్తులు అధికారులను నిలదీశారు. కల్హేర్‌ మండలంలో రైతుభరోసా, రుణమాఫీ కోసం రైతులు అధికారులను ప్రశ్నించారు. ఝరాసంగం మండంలోని వనంపల్లి, బిడకన్నె గ్రామా ల్లో రుణమాఫీ చేయలేదని రైతులు అధికారులను నిలదీశారు.
• రామచంద్రాపురం మండంలోని తెల్లాపూర్‌, నాగుపల్లి గ్రామ సభల్లో ప్రభుత్వ పథకాల కోసం ఎన్నిసార్లు దరఖాస్తు చేసుకోవాలని ప్రజలు ఆగ్రహం వ్యక్తం చేయటంతో పాటు అధికారులను నిలదీశారు. కంది గ్రామసభలో పాల్గొన్న మహమ్మద్‌ అనే వ్యక్తి తనకు ఇందిరమ్మ ఇల్ల్లు రాలేదని సెల్‌టవర్‌ ఎక్కేందుకు ప్రయత్నించగా, పోలీసులు అడ్డుకున్నారు.
• శివ్వంపేట మండలం గుడ్లపల్లికి చెందిన రైతులు రుణమాఫీ కావడం లేదని, ఫించన్‌ డబ్బులు అకౌంట్‌లో పడితే అకౌంట్‌లో హోల్డ్‌లో పెట్టడంపై దొంతి గ్రామ యూనియన్‌ బ్యాంకు ఎదుటగ నిరసన వ్యక్తం చేశారు. గ్రామసభలో సైతం అధికారులను నిలదీశారు.
• కొల్చారంలో జరిగిన గ్రామసభలో ప్రజలు ప్రభుత్వ తీరుపై ఆగ్రహం వ్యక్తం చేసి రచ్చరచ్చ చేశారు. అనర్హులకే ఇండ్లు కేటాయించారని అధికారులపై ఆగ్రహం వ్యక్తం చేశారు. శుక్రవారం చివరి రోజూ నిరసనలు, నిలదీతలు, ప్రశ్నలతో గ్రామసభలు ముగిశాయి. అధి కారులకు చుక్కలు కనపడ్డాయి.