సంక్రాంతికి ఊరెళ్తున్నారా.. జాగ్రత్త

పండుగకు సొంతూళ్లకు వెళ్లే ప్రజ లు తగిన జాగ్రత్తలు తీసుకుని వెళ్లాలని, ఇండ్లను పదిలంగా చూసుకునే వారికి చెప్పి వెళ్లాలని సంగారెడ్డి ఎస్పీ రమణకుమార్‌ సూచించారు. శుక్రవారం జిల్లా పోలీస్‌ కార్యాలయంలో ఆయన మాట్లాడుతూ పండుగలకు ఊరికి వెళ్లే వారు పోలీసులకు సమాచారం అందిస్తే నిఘా ఏర్పాటు చేస్తామని తెలిపారు

• సంక్రాంతి వేళ అప్రమత్తంగా ఉండాలి
• చోరీల నియంత్రణకు ప్రత్యేక చర్యలు
• రాత్రి వేళల్లో గస్తీ ఏర్పాట్లు చేస్తున్నాం
• ఇరుగు, పొరుగు వారికి చెప్పి వెళ్లాలి
• విలువైన వస్తువులు ఉంటే లాకర్‌లో పెట్టుకోండి
• అనుమానితులపై సమాచారం ఇవ్వాలి
• సంగారెడ్డి ఎస్పీ రమణకుమార్‌, సిద్దిపేట సీపీ శ్వేత

పండుగకు సొంతూళ్లకు వెళ్లే ప్రజ లు తగిన జాగ్రత్తలు తీసుకుని వెళ్లాలని, ఇండ్లను పదిలంగా చూసుకునే వారికి చెప్పి వెళ్లాలని సంగారెడ్డి ఎస్పీ రమణకుమార్‌ సూచించారు. శుక్రవారం జిల్లా పోలీస్‌ కార్యాలయంలో ఆయన మాట్లాడుతూ పండుగలకు ఊరికి వెళ్లే వారు పోలీసులకు సమాచారం అందిస్తే నిఘా ఏర్పాటు చేస్తామని తెలిపారు. పండుగను పురస్కరించుకుని కొత్త బట్టలు, బంగారు ఆభరణాలు ధరించి వేడుకల్లో పాల్గొంటారని, ఆ సమయం లో పిల్లలకు బంగారు నగలు వేస్తే దొంగతనం జరిగే ప్రమా దం ఉందన్నారు. కొంతమంది తమ బ్యాగుల్లో విలువైన వస్తువులు ఉంచి, బస్సు ఆగిన చోట సీట్లో ఆ బ్యాగును పెట్టి తినుబండారాలు తీసుకోవడం, తాగునీళ్లు, టీ తాగడానికి వెళ్తుంటారని, ఆ సమయంలో దొంగతనం జరిగే అవకాశం ఉంది కాబట్టి జాగ్రత్తగా ఉండాలన్నారు.

సంగారెడ్డి/సిద్దిపేట, జనవరి 13 : సంక్రాంతి పండుగను పురస్కరించుకొని ఇండ్లకు తాళం వేసి ఊర్లకు వెళ్లేవారితో పాటు స్థానిక ప్రజలు కొన్ని జాగ్రత్తలు తీసుకోవాలని సిద్దిపేట పోలీస్‌ కమిషనర్‌ శ్వేత శుక్రవారం ఒక ప్రకటనలో సూ చించారు. పండుగ దృష్ట్యా చోరీల నియంత్రణకు అన్ని చర్యలు చేపట్టామని ప్రజలను అప్రమత్తం చేస్తూనే.. రాత్రి వేళల్లో వీధుల్లో గస్తీ ఏర్పాటు చేస్తున్నట్లు ఆమె తెలిపారు. పోలీసుల సలహా లు, సూచనలు పాటించి దొంగతనల నివారణకు ప్రజలు సహకరించాలని సీపీ తెలిపారు. అత్యవసరమైనప్పు డు సిద్దిపేట ఏసీపీ-9490617009, గజ్వేల్‌ ఏసీపీ-83339986 84, హుస్నాబాద్‌ ఏసీపీ- 7901640468, కంట్రోల్‌ రూం -8333998699, డయల్‌ 100కు సమాచారం అందించాలని సీపీ సూచించారు. సంక్రాంతి పండుగ సందర్భంగా ప్రజలు కింది జాగ్రత్తలు పాటించాలన్నారు.

సిద్దిపేట పోలీస్‌ శాఖ.. ప్రజలకు చేస్తున్న సూచనలు

• కాలనీల్లో ఎవరైనా అనుమానంగా తిరిగితే వెంటనే పోలీసులకు సమాచారం అందించాలి.
• ఇరుగు, పొరుగు వారికి తమ ఇంటిని కనిపెట్టమని చెప్పి వెళ్లాలి.
• కుటుంబ సభ్యులు బయటకు వెళ్లినప్పుడు ఇంట్లో ఉన్న మహిళలు, వృద్ధుల వద్దకు అపరిచితు లు సమాచారం కావాలని వస్తే నమ్మి ఏమరుపాటుగా ఉండవద్దు.
• ఊర్లకు వెళ్లేటప్పుడు ఖరీదైన వస్తువులను ఇంట్లో పెట్టకపోవడమే మంచిది. బ్యాంక్‌ లాకర్‌లో పెట్టుకోవడం ఉత్తమం.
• తాళం వేసేటప్పుడు ఒకటికి, రెండుసార్లు సరి చూసుకోవాలి.
• బీరువా తాళాలను ఇంట్లో ఉంచరాదు. తమతో పాటే తీసుకెళ్లాలి.
• కాలనీల్లో, ఇంటి పరిసరాల్లో సీసీ కెమెరాల ఏర్పాటు శ్రేయస్కరం.
• విలువైన వస్తువులను కార్లలో పెట్టకూడదు.
• బ్యాగుల్లో నగలు, డబ్బులు పెట్టుకొని ప్రయాణం చేసేటప్పుడు బ్యాగులు దగ్గరలో పెట్టుకోవాలి.
• విలువైన వస్తువుల సమాచారాన్ని, వ్యక్తిగత ఆర్థిక విషయాలను ఇతరులకు చెప్పకూడదు.
• ఇంట్లో, ఇంటి బయట మోషన్‌ సెన్సార్‌ లైట్లను ఉపయోగించండి. వాటి ద్వారా పరిసరాల్లో ఏదైనా కదలిక గుర్తించగానే లైట్‌ వెలుగుతుంది.
• దూర ప్రాంతాలకు వెళ్లేవారు స్థానికి పోలీస్‌ స్టేషన్‌లో తమ ఇంటి చిరునామా, ఫోన్‌ నంబర్‌ ఇస్తే వారి ఇండ్ల వద్ద నిఘా ఏర్పాటు చేస్తాం.