Visit:
పెద్దశంకరంపేట, నవంబర్‌ 30: మోసపూరిత హామీలతో మాయమాటలు చెప్పి అధికారంలోకి వచ్చిన కాంగ్రెస్‌కు స్థానిక ఎన్నికల్లో ప్రజలు తగిన బుద్ధి చెప్పాలని మాజీ మంత్రి హరీశ్‌రావు పిలుపునిచ్చారు. మెదక్‌ జిల్లా పెద్దశంకరంపేటలోని బాయికాడి పద్మయ్య ఫంక్షన్‌ హాల్‌లో ఆదివారం నిర్వహించిన బీఆర్‌ఎస్‌ ముఖ్య నాయకుల సమావేశానికి హరీశ్‌రావు హాజరయ్యారు. ఈ సందర్భంగా ఆయన మాట్లాడుతూ.. కాంగ్రెస్‌ ప్రభుత్వం ఆరు గ్యారెంటీలు ఇచ్చి అమలు చేయకుండా మోసం చేసిందన్నారు. వందల కొద్దీ హామీలిచ్చి అన్నివర్గాలను అన్యాయం చేసిందన్నారు.
రైతులకు రైతుబంధు ఇవ్వకుండా, యాసంగి పంటకు బోనస్‌ చెల్లించకుండా, పంట రుణమాఫీ అందరికీ చేయకుండా, వ్యవసాయానికి నాణ్యమైన కరెంట్‌ ఇవ్వకుండా ఇబ్బందుల పాలుచేస్తున్నట్లు విమర్శించారు. రేవంత్‌ పాలనలో అభివృద్ధి ఆగిపోయిందని,సంక్షేమం పడకేసిందని హరీశ్‌రావు విమర్శించారు. జీపీ ఎన్నికల్లో బీఆర్‌ఎస్‌ బలపర్చిన అభ్యర్థులను భారీ మెజార్టీతో గెలిపించాలని పార్టీ శ్రేణులకు పిలుపునిచ్చారు. పెద్దశంకరంపేటకు చెందిన జంగం రేణుకను భారీ మెజార్టీతో గెలిపించాలన్నారు. కార్యక్రమంలో నారాయణఖేడ్‌ మాజీ ఎమ్మెల్యే భూపాల్‌రెడ్డి, బీఆర్‌ఎస్‌ నాయకులు జంగం శ్రీనివాస్‌, రాఘవులు, సురేశ్‌గౌడ్‌, దత్తు, వెంకట్‌రెడ్డి, అమర్‌, భూత్కూరి సుబాశ్‌, గంగారామ్‌, అవుసుల భవానీ, శంకర్‌గౌడ్‌ పాల్గొన్నారు.
