అసలైన వారసులకే ఎక్స్‌గ్రేషియా దక్కేనా

సంగారెడ్డి జిల్లా పటాన్‌చెరు మండలం పాశమైలారం పారిశ్రామికవాడలోని సిగాచి పరిశ్రమలో చోటుచేసుకున్న ప్రమాదంలో మృతిచెందిన కార్మికుల కుటుంబాల భవిష్యత్తు ప్రశ్నార్థకంగా మారింది. కాగా, ప్రమాదం తర్వాత తమ వారి మృతదేహాల కోసం కుటుంబీకులకు ఎదురుచూపులు తప్పడం లేదు.

• మృతదేహాల కోసం రక్త సంబంధీకుల పోటాపోటీ
• ప్రభుత్వం, పరిశ్రమ అప్రమత్తంగా వ్యవహరించాలి

అమీన్‌పూర్‌, జూలై 4: సంగారెడ్డి జిల్లా పటాన్‌చెరు మండలం పాశమైలారం పారిశ్రామికవాడలోని సిగాచి పరిశ్రమలో చోటుచేసుకున్న ప్రమాదంలో మృతిచెందిన కార్మికుల కుటుంబాల భవిష్యత్తు ప్రశ్నార్థకంగా మారింది. కాగా, ప్రమాదం తర్వాత తమ వారి మృతదేహాల కోసం కుటుంబీకులకు ఎదురుచూపులు తప్పడం లేదు.

పటాన్‌చెరు ఏరియా దవాఖాన వద్ద మృతుల రక్త సంబంధీకులు మృతదేహాల కోసం వివిధ ప్రయత్నాలు చేస్తున్నారు. ప్రభుత్వం, పరిశ్రమ నుంచి మృతుల కుటుంబాలకు ఎక్స్‌గ్రేషియా రూపేనా ఒక్కొక్కరికి సుమారుగా కోటి పది లక్షల రూపాయల వరకు రానున్నాయి. దీంతో మృతుల కుటుంబ సభ్యులే కాకుండా బంధువులు సైతం వచ్చి మృతదేహాలను తరలించడానికి ప్రత్యేక ఆసక్తి కనబరుస్తున్నారు.

• సిగాచి పరిశ్రమలో జరిగిన ప్రమాదంలో వివాహం కాని కార్మికుడు ఒకరు మృతిచెందారు. ఆ కార్మికుడి భార్యను తానేనని చెప్పుకొని ఒక మహిళ అతడి మృతదేహాన్ని తనకు అప్పగించాలని గురువారం గందరగోళం సృష్టించింది. ఎక్స్‌గ్రేషియా పొందడానికే ఆమె ఈ నాటకం అడినట్లు తెలుస్తున్నది.
• ప్రశాంత్‌ మహాపాత్ర అనే కార్మికుడు ఐదేండ్ల క్రితం బతుకుదెరువు నిమిత్తం భార్యాపిల్లలతో ఒడిశా నుంచి ఇస్సాపూర్‌కు వచ్చి మూడేండ్లుగా సిగాచి పరిశ్రమలో కార్మికుడిగా పనిచేస్తున్నాడు. ప్రమాదంలో ప్రశాంత్‌ మహాపాత్ర మరణించాడు. అతని మృతదేహం మాంసం ముద్దలుగా మారింది. ప్రశాంత్‌ మహాపాత్ర భార్య సోనాలి మహాపాత్ర ముగ్గురు పిల్లలతో ఐదు రోజులుగా దవాఖానల చుట్టూ రోధిస్తూ తిరుగుతూ భర్త జాడ కోసం తిరగడం అందరినీ కలిచివేసింది.
• ఎట్టకేలకు మృతుడి పెద్ద కుమారుడి రక్త నమూనాలు సేకరించి డీఎన్‌ఏ పరీక్ష ద్వారా మూడు రక్తం ముద్దలు ప్రశాంత్‌ మహాపాత్ర మృతిచెందినట్లుగా శుక్రవారం అధికారులు ధ్రువీకరించారు. ఆ రక్తపు ముద్దలను అప్పగిస్తే తీసుకెళ్లి అంత్యక్రియలు నిర్వహించుకుంటామని మృతుడి భార్య సోనాలి మహాపాత్ర తన పిల్లలతో పాటు అధికారులను వేడుకుంది. ప్రశాంత్‌ మహాపాత్ర పెద్ద అన్న సుఖంత్‌ మహాపాత్ర ఒడిశా నుంచి వచ్చి తన తమ్ముడి మృతదేహాన్ని తమ స్వస్థలానికి తీసుకెళ్తామంటూ తమ్ముడి భార్య సోనాలితో వాదించాడు.
• ఎట్టి పరిస్థితుల్లో ఒడిశాకు తీసుకెళ్లవద్దని, ఇస్నాపూర్‌లోనే దహన సంస్కారాలు పూర్తి చేస్తామని అతనితో సోనాలి వాగ్వాదానికి దిగింది. మృతుల కుటుంబాలకు వచ్చే ఎక్స్‌గ్రేషియా డబ్బుల కోసం రక్త సంబంధీకులు మృతదేహాలు తీసుకెళ్లేందుకు ఆసక్తి చూపుతున్నట్లు ఆరోపణలు వస్తున్నాయి. ప్రభుత్వం, సిగాచి పరిశ్రమ ఈ విషయంలో తగు జాగ్రత్తలు తీసుకుని అసలైన వారసులకే ఎక్స్‌గ్రేషియా అందేలా చూడాలని అందరూ విజ్ఞప్తి చేస్తున్నారు.