మహిళలదే పైచేయి..!

ఓటరు జాబితా సమగ్ర సవరణ(సర్‌)లో మెదక్‌, సంగారెడ్డి, సిద్దిపేట జిల్లాల్లో మొత్తం 4,60,000 ఓట్లు గల్లంతయ్యాయి. ఈ మూడు జిల్లాల్లో మొత్తం 86,364 మంది ఓటర్లు మృతిచెందిడంతో వారివి తొలిగించారు.

• ‘సర్‌’ ప్రక్రియలో ఉమ్మడి మెదక్‌ జిల్లాలో 4,60,000 ఓట్లు గల్లంతు
• సిద్దిపేట జిల్లాలో 1,18,786 ఓట్లు, మెదక్‌లో42,936 ఓట్లు,సంగారెడ్డి జిల్లాలో 2,98,278 ఓట్లు తొలిగింపు
• మూడు జిల్లాల్లో 86,364 మృతులఓట్ల తొలిగింపు
• 17న ప్రకటించిన ముసాయిదా ప్రకారం మహిళా ఓట్లే అధికం
• 11 శాసనసభా స్థానాల్లో 9 చోట్ల మహిళల ఓట్లే కీలకం
• నారాయణ్‌ఖేడ్‌, జహీరాబాద్‌లోపురుషుల ఓట్లు అధికం
• భవిష్యత్తులో మారనున్న రాజకీయ సమీకరణాలు

సిద్దిపేట, ఆగస్టు 18(నమస్తే తెలంగాణ ప్రతినిధి) : ఓటరు జాబితా సమగ్ర సవరణ(సర్‌)లో మెదక్‌, సంగారెడ్డి, సిద్దిపేట జిల్లాల్లో మొత్తం 4,60,000 ఓట్లు గల్లంతయ్యాయి. ఈ మూడు జిల్లాల్లో మొత్తం 86,364 మంది ఓటర్లు మృతిచెందిడంతో వారివి తొలిగించారు.

సిద్దిపేట జిల్లాలో…

సర్‌ ప్రక్రియలో భాగంగా ఈనెల 10వ తేదీ వరకు సిద్దిపేట జిల్లాలో 9,92,967 ఎన్యుమరేషన్‌ ఫారాలు అందించారు. ఈనెల 17న ప్రకటించిన ముసాయిదాలో 8,74,181 మంది ఓటర్లు ఉన్నారు.జిల్లాలో ఇప్పటి వరకు 88.04 శాతం డిజిటలైజేషన్‌ పూర్తి అయింది. ఈలెక్కన జిల్లాలో 1,18,786 ఓట్లు ఎగిరిపోయాయి.అనామలీస్‌ కింద(అక్షరదోషాలు, పేర్లు తప్పులు, పుట్టిన తేదీల్లో తేడాలు తదితరవి) 1,99,183, మ్యాపింగ్‌ కానివి 27,251, మొత్తం ఎఎస్‌డీడీ 1,18,786 ఓట్లు కాగా, వీరిలో మృతులు 32,236 మంది , గైర్హాజరు 11,259 మంది , శాశ్వత వలస 58,628 మంది, ఇతరులు 474, ఇప్పటికే నమోదైనవి 16,189 మంది ఉన్నారు.

సంగారెడ్డి జిల్లాలో…

సంగారెడ్డి జిల్లాలో ఈనెల 10న అందించిన సర్‌ ఫారాల ప్రకారం 14,57,436 మంది ఉన్నారు. ముసాయిదా జాబితాలో 11,59,158 ఓటర్లు ఉన్నారు. అంటే 2,98,278 మంది ఎగిరిపోయాయి. కాగా, డిజిటలైజేషన్‌ 79.53 శాతం పూర్తి అయింది. అనామలీస్‌ 3,47,682 మంది, మ్యాపింగ్‌ కానివారు 1,12,749 మంది,మొత్తం ఎఎస్‌డిడి 2,98,278 మంది కాగా వీరిలో మృతులు 40,962 మంది, గైర్హాజర్‌ 54,135, శాశ్వత వలస 1,59,376 మంది, ఇతరులు 7,275 మంది, ఇప్పటికే నమోదైన వారు 36,530 మంది ఓటర్లున్నారు.

మహిళా ఓటర్లదే పైచేయి..

ఈనెల 17న విడుదల చేసిన ముసాయిదా ఓటర్ల జాబితా ప్రకారం సిద్దిపేట, మెదక్‌, సంగారెడ్డి జిల్లాల పరిధిలోని 11 శాసనసభా నియోజకవర్గాల్లో మహిళా ఓటర్ల సంఖ్య పురుష ఓటర్లను మించిపోవడం రాజకీయంగా ఆసక్తికరంగా మారింది. ఉమ్మడి మెదక్‌ జిల్లాలోని 11 శాసనసభా నియోజకవర్గాలకు నారాయణ్‌ఖేడ్‌, జహీరాబాద్‌ మినహా మిగతా 9 శాసనసభా స్థానాల్లో మహిళా ఓటర్ల సంఖ్య అధికంగా ఉంది. దీంతో రానున్న ఎన్నికల్లో మహిళా ఓటర్లు నిర్ణయాత్మక పాత్ర పోషించే అవకాశాలు ఉన్నాయి.ఈ తొమ్మిది నియోజకవర్గాల్లో పురుషులకన్నా 43,294 మహిళా ఓటర్లు ఎక్కువగా ఉన్నారు.

• సిద్దిపేట జిల్లాలోని నాలుగు నియోజకవర్గాల్లో మహిళా ఓట్లే అధికంగా ఉన్నాయి. సిద్దిపేట నియోజకవర్గంలో 3,346, గజ్వేల్‌లో 4,904, దుబ్బాకలో 4,948, హుస్నాబాద్‌లో 3,214 పురుషుల కన్నా మహిళా ఓటర్లు ఎక్కువగా ఉన్నారు. ఈ జిల్లాలో పురుషుల కన్నా మహిళా ఓటర్లు 16,412 మంది అధికంగా ఉన్నారు.
• మెదక్‌ జిల్లాలోని మెదక్‌లో 9,339, నర్సాపూర్‌ నియోజకవర్గాల్లో 5,712 మంది మహిళా ఓటర్లు అధికంగా ఉన్నారు. ఈ జిల్లాలో పురుషుల కన్నా 15,076 మంది మహిళా ఓటర్లు అధికంగా ఉన్నారు.
• సంగారెడ్డి జిల్లాలో సంగారెడ్డిలో 4,057, పటాన్‌చెరు 3,635, ఆందోల్‌ నియోజకవర్గంలో 4,144 మంది మహిళా ఓటర్లు అధికంగా ఉన్నారు. మొత్తంగా ఈ జిల్లాలో పురుషులకన్నా 11,806 మంది మహిళా ఓటర్లు ఎక్కువగా ఉన్నారు. నారాయణ్‌ఖేడ్‌, జహీరాబాద్‌లో పురుషుల ఓట్లు అధికంగా ఉన్నాయి. నారాయణ్‌ఖేడ్‌లో 2059, జహీరాబాద్‌లో 817, మొత్తం 2876 మంది పురుష ఓటర్లు ఎక్కువగా ఉన్నారు. మహిళా ఓటర్ల సంఖ్య అధికంగా ఉన్న నేపథ్యంలో రాజకీయ పార్టీల వ్యూహాలు మారే అవకాశం ఉంది.మహిళా ఓటర్లను ఆకట్టుకునేలా మేనిఫెస్టోల్లో ప్రత్యేక హామీలు, సంక్షేమ పథకాలు, ఉపాధి అవకాశాలు, ఆర్థిక స్వావలంబన, భద్రత, విద్య, ఆరోగ్యం వంటి అంశాలకు మరింత ప్రాధాన్యత ఇచ్చే అవకాశం ఉంది. ఇప్పటికే పలు ఎన్నికల్లో మహిళా ఓటింగ్‌ శాతం పురుషుల కంటే ఎకువగా నమోదవుతున్న సందర్భాలు ఉన్నాయి. ఈ నేపథ్యంలో ఓటర్ల సంఖ్యలోనూ మహిళలు ముందంజలో ఉండడం ఎన్నికల సమీకరణాల్లో కీలక పరిణామంగా మారుతోంది.

మెదక్‌ జిల్లాలో…

మెదక్‌ జిల్లాలో 10వ తేది వరకు 4,53,140 మంది ఓటర్లు ఉన్నారు. ముసాయిదాలో 4,10,204 మంది ఓటర్లు ఉన్నారు. 90.52 శాతం డిజిటైజేషన్‌ పూర్తి చేశారు.ఈ జిల్లాలో 42,936 ఓట్లు తొలిగించారు. అనామలీస్‌ కింద 1,11,689 మంది, మ్యాపింగ్‌ కాని వారు 6,973 మంది, మొత్తం ఎఎస్‌డీడీ 42,936 ఓటర్లు కాగా, వీరిలో మృతులు 13,166 మంది, గైర్హాజర్‌ 1508, శాశ్వత వలస 21,101 మంది , ఇతరులు 314 ,ఇప్పటికే నమోదైన వారు 6,847మంది ఉన్నారు.