Visit:
తిరువనంతపురం: ఒక విద్యార్థిని ఆర్టీసీ బస్సులో ప్రయాణించింది. ఉచిత టికెట్ ఇవ్వాలని అడిగింది. అయితే ఆ యువతి డ్రెస్ వల్ల అబ్బాయిగా కండక్టర్ పొరపాటుపడ్డాడు. ఈ నేపథ్యంలో జెండర్ ఏమిటని ప్రశ్నించాడు. కండక్టర్పై ఆ యువతి ఫిర్యాదు చేయడంతో సస్పెండ్ చేయడంతోపాటు కేసు నమోదు చేశారు. (Kerala student free ticket) కేరళలోని కొచ్చి జిల్లాలో ఈ సంఘటన జరిగింది. శనివారం ఇంటర్ విద్యార్థిని తన స్నేహితులతో కలిసి నార్త్ పరావూర్ నుంచి కొచ్చికి వెళ్లే ఆర్డీసీ బస్సులో ప్రయాణించింది. ఆ రాష్ట్రంలో మహిళలకు ఆర్టీసీ బస్సుల్లో ఉచిత ప్రయాణాన్ని అమలు చేస్తున్నారు.
కాగా, ఆలయ సందర్శన అనంతరం ఆ అమ్మాయి తలనీలాలు సమర్పించడంతో పాటు టీ షర్ట్, జీన్స్ ధరించించి. దీంతో బస్సు కండక్టర్ ఆమెను అబ్బాయిగా పొరబడి రూ.15 టికెట్ ఇచ్చాడు. అయితే ఆ విద్యార్థిని తనకు జీరో టికెట్ ఇవ్వాలని అడిగింది. ఈ నేపథ్యంలో ఆమె జెండర్ ఏమిటని కండక్టర్ అడిగాడు. ఆమె అమ్మాయి అని తనకు ఎలా తెలుస్తుందని ప్రశ్నించాడు. చిన్న వాగ్వాదం తర్వాత జీరో టికెట్ ఇచ్చాడు.
మరోవైపు ఆర్టీసీ బస్సు కండక్టర్ తన జెండర్ అడిగి అవమానించినట్లు ఆ యువతి ఆరోపించింది. ఆర్టీసీ అధికారులతో పాటు పోలీసులకు ఆమె ఫిర్యాదు చేసింది. ఈ నేపథ్యంలో ఆర్టీసీ విజిలెన్స్ విభాగం ప్రాథమిక విచారణ జరిపింది. ఆ తర్వాత కండక్టర్ మహేష్ను సస్పెండ్ చేశారు. పోలీసులు కూడా ఆయనపై పలు సెక్షన్ల కింద కేసు నమోదు చేశారు.
అయితే ఆ విద్యార్థిని తాను అవమానించినట్లుగా వచ్చిన ఆరోపణలను కండక్టర్ మహేష్ ఖండించారు. కేవలం అపార్థం వల్ల ఈ సంఘటన జరిగినట్లు తెలిపారు. ఆ విద్యార్థినిని అబ్బాయిగా భావించడం వల్లే మొదట రూ.15 టికెట్ ఇచ్చానని చెప్పారు. తాను అమ్మాయి అని ఆమె స్పష్టం చేసిన తర్వాత, దానికి బదులుగా జీరో టికెట్ ఇచ్చినట్లు వివరించారు.
అలాగే టీ షర్ట్, జీన్స్ ధరించడంతోపాటు గుండుతో ఉన్న ఆ విద్యార్థిని పక్కనే కూర్చున్న మహిళా ప్రయాణికురాలు కూడా మొదట్లో అబ్బాయిగా పొరబడ్డారని కండక్టర్ మహేష్ తెలిపారు. ఆ అమ్మాయి పట్ల తాను ఎలాంటి అసభ్యకరమైన లేదా అవమానకరమైన భాష ఉపయోగించలేదని చెప్పారు. కొందరు ప్రయాణికులు కూడా పోలీసులకు వాంగ్మూలాలు ఇచ్చారని వివరించారు. ఈ కేసులో తన నిర్దోషిత్వాన్ని నిరూపించుకోగలననే నమ్మకం తనకు ఉన్నదని ఆ కండక్టర్ మీడియాతో అన్నారు.
