రాస్తాలకు రాజసం

వాహనదారులు, ప్రజలకు ప్రయాణ భారం తగ్గింది. తెలంగాణ ఏర్పడక ముందు హైదరాబాద్‌, మహబూబ్‌నగర్‌కు డివిజన్‌, నియోజకవర్గ కేంద్రాల నుంచి రాకపోకలు సాగించాలంటే భయపడే పరిస్థితులు.

• ఉమ్మడి జిల్లాలో రాచబాటలు
• సొబగులతో తళుకులీనుతున్న రోడ్లు
• పలు ప్రాంతాలకు మార్గం సుగమం
• అద్దంలాంటి సడక్‌ల తో తొలగిన ట్రా‘ఫికర్‌’
• జబర్దస్త్‌ రాస్తాలతో సాఫీగా ప్రయాణం
• డివైడర్లు, పచ్చని మొక్కలతో ఆహ్లాదంగా.
• పల్లె, పట్నం టు రాజధానికి రయ్‌.. రయ్‌..
• పెరిగిన వేగం.. త్వరగా గమ్యస్థానాలకు..

వాహనదారులు, ప్రజలకు ప్రయాణ భారం తగ్గింది. తెలంగాణ ఏర్పడక ముందు హైదరాబాద్‌, మహబూబ్‌నగర్‌కు డివిజన్‌, నియోజకవర్గ కేంద్రాల నుంచి రాకపోకలు సాగించాలంటే భయపడే పరిస్థితులు. సీఎం కేసీఆర్‌ ఆధ్వర్యంలో కొత్తగా జిల్లాలు ఏర్పడటం.. పరిపాలన ప్రజలకు చేరువ కావడం.. ప్రయాణ సమయమూ సగానికి తగ్గింది. నియోజకవర్గ కేంద్రాలను కలిపే రోడ్లతో పాటుగా గ్రామాల్లోని అంతర్గత రోడ్లకు సొబగులు వచ్చాయి. జబర్దస్త్‌ రాస్తాలతో ప్రయాణం సాఫీగా సాగుతుండడంతో ట్రా‘ఫికర్‌’ తీరింది. పల్లె, పట్నం టు హైదరాబాద్‌తోపాటు ఇతర నగరాలకు రయ్‌.. రయ్‌ మంటూ వాహనాలు దూసుకెళ్తున్నాయి. పెరిగిన వేగంతో గమ్యస్థానాలకూ ప్రజలు త్వరగా చేరుకుంటున్నారు. రహదారులు అద్దాల్లా మెరుస్తూ హైవేలను తలపిస్తుండగా.. డివైడర్లు, పచ్చని మొక్కలతో సుందరంగా.. ఆహ్లాదకరంగా మారాయి.

వనపర్తి, మే 17 : గతుకుల రోడ్లను తొలగించి రహదారుల విస్తరణతో ప్రజలకు ప్రయాణ ఇక్కట్లు తగ్గాయి. తెలంగాణ ఏర్పడక ముందు పాలమూరుకు వెళ్లాలంటే వనపర్తి నుంచి రెండు మార్గాల్లో.. ఖిల్లా ఘణపురం మీదుగా 56 కిలోమీటర్లు రోడ్ల పరిస్థితి అధ్వానంగా ఉండగా.. మూడు గంటల సమయం పట్టేది. కొత్తకోట మీదుగా అయితే నేషనల్‌ హైవే ఉండడం వల్ల పెద్దగా ఇబ్బందులు లేకపోయినా.. వనపర్తి నుంచి కొత్తకోటకు 14 కిలోమీటర్ల దూరానికే దాదాపు 45 నిమిషాలు పట్టేది. గోపాల్‌పేట మీదుగా రోడ్డు సరిగ్గా లేకపోవడం వల్ల కొన్ని చోట్ల కేవలం 10 కిలోమీటర్ల ప్రయాణానికి 25 నిమిషాలు పట్టేది. హైదరాబాద్‌ ప్రధాన రహదారికి వెళ్లేందుకు వనపర్తి నుంచి గోపాల్‌పేట వెళ్లే మార్గంలో రెండు పెద్ద కల్వర్టుల నిర్మాణ పనులు ప్రస్తుతం వేగంగా జరుగుతున్నాయి. గడిచిన మూడేండ్లలో వనపర్తికి చుట్టూ 88.50 కిలోమీటర్ల రోడ్లను రూ.213.65కోట్లతో నిర్మించి.. సర్వాంగ సుందరంగా తీర్చిదిద్దారు.

అభివృద్ధి వివరాలు

• వనపర్తి రోడ్డు విస్తరణ ప్యాకెజీ-1లో భాగంగా రూ.27కోట్లతో జెర్రిపోతుల మశమ్మ వాగు కల్వర్టు పూర్తి చేయగా, శ్రీరామ థియేటర్‌ వాగు కల్వర్టు పనులు కొనసాగుతున్నాయి.
• ప్యాకెజీ-2లో రూ.22.70కోట్లతో వనపర్తి నుంచి బుద్ధారం రోడ్డు, వనపర్తి-పాన్‌గల్‌ రహదారి, వనపర్తి-పెబ్బేర్‌ రోడ్డు పనులు జరుగుతున్నాయి.
• వనపర్తి-పెబ్బేర్‌ వరకు మూడు విభాగాల్లో పనులు పూర్తి చేయగా నాచహళ్లి నుంచి చాపలవాగు వరకు రూ.6.8కోట్లతో 3కిలోమీటర్లు చిన్న చిన్న వంతెనలు, చాపలవాగు నుంచి పెబ్బేర్‌ వరకు రూ.15 కోట్లతో, నాచహళ్లి నుంచి కంచిరావుపల్లి క్రషర్‌ వరకు రూ.15కోట్లతో 6 కిలోమీటర్ల మేర పూర్తి చేశారు.
• రూ.27కోట్లతో వనపర్తి నుంచి కొత్తకోట వరకు 14కిలోమీటర్ల రోడ్లు పూర్తి చేశారు.
• రూ.22కోట్లతో వనపర్తి నుంచి రాజనగరం, బుద్ధారం నుంచి బలిజపల్లి, బలిజపల్లి నుంచి వీరాయపల్లి వరకు రోడ్లు పనులు పూర్తి చేశారు.
• వనపర్తి నుంచి గోపాల్‌పేటకు ప్రధాన రహదారిని రూ.15.4 కోట్లతో పూర్తి చేస్తున్నారు.

బీటీ రోడ్డుతో చెక్‌
విలియంకొండ నుంచి నాచారం పేటకు వెళ్లాలంటే ప్రయాణం నరకంగా ఉండేది. దారి మధ్యలో ఒక చెరువు నిండి ఉండడం తో మోకాళ్ల ఎత్తు వరకు నీళ్లు నిలిచి ఉండేవి. మహిళలు తీవ్ర ఇబ్బందులకు గురయ్యేవారు. తె లంగాణ ప్రభుత్వం వచ్చాక సీఎం కేసీఆర్‌, ఎమ్మెల్యే ఆల వెంకటేశ్వర్‌రెడ్డి సహకారంతో 4కిలోమీటర్ల బీటీ రోడ్డును రూ.3కోట్లతో నిర్మించడంతో సమస్య తీరింది.
– గోపాల్‌నాయక్‌, నాచారంపేట గ్రామం, కొత్తకోట మండలం

మంచి సౌలత్‌లు వచ్చినయ్‌!
గతంలో అనారోగ్య సమస్య వస్తే సరైన రోడ్డు లేక ఎడ్లబండిపై గోపాల్‌పేటకు వచ్చేవాళ్లం. తండా నుంచి ఎక్కడికి పోవాలన్న 3 కిలోమీటర్లు ప్రయాణం తప్పనిసరి. వాన పడితే శాన తిప్పలు అయ్యేది. రోడ్డుపై బైక్‌ కూడా పోయేదికాదు. ఇప్పుడు ఆ తిప్పలు లేవు.. కేసీఆర్‌ సర్కారు వచ్చినంక మా తండాకు డాంబర్‌ రోడ్డు వచ్చింది. ఎంత రాత్రి అయినా ఇబ్బంది లేకుండా తండాకు వస్తున్నం. రాకపోకలకు ఏమీ ఇబ్బంది లేదు. – శంకర్‌ నాయక్‌, జింకలబీడుతండా , గోపాల్‌పేట మండలం

పూర్తయిన వంతెనలు

• వనపర్తి నుంచి పెబ్బేర్‌ రహదారిలో రెండు బ్రిడ్జీలు రూ.3.40 కోట్లతో పూర్తి చేశారు.
• ఖిల్లా ఘణపురం రోడ్డులో కంబాళోద్దీన్‌పూర్‌ రహదారిలో రూ.2కోట్లతో బ్రిడ్జి పనులను పూర్తి చేశారు.
• పెబ్బేర్‌ నుంచి యాపర్ల రోడ్లులో రూ.2కోట్లతో బ్రిడ్జి పనులను పూర్తి చేశారు. వీటితోపాటు పలు వంతెన నిర్మాణాలు పూర్తి చేయడంతో రవాణా సమస్య తీరింది.