రైస్ మిల్లులో రూ.9.68 కోట్ల ధాన్యం మాయం..! 13 మందిపై కేసు నమోదు

నాగర్‌కర్నూల్ జిల్లాలో సివిల్ సప్లైస్, విజిలెన్స్ అండ్ ఎన్‌ఫోర్స్‌మెంట్ అధికారులు సంయుక్తంగా నిర్వహించిన దాడుల్లో భారీ అవకతవకలు బయటపడ్డాయి.

నార్‌కర్నూల్, అక్టోబర్ 16 : నాగర్‌కర్నూల్ జిల్లాలో సివిల్ సప్లైస్, విజిలెన్స్ అండ్ ఎన్‌ఫోర్స్‌మెంట్ అధికారులు సంయుక్తంగా నిర్వహించిన దాడుల్లో భారీ అవకతవకలు బయటపడ్డాయి. నాగర్‌కర్నూల్ పట్టణ శివారులోని ఓ పార్‌బాయిల్డ్ ఇండస్ట్రీస్ రైస్ మిల్లులో అధికారులు బుధవారం ఆకస్మిక తనిఖీలు చేపట్టారు. ప్రభుత్వం సివిల్ సప్లైస్ ద్వారా కస్టమ్ మిల్లింగ్ కోసం ఇచ్చిన వరి ధాన్యాన్ని మిల్లు యాజమాన్యం అక్రమంగా తరలించినట్లు అధికారులు గుర్తించారు. రికార్డుల్లో ఉండాల్సిన ధాన్యానికి, మిల్లులో భౌతికంగా ఉన్న ధాన్యానికి మధ్య భారీ తేడా ఉంది. కొరతగా గుర్తించిన ధాన్యం విలువ సుమారు రూ.9.68 కోట్లు గా అధికారులు అంచనా వేశారు. ఈ ధాన్యాన్ని బహిరంగ మార్కెట్ లో అమ్ముకుని సొమ్ము చేసుకున్నట్లు ప్రాథమిక విచారణలో తేలింది.

13 మందిపై కేసు..

ఈ వ్యవహారంలో మిల్లు యజమానులు, నిర్వాహకులు, సంబంధిత వ్యక్తులు కలిపి మొత్తం 13 మందిపై పోలీసులు కేసు నమోదు చేశారు. సివిల్ సప్లైస్ అధికారుల ఫిర్యాదు మేరకు నాగర్ కర్నూల్ పోలీస్ స్టేషన్ లో Essential Commodities Act కింద కేసు నమోదైంది. నిందితులను అదుపులోకి తీసుకుని విచారిస్తున్నట్లు పోలీసులు తెలిపారు. వానకాలం సీజన్ లో రైతుల నుంచి కొనుగోలు చేసిన ధాన్యాన్ని కస్టమ్ మిల్లింగ్ కోసం జిల్లాలోని పలు రైస్ మిల్లులకు కేటాయించారు.

నిబంధనల ప్రకారం ధాన్యాన్ని బియ్యంగా మార్చి తిరిగి ప్రభుత్వానికి అప్పగించాలి. కానీ ఈ మిల్లులో మాత్రం ధాన్యం మాయమైంది.  జిల్లాలో మిగతా రైస్ మిల్లుల్లో కూడా ఇలాంటి తనిఖీలు కొనసాగిస్తామని, అక్రమాలకు పాల్పడితే కఠిన చర్యలు తప్పవని విజిలెన్స్ అండ్ ఎన్‌ఫోర్స్‌మెంట్ అధికారులు హెచ్చరించారు.జిల్లాలో ఒకేసారి రూ.9.68 కోట్ల ధాన్యం కొరత బయటపడటం జిల్లా వ్యాప్తంగా సంచలనంగా మారింది.