Odisha teacher 14 days in ditch | కొండచరియలు విరుగడంతో గుంతలో చిక్కుకున్న టీచర్‌.. 14 రోజుల తర్వాత గుర్తించిన కాపరి

Odisha teacher 14 days in ditch | కొండచరియలు విరిగిపడటంతో ఒక ఉపాధ్యాయుడు పొరపాటున ఒక గుంతలో చిక్కుకుపోయాడు. బయటకు రాలేక సహాయం ఆయన కోసం కేకలు వేసినప్పటికీ ఫలితం లేకపోయింది. 14 రోజుల తర్వాత ఒక పశువుల కాపరి ఆ టీచర్‌ను గుర్తించడంతో స్థానికులు రక్షించారు.

భువనేశ్వర్‌: కొండచరియలు విరిగిపడటంతో ఒక ఉపాధ్యాయుడు పొరపాటున ఒక గుంతలో చిక్కుకుపోయాడు. బయటకు రాలేక సహాయం ఆయన కోసం కేకలు వేసినప్పటికీ ఫలితం లేకపోయింది. 14 రోజుల తర్వాత ఒక పశువుల కాపరి ఆ టీచర్‌ను గుర్తించడంతో స్థానికులు రక్షించారు. (Odisha teacher 14 days in ditch) ఒడిశాలోని కంధమాల్ జిల్లాలో ఈ సంఘటన జరిగింది. అక్టోబర్ 29న రాత్రి వేళ ఎడతెరిపి లేకుండా వర్షం కురిసింది. కొండచరియలు విరిగిపడటంతో దంగాసి గ్రామ ప్రజలు తమ ప్రాణాలు కాపాడుకునేందుకు పొరుగున ఉన్న దుబా గ్రామం వైపు పరుగులుతీశారు.

కాగా, ఇంద్రగఢ్ పంచాయతీలోని ఒక పాఠశాలలో ఉపాధ్యాయుడిగా మోహన్ మహారాణా పనిచేస్తున్నాడు. ఆ రోజున రాత్రి వేళ దంగాసి గ్రామం వైపు ఆయన వెళ్తుండగా కొండచరియలు విరిగిపడ్డాయి. చీకటిలో పొరపాటున కొండ సమీపంలోని ఒక కందకంలో ఆ టీచర్‌ పడిపోయాడు. ఒక గుంతలో ఆయన చిక్కుకుపోయాడు. చుట్టుపక్కల ఎవరూ లేకపోవడంతో సహాయం కోసం ఆయన చేసిన అరుపులు ఎవరికీ వినిపించలేదు. దీంతో 14 రోజుల పాటు ఆ గుంతలోనే ఉంచిపోయాడు.

మరోవైపు ఉపాధ్యాయుడు మోహన్ మహారాణా కనిపించకపోవడంతో ఆయన కుటుంబ సభ్యులు ఆందోళన చెందారు. వర్షం తగ్గిన తర్వాత ఆయన కోసం వెతికారు. ఫలితం లేకపోవడంతో పోలీసులకు ఫిర్యాదు చేశారు. దీంతో మిస్సింగ్‌ కేసు నమోదు చేసిన పోలీసులు కూడా ఆ టీచర్‌ కోసం వెతకడం ప్రారంభించారు.

అయితే నవంబర్‌ 14న కొండచరియలు విరిగిపడిన దంగాసి గ్రామం సమీపంలో పశువుల మందను తీసుకెళ్తున్న ఒక కాపరికి అక్కడి కందకం నుంచి బలహీనమైన స్వరం వినిపించింది. అతడు అక్కడకు వెళ్లి చూడగా 14 రోజుల పాటు గుంతలో చిక్కుకున్న టీచర్‌ మోహన్‌ కనిపించాడు. ఆ కాపరి వెంటనే గ్రామస్తులను అప్రమత్తం చేశాడు.

కాగా, గ్రామస్తులు అక్కడకు చేరుకున్నారు. గుంతలో చిక్కుకున్న ఆ ఉపాధ్యాయుడ్ని బయటకు తీశారు.
తాత్కాలికంగా తయారుచేసిన స్ట్రెచర్‌పై 18 కిలోమీటర్ల దూరం మోసుకెళ్లి ఆసుపత్రిలో చేర్చారు. దీంతో డాక్టర్లు ఆయనకు చికిత్స అందిస్తున్నారు. అయితే 14 రోజుల పాటు ఏమీ తినకుండా ఆకలితో ఉండటం, బురద నీటిని తాగడం వల్ల ఆ టీచర్‌ ఆరోగ్య పరిస్థితి విషమంగా ఉన్నట్లు తెలుస్తున్నది.