బకాయిలు చెల్లించలేదనే సాకుతో

రుణ గ్రహీతలు బకాయిలు చెల్లించలేదనే సాకుతో వారి వాహనాలను స్వాధీనం చేసుకోవడానికి రౌడీలను ఉపయోగించే అధికారం ఫైనాన్స్‌ సంస్థలకు లేదని అలహాబాద్‌ హైకోర్టు స్పష్టం చేసింది.

• రౌడీలతో వాహనాల స్వాధీనం వద్దు
• ఫైనాన్స్‌ సంస్థలకు హైకోర్టు హెచ్చరిక

ప్రయాగ్‌రాజ్‌: రుణ గ్రహీతలు బకాయిలు చెల్లించలేదనే సాకుతో వారి వాహనాలను స్వాధీనం చేసుకోవడానికి రౌడీలను ఉపయోగించే అధికారం ఫైనాన్స్‌ సంస్థలకు లేదని అలహాబాద్‌ హైకోర్టు స్పష్టం చేసింది. బలప్రయోగం చేసే చట్టబద్ధ అధికారం ప్రభుత్వానికి ఉంటుందని, ఆ అధికారాన్ని ప్రైవేట్‌ పార్టీకి అప్పగించరాదని వివరించింది. రుణం తీసుకుని కొనుగోలు చేసిన వాహనాన్ని తిరిగి స్వాధీనం చేసుకునే ఒప్పంద హక్కును సివిల్‌ కోర్టు లేదా ఆర్బిట్రేటర్‌ వంటి చట్టబద్ధ వేదికల ద్వారా మాత్రమే అమలు చేయాలని తెలిపింది. సదాబ్‌ అహ్మద్‌ దాఖలు చేసిన రిట్‌ పిటిషన్‌ను అనుమతిస్తూ, వాహనాన్ని ఎలాంటి షరతులు లేకుండా వెంటనే ఆయనకు అప్పగించాలని ఆదేశించింది.

ఖర్చుల కింద రూ.10,000 చెల్లించాలని ఫైనాన్స్‌ సంస్థను ఆదేశించింది. పీనల్‌ వడ్డీ లేకుండా రుణాన్ని పునర్వ్యవస్థీకరించాలని ఆదేశించింది. సదాబ్‌ అహ్మద్‌ 2023 డిసెంబర్‌లో హెచ్‌డీబీ ఫైనాన్షియల్‌ సర్వీసెస్‌ లిమిటెడ్‌ నుంచి రుణం తీసుకుని టాటా గూడ్స్‌ క్యారియర్‌ కొనుగోలు చేశారు. ఒక్కో వాయిదా రూ.64,059 చొప్పున 45 వాయిదాల్లో చెల్లించేలా రుణ ఒప్పందం కుదిరింది.2026 ఆగస్టు 9న చందౌలీలో సంస్థ తరఫున వచ్చిన వ్యక్తులు తనను అడ్డగించి, తుపాకీతో బెదిరించి వాహనాన్ని తీసుకెళ్లారని, రీపొజిషన్‌ ఇన్వెంటరీపై సంతకం చేయించుకున్నారని పిటిషనర్‌ ఆరోపించారు.