చలికాలం.. ఆరోగ్యం భద్రం

వారం రోజులుగా చలితో ప్రజలు గజగజా వణుకుతున్నారు. దీనికి తోడు తుఫాన్ల కారణంగా వాతావరణం ఒక్కసారిగా మారిపోతుండడంతో వివిధ అనారోగ్య సమస్యలు తలెత్తుతున్నాయి. తెల్లవారుజామునుంచి మంచుకుతోడు చలిగాలులు వీచడంతో మధ్యాహ్నం వరకు కూడా ప్రజలు ఇండ్ల నుంచి బయటకు రావడం లేదు. సాయంత్రం 4 గంటలు దాటిందంటే చాలు చలితో ఉక్కిరిబిక్కిరవుతున్నారు.

• వాతావరణ మార్పులతో చూపుతున్న ప్రభావం
• ఆస్తమా, దీర్ఘకాలిక రోగులు అప్రమత్తంగా ఉండాలి
• కాచి చలార్చిన నీరు, వేడి ఆహారం తీసుకోవాలి
• నిర్లక్ష్యం చేస్తే ఇబ్బందులు తప్పవంటున్న వైద్యులు

వారం రోజులుగా చలితో ప్రజలు గజగజా వణుకుతున్నారు. దీనికి తోడు తుఫాన్ల కారణంగా వాతావరణం ఒక్కసారిగా మారిపోతుండడంతో వివిధ అనారోగ్య సమస్యలు తలెత్తుతున్నాయి. తెల్లవారుజామునుంచి మంచుకుతోడు చలిగాలులు వీచడంతో మధ్యాహ్నం వరకు కూడా ప్రజలు ఇండ్ల నుంచి బయటకు రావడం లేదు. సాయంత్రం 4 గంటలు దాటిందంటే చాలు చలితో ఉక్కిరిబిక్కిరవుతున్నారు. దీంతో ఉదయాన్నే విద్యాలయాలు, ఉద్యోగాలు, వివిధ పనులకు వెళ్లే ప్రజలు అనేక ఇబ్బందులు ఎదుర్కొంటున్నారు. ఆస్తమా, దీర్ఘకాలిక వ్యాధులు ఉన్న వారు చలిప్రభావానికి తోడు మారుతున్న వాతావరణ పరిస్థితులతో అనారోగ్యాల పాలవుతున్నారు. దగ్గు, జలుబు, జ్వరం, చర్మంపై దద్దుర్లు రావడం వంటి సమస్యలు ఉన్న వారు నిర్లక్ష్యం చేయకుండా వైద్యులను సంప్రదించాలని డాక్టర్లు సూచిస్తున్నారు. వృద్ధులు, చిన్నారులు తగిన జాగ్రత్తలు తీసుకోవాలని చెబుతున్నారు.

– మహబూబ్‌నగర్‌ మెట్టుగడ్డ, డిసెంబర్‌ 13

మహబూబ్‌నగర్‌ మెట్టుగడ్డ, డిసెంబర్‌ 13 : మారుతున్న వాతావరణానికి తోడు చలికాలం గజగజా వణికిస్తోంది. తెల్లవారుజామున జనం బయటికి రావాలంటే జంకుతున్నారు. గత పది రోజులుగా చలి తీవ్రత మరింత పెరిగింది. మిట్ట మధ్యాహ్నం కూడా చలి తీవ్రత ఉండడంతో ధీర్ఘకాలిక రోగులకు ఇబ్బందిగా మారింది. దీనికితోడు సీజనల్‌ వ్యాధులు కూడా ప్రబలుతున్నాయి. జలుబు, దగ్గు, గొంతునొప్పి, ప్లూ, జ్వరం, ఆయాసం కేసులు పెరుగుతున్నాయి. ఆస్తమా, సీవోపీడీ, ఆలర్జీ, బ్రంకైటిస్‌, నిమోనియా తదితర శ్వాసకోశ వ్యాధులవారు మరింత ఇబ్బందులు పడుతున్నారు. రోగనిరోధక శక్తి తక్కువగా ఉన్న వారిపై వైరస్‌ త్వరగా ప్రభావం చూపుతుందని వైద్యులు చెబుతున్నారు. తగిన జాగ్రత్తలు తీసుకోవాలని హెచ్చరిస్తున్నారు.

వాతావరణ మార్పులతో అలర్జీ..

శీతల వాతావరణం కారణంగా పలువురు అలర్జీ ఎక్కువగా ఉన్న వారు బ్రాంకైటిస్‌ బారినపడుతున్నారు. ఇలాంటి పరిస్థితుల్లో వైరస్‌ శక్తివంతమవుతుందనీ వైద్యులు అంటున్నారు. దగ్గు, ఆయాసం, శ్వాస తీసుకోవడంలో ఇబ్బందులు తలెత్తున్నాయి. ఐదారు రోజుల్లో తగ్గే జబ్బు, అలర్జీ ప్రస్తుతం రెండువారాలు ఉంటోందని, పలు జగ్రత్తలు తీసుకోవాలని చెబుతున్నారు.

పొడిబారుతున్న చర్మం..

చల్లటి గాలులకు చర్మం పొడిబారుతున్నది. పెదవులు పగిలిపోయి ముఖం కాంతిహీనంగా మారుతోంది. అరికాళ్లు పగిలి ఇబ్బంది పడుతున్నారు. శరీరంలో తేమశాతం తగ్గిపోవడంతో ఈ పరిస్థితి ఏర్పడుతోంది. దురదలు కూడా ఎక్కువ అవుతున్నాయి. ఈ తరహా సమస్యలు మధుమేహం రోగులకు వస్తే ఇబ్బందులు ఉంటాయని, త్వరగా నయంకాకపోవడం వల్ల ఇన్ఫెక్షన్‌ పెగరుతోందని వైద్యులు అంటున్నారు.

నిర్లక్ష్యం వహిస్తే ఇన్ఫెక్షన్‌..

ఆస్తమా, నిమోనియా, సివోపీడీ, గుండె వ్యాధులతో బాధపడేవారికి చలికాలం కష్టకాలమని వైద్యులు పేర్కొంటారు. చల్లటి ప్రదేశంలో తిరిగినా, చల్లటి ఆహారం తీసుకున్నా, ఏసీ గదుల్లో ఉన్నా అస్తమా పెరుగుతుందన్నారు. నిర్లక్ష్యం చేస్తే ఇన్ఫెక్షన్‌ అయ్యే ప్రమాదముంది. వైద్యం ఆలస్యమైతే క్రమేణా ఊపిరితిత్తుల్లోకి నీరు చేరుతుంది. దీంతో ఊపిరితిత్తుల్లోని పొరలు ఉబ్బిపోయి శ్వాస కష్టంగా మారుతుందని డాక్టర్లు హెచ్చరిస్తున్నారు.

తీసుకోవాల్సిన జాగ్రత్తలు..

• పొగమంచు బారిన పడకుండా ఉండడానికి ఉదయం మాస్క్‌లు ధరించాలి.
• దగ్గు, జలుబ్బు, ప్ల్యూ, జ్వరం ఉంటే ఇంటి వద్దనే విశ్రాంతి తీసుకోవాలి.
• మధుమేహం, గుండెజబ్బులు ఉన్నవారికి జాగ్రత్తలు తప్పనిసరి.
• శరీరం పొడిబారకుండా, తడిగా ఉండేలా చూసుకోవాలి.
• వైద్యుల సలహా మేరకు వైరస్‌ను నియంత్రించే వ్యాక్సిన్‌ను వేయించుకోవాలి.
• గోరువెచ్చని నీటితో స్నానం చేయాలి. బాగావేడిగా ఉన్న నీళ్లు వాడకూడదు.
• వాహనాలు నడిపే వారు చేతులకు గ్లౌజ్‌లు వేసుకోవాలి.
• జ్వరం, దగ్గు, జలుబు వంటి సమస్యలుంటే నిర్లక్ష్యం చేయకుండా వైద్యుడిని సంప్రదించాలి.
• పొగతాగే వారికి దగ్గరగా వెళ్లకూడదు. ఏసీ గదుల్లో, చల్లటి గాలి తగలకుండా చూసుకోవాలి.

నిర్లక్ష్యం చేయొద్దు

శ్వాసకోశ, ఈఎన్‌టీ సమస్యలున్న వారు చలికాలంలో జాగ్రత్తగా ఉండాలి. నీటిని కాచి, చల్లార్చి వడపోసుకుని తాగాలి. వెచ్చని దుస్తులు ధరించాలి. శరీరం పూర్తిగా కప్పి ఉం డేలా జాగ్రత్తలు తీసుకోవాలి. చల్లటి పానీయాలు, ఐస్‌క్రీమ్‌ తినవద్దు. ఫ్రిజ్‌ నీళ్లు అసలు తాగవద్దు. వేడి ఆహారమే తీసుకోవాలి.

– డాక్టర్‌ వంశీ, జనరల్‌ మెడిసిన్‌,ప్రభుత్వ జనరల్‌ దవాఖాన, మహబూబ్‌నగర్‌