Visit:
మహబూబ్‌నగర్‌ అర్బన్‌, నవంబర్‌ 29 : తెలంగాణ రాష్ట్ర సాధన కోసం కేసీఆర్‌ ప్రాణాలకు తెగించి పోరాటం చేయడంతోనే రాష్ట్రం సిద్ధించిందని మాజీ మంత్రి శ్రీనివాస్‌గౌడ్‌ అన్నారు. రాష్ట్రం సాధించాలనే లక్ష్యంగా కేసీఆర్‌ ఆమరణ నిరాహార దీక్ష చేపట్టి నేటికి 16ఏండ్లు పూర్తి చేసుకున్న సందర్భంగా శనివారం ఆర్‌అండ్‌బీ అతిథి గృహం సమీపంలోని అమరవీరుల స్తూపానికి మాజీ మంత్రి శ్రీనివాస్‌గౌడ్‌, బీఆర్‌ఎస్‌ జిల్లా అధ్యక్షుడు లక్ష్మారెడ్డి నాయకులు, కార్యకర్తలతో కలిసి నివాళులర్పించారు. అనంతరం బీఆర్‌ఎస్‌ పార్టీ జిల్లా కార్యాలయంలో నిర్వహించిన దీక్షా దివస్‌లో శ్రీనివాస్‌గౌడ్‌ మాట్లాడుతూ.. ఉమ్మడి రాష్ట్రంలో ఉద్యమాన్ని స్వరాష్ట్ర సాధన కోసం సాగిన ఉద్యమంలో అనేక ఆటుపోట్లు ఎదుర్కొనట్లు తెలిపారు. బెదిరింపులకు పాల్పడినా భయపడకుండా కేసీఆర్‌ వెంట ఉండి ఉద్యమంలో పాల్గొన్నట్లు గుర్తుచేశారు. ఎన్నో అవమానాలు.. దోపిడీలను ఎదుర్కొని రాష్ట్ర సాధనే లక్ష్యంగా పోరాటాలు చేసినట్లు తెలిపారు.
తాగు, సాగు నీరు, కరెంట్‌ లేక ఉపాధి లేక వలసలు వెళ్లే దుస్థితి ఉండేదన్నారు. ముంబాయికి ప్రత్యేక బస్సులు నడిపించారన్నారు. పాఠశాలలు, కళాశాలలో వసతులు ఉండేవి కాదని వెల్లడించారు. స్వరాష్ట్ర సాధన కోసం కేసీఆర్‌ పదవులను లెక్కచేయలేదని, సిద్ధిపేట సభలో ప్రాణాలను సైతం ఫణంగా పెట్టి ఆమరణ నిరాహార దీక్ష చేస్తున్నట్లు ప్రకటించి స్వరాష్ట్ర సాధన కలను సాకారం చేశారన్నారు. అమరుల త్యాగాలు, అన్నివర్గాల పోరాటం, కేసీఆర్‌ పట్టువిడవని దీక్షతో తెలంగాణ రాష్ట్రం ఏర్పడిందన్నారు. కొట్లాడి సాధించుకున్న రాష్ర్టాన్ని నిబద్ధతతో కేసీఆర్‌ సర్కారు పదేండ్లలోనే దేశానికే రోల్‌ మాడల్‌లా తీర్చిదిద్దారని గుర్తుచేశారు. కాంగ్రెస్‌ చేతగాని పాలనతో అభివృద్ధి రెండేండ్లలోనే ఐదేండ్లు వెనక్కి వెళ్లిందని.. రానున్న ఎన్నికల్లో ప్రజలే తగిన బుద్ధి చెప్పేందుకు సిద్ధంగా ఉన్నారన్నారు.
మళ్లీ కేసీఆర్‌ ముఖ్యమంత్రి కావాలని ప్రజలంతా కోరుకుంటున్నట్లు పేర్కొన్నారు. స్థానిక సంస్థల ఎన్నికల్లో బీఆర్‌ఎస్‌ మద్దతుదారులను గెలిపించుకొని గులాబీ పార్టీ సత్తాచాటాలని పిలుపునిచ్చారు. అనంతరం మాజీ మంత్రి లక్ష్మారెడ్డి మాట్లాడుతూ.. కేసీఆర్‌ నాయకత్వంలో కలిసికట్టుగా పోరాటం చేసి తెలంగాణ రాష్ర్టాన్ని సాధించుకున్నామని తెలిపారు. 2009లో కేసీఆర్‌ను మహబూబ్‌నగర్‌ ఎంపీగా గెలిపించుకొని తెలంగాణవాదాన్ని బతికించుకున్నామని తెలిపారు. అప్పట్లో ఉద్యోగ నేతగా శ్రీనివాస్‌గౌడ్‌, జడ్చర్ల శాసన సభ్యుడిగా తానూ నేతలకు అండగా నిలబడ్డామన్నారు. కార్యక్రమంలో కార్పొరేషన్‌ మాజీ చైర్మన్లు వెంకటేశ్వర్‌రెడ్డి, వాల్యానాయక్‌, ఇంతియాజ్‌ ఇసాక్‌, గ్రంథాలయ సంస్థ మాజీ చైర్మన్‌ రాజేశ్వర్‌గౌడ్‌, మున్సిపల్‌ మాజీ చైర్మన్‌ నర్సింహులు, ముడా మాజీ చైర్మన్‌ వెంకన్న, జెడ్పీ మాజీ వైస్‌ చైర్మన్‌ యాదయ్య, పార్టీ పట్టణ అధ్యక్షుడు శివరాజ్‌, సుధాకర్‌, ప్రణీల్‌చందర్‌, నరేందర్‌, బాలరాజు తదితరులు పాల్గొన్నారు.
