కులవృత్తులను ప్రోత్సహించేందుకు ప్రభుత్వం ప్రకటించిన రూ.లక్ష సాయంపై లబ్ధిదారులు గంపెడాశలు పెట్టుకున్నారు. కులవృత్తులే జీవనాధారంగా బతుకెళ్లదీస్తున్న వెనుకబడిన తరగతుల వారికి ఆర్థిక చేయూతనిచ్చేందుకు పూర్తి సబ్సిడీతో రూ.లక్ష అందజేయనున్నట్లు ప్రభుత్వం ప్రకటించిన నేపథ్యంలో పెద్దఎత్తున దరఖాస్తులు పెట్టుకున్నారు.

• కులవృత్తిదారులకు ప్రభుత్వ ప్రోత్సాహం
• రూ.లక్ష ఆర్థిక సాయానికి వనపర్తి జిల్లాలో 11,843 దరఖాస్తులు
• లబ్ధిదారుల ఎంపికకు ఆదేశాలు
• వరుస క్రమంలో ఆర్థికసాయం పంపిణీకి ప్రణాళిక
• కులవృత్తిదారుల్లో పెరిగిన నమ్మకం

పెబ్బేరు, జూన్‌ 26 : కులవృత్తులను ప్రోత్సహించేందుకు ప్రభుత్వం ప్రకటించిన రూ.లక్ష సాయంపై లబ్ధిదారులు గంపెడాశలు పెట్టుకున్నారు. కులవృత్తులే జీవనాధారంగా బతుకెళ్లదీస్తున్న వెనుకబడిన తరగతుల వారికి ఆర్థిక చేయూతనిచ్చేందుకు పూర్తి సబ్సిడీతో రూ.లక్ష అందజేయనున్నట్లు ప్రభుత్వం ప్రకటించిన నేపథ్యంలో పెద్దఎత్తున దరఖాస్తులు పెట్టుకున్నారు. గడువు సమయం సరిపోక చాలామంది నిరాశ చెందినప్పటికీ..జిల్లా వ్యాప్తంగా 11,843మంది దరఖాస్తు చేసుకున్నట్లు అధికారులు చెబుతున్నారు. అలాగే లబ్ధిదారుల ఎంపిక చేపట్టాలని, వచ్చేనెల 15న మొదటి విడుతగా సాయం అందించేందుకు ప్రణాళిక రూపొందించాలని ప్రభుత్వం అధికారులను ఆదేశించింది. దరఖాస్తుల వెల్లువను దృష్టిలో పెట్టుకొని (సీరియల్‌ నంబర్‌ ప్రకా రం) లబ్ధిదారులను ఎంపిక చేయాలని, ఇందుకు అనుసరించాల్సిన విధి విధానాలను సూచించింది. క్షేత్రస్థాయిలో పరిశీలించి ఎంపిక ప్రక్రియను పూర్తి చేయాలని పేర్కొంది.

ఇవీ మార్గదర్శకాలు..

• మండలస్థాయిలో ఎంపీడీవోలు, మున్సిపల్‌ కమిషనర్లు ఓబీఎంఎంఎస్‌ వైబ్‌సైట్‌లో దరఖాస్తులను పరిశీలించి అర్హులను గుర్తించాలి.
•  బీసీ కులవృత్తులు, ఎంబీసీలు ఇతర సంప్రదాయ వృత్తుల్లోని వారి జాబితాను వేర్వేరుగా రూపొందించాలి.
• అత్యంత పేదలు, వితంతువులు, ఒంటరి మహిళలు, దివ్యాంగులు, అత్యంత వెనుకబడిన వర్గాలు (ఎంబీసీలు)లకు ప్రాధాన్యం ఇవ్వాలి.
• ఐదేండ్లుగా బీసీ, ఎంబీసీ కార్పొరేషన్‌ పరిధిలో రూ.50వేలకుపైగా విలువైన సంక్షేమ పథకాలు పొందిన వారు ఈ పథకానికి అనర్హులు.
• దరఖాస్తులో పేర్కొన్న చిరునామాలో తప్పనిసరిగా నివాసం ఉండాలి. కుల ధ్రువపత్రంలో పేర్కొన్న కులవృత్తి చేస్తూ ఉండాలి.
• దరఖాస్తుదారుల వయస్సు 2023 జూన్‌ 2 నాటికి 18నుంచి 55ఏండ్ల లోపు ఉండాలి.
• వార్షిక ఆదాయం పట్టణాల్లో రూ.2లక్షలు, గ్రామీణ ప్రాంతాల్లో రూ.1.5 లక్షలకు మించి ఉండరాదు.
• దరఖాస్తుదారులు గతంలో ఏమైనా సంక్షేమ పథకాలు పొందారా లేదా అని సంబంధిత బీసీ సంక్షేమాధికారులు పరిశీలించి..జాబితాను కలెక్టర్‌ ఆధ్వర్యంలోని జిల్లా ఎంపిక కమిటీలకు పంపిస్తారు.
• కమిటీ అర్హుల ఎంపిక ప్రక్రియను పూర్తి చేసి, జిల్లా ఇన్‌చార్జి మంత్రి ఆమోదంతో విడుతల వారీగా అర్హుల జాబితాను ప్రకటిస్తుంది.
• వివరాలు వైబ్‌సైట్‌తోపాటు మండలస్థాయి కార్యాలయాలు, గ్రామపంచాయితీల్లో అందుబాటులో ఉంచాలి.
• ఎంపికైన లబ్ధిదారులకు ప్రతినెలా 15వ తేదీన జిల్లా, నియోజకవర్గాల వారీగా సీరియల్‌ నెంబర్‌ ప్రకారం ఆర్థికసాయం అందజేస్తారు.
• లబ్ధిదారులు ఆ సొమ్ముతో తమకు అవసరమైన పరికరాలను కొనుగోలు చేసుకోవచ్చు.
• సాయం పొందిన లబ్ధిదారుల యూనిట్లను పరిశీలన, పర్యవేక్షణకు మండలస్థాయి ప్రత్యేకాధికారిని నియమిస్తారు.
• ప్రత్యేకాధికారి, ఎంపీడీవో, ఇతర సిబ్బంది కలిసి యూనిట్లను నెల రోజుల్లోగా పరిశీలించి ఫొటోలు తీసి అప్‌లోడ్‌ చేయాల్సి ఉంటుంది.
• అధికారులు ప్రతి మూడు నెలలకు ఒకసారి చొప్పున రెండేండ్లపాటు యూనిట్ల పనితీరును పరిశీలిస్తారు.

సీఎం కేసీఆర్‌కు రుణపడి ఉంటాం

సంప్రదాయంగా వస్తున్న కులవృత్తులనే జీవనాధారంగా చేసుకొని బతుకుతున్న ఎందరో పేదల గుండెల్లో సీఎం కేసీఆర్‌ చిరస్థాయిగా నిలిచిపోతారు. పూర్తి సబ్సిడీతో రూ.లక్ష సాయం అందిస్తూ కులవృత్తులను ప్రోత్సహించడం సంతోషించదగిన విషయం. వెనుకబాటుతనానికి మారుపేరైన వృత్తులకు పెద్దపీట వేస్తూ ప్రభుత్వం చేయూతనిస్తుండటంతో వృత్తిదారులు ఆర్థికంగా బలోపేతం అవుతారు. లబ్ధిదారులు ప్రభుత్వానికి రుణపడి ఉంటారు.
-ఇటిక్యాల శ్రీకాంత్‌, రజక సంఘం వనపర్తి జిల్లా నాయకుడు

నిబంధనల మేరకు ఎంపిక

ఎంపిక చేసిన కులవృత్తుల వారికి రూ.లక్ష సాయం పంపిణీని నిబంధనలకు అనుగుణంగా నిర్వహిస్తాం. ఇప్పటికే మా శాఖకు మార్గదర్శకాలు జారీ అయ్యాయి. క్షేత్రస్థాయి పరిశీలన అనంతరం ప్రభుత్వ సూచనల మేరకు ప్రక్రియను పూర్తిచేస్తాం. లబ్ధిదారులు ఎలాంటి అపోహలు పెట్టుకోవద్దు. దళారులను ఆశ్రయించొద్దు. అర్హతలు ఉండి సరైన ధ్రువపత్రాలు ఉన్న వారు ఎంపిక అవుతారు. ఇది నిరంతర ప్రక్రియగా ప్రభుత్వం ఇప్పటికే పేర్కొన్న విషయాన్ని అందరూ దృష్టిలో పెట్టుకోవాలి.
– అనిల్‌ప్రకాశ్‌, బీసీ సంక్షేమశాఖ జిల్లా అధికారి, వనపర్తి