పిల్లలకు మెరుగైన జీవితం కోసం.. కొన్ని నియమాలు

పిల్లలకు మెరుగైన జీవితం అందించాలని అందరు తల్లిదండ్రులు కోరుకుంటారు. వారికి కావాల్సినవన్నీ సమకూరుస్తూ.. తమ పని పూర్తయిందని అనుకుంటారు. పిల్లలు కోరినవి అందిస్తూ.. వారిని గొప్పగా పెంచుతున్నామని భావిస్తారు.

పిల్లలకు మెరుగైన జీవితం అందించాలని అందరు తల్లిదండ్రులు కోరుకుంటారు. వారికి కావాల్సినవన్నీ సమకూరుస్తూ.. తమ పని పూర్తయిందని అనుకుంటారు. పిల్లలు కోరినవి అందిస్తూ.. వారిని గొప్పగా పెంచుతున్నామని భావిస్తారు. అయితే.. ఇలాంటి పెంపకం వల్ల పిల్లలు చెడిపోయే ప్రమాదమే ఎక్కువని నిపుణులు హెచ్చరిస్తున్నారు.

అన్నిటికన్నా ముఖ్యంగా పిల్లలకు స్వేచ్ఛ, మార్గదర్శకత్వం అవసరమని చెబుతున్నారు. పెంపకం సరిగా ఉండాలన్నా, పిల్లల భవిష్యత్తు బాగుండాలన్నా.. కొన్ని నియమాలు పాటించాలని సూచిస్తున్నారు.

• పిల్లలు క్రమశిక్షణలో ఉండాలంటే.. మీరు కఠినంగా మారాల్సిన పనిలేదు. తిట్టడం, కొట్టడం వల్ల వారు మరింత మొండిగా తయారయ్యే ప్రమాదం ఉంటుంది. ప్రేమ, ఓర్పుతోనూ వారిని క్రమశిక్షణలో పెట్టొచ్చు. అలాగని.. అతిప్రేమ, గారాబం మంచిదికాదు.
• పిల్లలతో స్నేహితుల్లా మెలగాలి. అప్పుడే మీ దగ్గర ఎలాంటి భయం, బెరుకు లేకుండా ‘ఫ్రీ’గా ఉంటారు. తమ సమస్యలను మీతో చెప్పుకొంటారు. మీరు ఎప్పుడూ కోపంగా ఉంటూ.. వారిపై అరుస్తూ ఉంటే మీతో అంతగా కలిసిపోరు. దాంతో, తమ సమస్యలను ఎవరితో పంచుకోవాలో తెలియక.. లోలోపలే కుమిలిపోతారు. ఇది.. వారి మానసిక ఆరోగ్యంపైనా ప్రభావం చూపుతుంది.
• పిల్లలెప్పుడూ మీ మాటే వింటారు. అప్పుడప్పుడూ వాళ్ల మాటలూ ఆలకించండి. వారి ఆలోచనలు మీతో పంచుకున్నప్పుడు శ్రద్ధగా వినండి. వారి భావాలను గౌరవించండి. దీనివల్ల పిల్లల్లో ఆత్మవిశ్వాసం రెట్టింపవుతుంది. ఇంట్లో తమ ఆలోచనలకూ, మాటలకూ విలువ ఉన్నదని భావిస్తారు. అలాకాకుండా వారు ఏదైనా చెబుతున్నప్పుడు, మీరు పట్టనట్టుగా వ్యవహరిస్తే.. వారి ఆత్మవిశ్వాసం దెబ్బతింటుంది.
• జ్ఞానం అంటే.. పుస్తకాల నుంచి వచ్చిందే కాదు. అనుభవాల నుంచి నేర్పించడం కూడా ముఖ్యమే! జీవితంలో ఎదురయ్యే సవాళ్లు, వాస్తవాలను వారికి తెలియజేయాలి.
• ప్రతి పిల్లవాడికీ తనకే ప్రత్యేకమైన అభిరుచి, ఆసక్తి ఉంటాయి. వాటిని గుర్తించి.. ఆయా రంగాల్లో వారిని ప్రోత్సహించాలి. అప్పుడే పిల్లలు జీవితంలో ఉన్నత స్థాయికి ఎదుగుతారు. అలాకాకుండా.. మీ కోరికలు పిల్లలపై రుద్దకూడదు.