పగటి కునుకు ప్రయోజనకరం

కొందరు మధ్యాహ్నం పూట ఓ పావు గంట - అర్ధగంట కునుకు తీస్తుంటారు. ఇంట్లో ఉన్నా.. ప్రయాణాల్లో అయినా.. కాసేపు నిద్రలో జోగుతుంటారు.

కొందరు మధ్యాహ్నం పూట ఓ పావు గంట – అర్ధగంట కునుకు తీస్తుంటారు. ఇంట్లో ఉన్నా.. ప్రయాణాల్లో అయినా.. కాసేపు నిద్రలో జోగుతుంటారు. ఇలాంటి పగటి నిద్ర మంచిదేనని నిపుణులు అంటున్నారు. మానసిక స్థితిని మెరుగుపరచడంతోపాటు ఆరోగ్యానికీ భరోసా ఇస్తుందని చెబుతున్నారు.

• పగటినిద్ర.. ఒత్తిడిని చిత్తు చేస్తుంది. హృద్రోగ సమస్యలనూ దూరం చేస్తుంది. మధ్యాహ్న భోజనం తర్వాత కాసేపు కునుకు తీయడం వల్ల గుండె ఆరోగ్యం మెరుగుపడుతుందని జర్నల్‌ ఆఫ్‌ అమెరికా హార్ట్‌ అసోసియేషన్‌ అధ్యయనంలో తేలింది.
• మధ్యాహ్నం కాసేపు నిద్రపోవడం వల్ల మెదడుకు విశ్రాంతి దొరుకుతుంది. ఆఫీస్‌లో పని ఒత్తిడి ఎక్కువగా ఉండేవారు భోజన విరామంలో చిన్నగా కునుకు తీయడం మంచిది. ఓ 15 – 20 నిమిషాల నిద్ర మెదడు ఆరోగ్యంపై సానుకూల ప్రభావం చూపుతుంది. పని ఒత్తిడి తగ్గుతుంది. శారీరకంగా, మానసికంగా కొత్త ఉత్సాహం వస్తుంది. పనిలో నాణ్యతతోపాటు ఉత్పాదకత కూడా పెరుగుతుంది.
• పగటి నిద్ర జ్ఞాపకశక్తినీ పెంచుతుంది. ముఖ్యంగా విద్యార్థులు మధ్యాహ్నం పూట ఓ 15 – 20 నిమిషాలు పడుకుంటే.. జ్ఞాపకశక్తి మెరుగుపడుతుందని నిపుణులు చెబుతున్నారు. సృజనాత్మక ఆలోచనలూ పెరుగుతాయని అంటున్నారు.
• మధ్యాహ్నం నిద్రపోవడం వల్ల జీర్ణశక్తి మెరుగుపడుతుంది. కడుపుబ్బరం, మలబద్ధకం, గ్యాస్ట్రిక్‌ సమస్యల నుంచి ఉపశమనం లభిస్తుంది.
• మధ్యాహ్నం నిద్ర వల్ల హార్మోన్ల అసమతుల్యత దూరం అవుతుంది. దాంతో.. థైరాయిడ్‌, పీసీఓఎస్‌, మధుమేహం, స్థూలకాయం.. వంటి దీర్ఘకాలిక సమస్యలు అదుపులో ఉంటాయి.
• శరీరం నీరసంగా ఉన్నట్టయితే.. పగటిపూట కాసేపు కునుకు తీయడం మంచిది. నిద్ర వల్ల శరీరం పునరుత్తేజితం అవుతుంది. ఆరోగ్య సమస్యల నుంచి బయటపడుతుంది.

అయితే.. పగటిపూట ఎప్పుడుపడితే అప్పుడు నిద్ర పోవద్దు. ముందుగా.. నిద్ర కోసం సరైన సమయాన్ని కేటాయించుకోవాలి. దాన్ని ప్రతిరోజూ అనుసరించాలి. సమయం మారితే.. రాత్రి నిద్రపై ప్రభావం పడుతుంది.