ఆనందమే.. అసలైన ఆస్తి

‘ఆనందంగా జీవించడమే.. అసలైన ఆస్తి’ అని పెద్దల మాట. సంపదలో సంతోషాన్ని వెతుక్కోవడం.. ఆ కొండ కరిగితే కుంగిపోవడం మూర్ఖులు చేసే పని. అయితే, ఆ ఆనందం అనేది అద్దె వస్తువేమీ కాదు. మనసు పెడితే దాన్ని ఎవరికి వారే సృష్టించు కోవచ్చు.

‘ఆనందంగా జీవించడమే.. అసలైన ఆస్తి’ అని పెద్దల మాట. సంపదలో సంతోషాన్ని వెతుక్కోవడం.. ఆ కొండ కరిగితే కుంగిపోవడం మూర్ఖులు చేసే పని. అయితే, ఆ ఆనందం అనేది అద్దె వస్తువేమీ కాదు. మనసు పెడితే దాన్ని ఎవరికి వారే సృష్టించు కోవచ్చు. సొంత చర్యలతోనే మన జీవితాన్ని సంతోషమయం చేసుకోవచ్చు. అలాంటి ఆనందాన్ని అన్‌లాక్‌ చేయడానికి.. ఈ‘కీ’లకాలను గ్రహించండి.

• జీవితంలో చేయాల్సిన అతి ముఖ్యమైన విషయం.. మిమ్మల్ని మీరు అంగీకరించడం. మీరు ఎలా ఉన్నారో.. అలాగే స్వీకరించడం. లావు-సన్నం, తెలుపు-నలుపు, పొట్టి-పొడుగు.. ఇవన్నీ బయటికి కనిపించే లక్షణాలే! మీ మనసు లోతుల్లో ఉండేదే.. అసలైన మీరు. అందుకే.. బాహ్యసౌందర్యం గురించి ఎక్కువగా ఆలోచించకండి. పైకి కనిపించే చిన్న లోపానికి కుంగిపోకండి. మీ అంతర్గత సౌందర్యం అందంగా ఉంటే.. మీరు ఆనందంగా ఉన్నట్టే!
• పుట్టుక నుంచి చావు వరకు.. నిరంతరం మీ వెంట ఉండే సహచరుడు మీ శరీరమే! ఆ ప్రియనేస్తాన్ని కాపాడుకోవాల్సిన బాధ్యత మీదే! మీరు మీ శరీరాన్ని జాగ్రత్తగా చూసుకుంటే.. మీ శరీరం మీ ఆరోగ్యానికి రక్షణగా నిలుస్తుంది. అనారోగ్యం పాలైనప్పుడు కూడా త్వరగా కోలుకునేలా చూస్తుంది. ఆరోగ్యకరమైన శరీరాన్ని మించిన సంపద లేదని గుర్తించండి. అది పదికాలాల పాటు పదిలంగా ఉండాలంటే.. దానికి కావాల్సిన పోషకాహారం, సరైన వ్యాయామం అందించండి.
• ఎప్పుడూ మీ గురించే కాకుండా.. మీ చుట్టూ ఉన్నవారి క్షేమం కోసం కూడా ఆలోచించండి. కష్టాల్లో ఉన్నవారిని ఆదుకోవడం, తోచిన సాయం చేయడం లాంటి పనులు.. మీ జీవితాన్ని అర్థవంతంగా మారుస్తాయి. తోటివారికే చేసే సాయం చిన్నదే అయినా.. మీకు ఆనందాన్ని, సంతృప్తినీ ఇస్తుందని గుర్తుంచుకోండి.
• మీ లక్ష్యం నెరవేరిందని తెగ ఆనందపడిపోతూ.. అక్కడే ఆగిపోకండి. ఆ లక్ష్యం.. అందుకోసం చేసిన పోరాటం ఇప్పుడు ఒక చరిత్ర అని తెలుసుకోండి. అందుకే.. మరో సరికొత్త లక్ష్యాన్ని నిర్దేశించుకోండి. లక్ష్య సాధన ఎప్పుడూ ఉరిమే ఉత్సాహాన్ని ఇస్తుంది. దాన్ని సాధించినప్పుడు అంతులేని ఆనందం సొంతం అవుతుంది.
• ఒంటరితనం నుంచి వీలైనంత తొందరగా బయటపడండి. ఒంటరితనం.. నిరాశకు దారితీస్తుంది. అందుకే, స్నేహితులు, బంధువులను తరచూ కలుస్తూ ఉండండి. అప్పుడే.. మీకు ఏదైనా కష్టం కలిగినప్పుడు సహాయపడే స్నేహ బంధాలు బలపడతాయి.