చిరునవ్వుతో జతకడదాం

నవ్వు నాలుగు విధాల చేటు కాదు.. నలభై నాలుగు విధాల గ్రేటు. చిరునవ్వుల తొలకరి విరిసిన ప్రతిసారీ మనసు తేలికపడుతుంది. చుట్టూ ఉన్న వాతావరణం ప్రశాంతంగా మారిపోతుంది.

నవ్వు నాలుగు విధాల చేటు కాదు.. నలభై నాలుగు విధాల గ్రేటు. చిరునవ్వుల తొలకరి విరిసిన ప్రతిసారీ మనసు తేలికపడుతుంది. చుట్టూ ఉన్న వాతావరణం ప్రశాంతంగా మారిపోతుంది. నవ్వుతూ బతికితే ఆయుష్షు పెరుగుతుంది. అందుకే.. ఆరోగ్య సాధనలో నవ్వును మించిన ఔషధం లేదని పెద్దల మాట. మరి చిరునవ్వు ఎన్నేసి ప్రయోజనాలు అందిస్తుందో తెలుసుకుందామా? కాస్త నవ్వుతూ చదివేయండి..

స్మైల్‌ సైన్స్‌..

• డోపమైన్‌, సెరోటోనిన్‌, ఎండార్ఫిన్స్‌ వంటి న్యూరోట్రాన్స్‌మీటర్లు విడుదలయ్యేలా నవ్వు ట్రిగ్గర్‌ చేస్తుంది. అవి మనలోని ఒత్తిడిని దూరం చేసి, మూడ్‌ను మార్చేస్తాయి.
• చిరునవ్వు చాలాసార్లు అవతలి వ్యక్తితో కమ్యూనికేట్‌ చేస్తుంది. అది ఇతరుల నమ్మకాన్ని చూరగొనేందుకు దోహదం చేస్తుంది. వారి తోడ్పాటునూ పొందడానికి సహకరిస్తుంది.
• ఎవరైనా అందంగా నవ్వుతున్నప్పుడు చూస్తే.. ఆ నగవు మనలోని మిర్రర్‌ న్యూరాన్స్‌ను యాక్టివేట్‌ చేస్తుంది. దీంతో మన మోవిపైనా అయాచితంగా ముచ్చటైన నవ్వులు పూస్తాయి.

అర్థాలు వేరులే

• పశ్చిమ దేశాల్లో చిరునవ్వును మర్యాద, ఆత్మవిశ్వాసం, కపటం లేనితనంగా భావిస్తారు.
• తూర్పు దేశాల్లో కూడా చిరునవ్వును మంచితనంగా భావించినా, కొన్నిసార్లు అదే నవ్వును నెగటివ్‌ ఎమోషన్‌గానూ అర్థం చేసుకుంటారట!
• ఏదేమైనా ప్రపంచవ్యాప్తంగా చూసుకుంటే, చిరునవ్వును పాజిటివ్‌ సింబల్‌గా, ఒక కమ్యూనికేషన్‌కి సాధనంగా భావిస్తారు.

నవ్వులు పంచే ఆరోగ్యం..

• గుండె కొట్టుకునే వేగాన్ని చిరునవ్వు తగ్గిస్తుంది. అలాగే రక్తపోటును నియంత్రణలో ఉంచుతుంది. అలా నవ్వు గుండెకు రక్షణ కవచంలా పనిచేస్తుంది.
• ఎప్పుడూ నవ్వుతూ ఉండేవారికి రోగనిరోధక శక్తి ఎక్కువగా ఉంటుందని పరిశోధనలు తేల్చిచెప్పాయి.
• నవ్వినప్పుడు ఎండార్ఫిన్స్‌ అనే హార్మోన్లు విడుదల అవుతాయి. వీటిని నేచురల్‌ పెయిన్‌ కిల్లర్స్‌ అని కూడా అంటారు. అలా నవ్వులు విరిసినప్పుడు శారీరక నొప్పులు తగ్గుముఖం పడతాయి.
• ఎప్పుడూ చిరునవ్వుతో ఉండేవాళ్లను అందరూ ఇష్టపడతారు. అలాంటివాళ్లతో అందరూ స్నేహంగా ఉంటారు. అలా చిరునవ్వు బంధాలను బలపడేలా చేస్తుంది. వ్యక్తుల మధ్యదూరాన్ని తగ్గిస్తుంది.

నవ్వుల వెనుక

• శిశువులు జన్మించిన కొద్ది గంటల్లోనే నవ్వుతారట.
• చిరునవ్వు త్వరగా పక్కవాళ్లకు అంటుకుంటుంది. అందుకే ఇంగ్లిష్‌లో ‘స్మైల్‌ ఈజ్‌ కంటేజియస్‌’ అనే మాట ఉంది. గుంపులో ఉన్నప్పుడు ఒక్కరు నవ్వడం ప్రారంభిస్తే, కొద్దిసేపట్లోనే అందరూ నవ్వేస్తుంటారు.
• మనం నవ్వినప్పుడు ముఖంలో 26 కండరాలు స్పందిస్తాయట!
• చిరునవ్వుల్లో 50 రకాలు ఉంటాయని నిపుణుల మాట.

సహజంగా నవ్వాలంటే..

• అధికారిక సమావేశాల్లో వాతావరణం కాస్త భిన్నంగా ఉంటుంది. అలాంటి సమయాల్లో పెదాలపై చిరునవ్వు కోసం సంతోషాన్ని కలిగించే విషయాలు ఆలోచించాలి, గుర్తు చేసుకోవాలి.
• ఒక్కోసారి అవతలి వాళ్లకు మనం బలవంతంగా నవ్వుతున్నట్టు అనిపించొచ్చు. ముఖ కండరాలను రిలాక్స్‌ చేయడం ద్వారా.. సహజంగా నవ్వేయొచ్చు.
• కళ్లతో నవ్వడం అలవాటు చేసుకోవాలి. ఇందుకోసం కంటి గూడు (ఐ సాకెట్‌)ను కదిలిస్తూ ఉండాలి. అప్పుడే కళ్లతోనూ నవ్వులు రువ్వొచ్చు.
• రోజూ అద్దం ముందు నవ్వడం ప్రాక్టీస్‌ చేయాలి. దానివల్ల మనలో ఆత్మవిశ్వాసం పెరుగుతుంది. అంతేకాదు, మనపై మనకు ఇష్టం కలుగుతుంది.
• హస్యభరితమైన కథలు చదవడం, సినిమాలు చూడటం వల్ల కూడా సెన్స్‌ ఆఫ్‌ హ్యూమర్‌ పెరుగుతుంది. నవ్వడం అలవాటు అవుతుంది. ఇతరులను నవ్వించడమూ అభ్యాసం అవుతుంది.