బలమైన నారుతో అధిక దిగుబడులు

వ్యవసాయ సీజన్‌ ప్రారంభం కావడంతో వరి నారు తయారీపై రైతులు దృష్టి సారించారు. అయితే బలమైన నారుతోనే అధిక దిగుబడులు పొందవచ్చని వ్యవసాయాధికారులు రైతులకు సూచిస్తున్నారు.

• బలమైన నారు తయారీలో మెళకువలు ఎంతో దోహదం
• యాజమాన్య పద్ధతులతో పైరుకు రోగ నిరోధక శక్తి
• ఫలితంగా సాగు ఖర్చులు తక్కువ.. దిగుబడులు ఎక్కువ..
• పంటలో చీడపీడల నివారణకూ బలమైన నారే కీలకం
• రైతులకు వ్యవసాయ శాస్త్రవేత్తలు, అధికారుల సూచనలు

అశ్వారావుపేట, మే 22:వ్యవసాయ సీజన్‌ ప్రారంభం కావడంతో వరి నారు తయారీపై రైతులు దృష్టి సారించారు. అయితే బలమైన నారుతోనే అధిక దిగుబడులు పొందవచ్చని వ్యవసాయాధికారులు రైతులకు సూచిస్తున్నారు. కనీస మెళకువలు పాటించడం ద్వారా నాణ్యమైన వరి నారును తయారు చేసుకోవచ్చని స్పష్టం చేస్తున్నారు. యాజమాన్య పద్ధతులు పాటించటం ద్వారా పైరుకు రోగ నిరోధక శక్తి లభిస్తుందని సూచిస్తున్నారు. వరి సాగులో భద్రాద్రి కొత్తగూడెం జిల్లా మొదటి స్థానంలో ఉంటుంది. జిల్లాలో సాగునీరు పుష్కలంగా అందుబాటులో ఉండడంతో ఏటా వరి సాగు విస్తీర్ణం పెరుగుతోంది. జిల్లాలో ఈ ఏడాది సాగు ప్రణాళిక 6.16 లక్షల ఎకరాలు. ఇందులో వరి ప్రధాన పంటగా 2.15 లక్షల ఎకరాల్లో సాగు కానుంది. రానున్న వానకాలంలో వరి సాగుకు ముందస్తు నారు తయారు చేసుకునేందుకు అన్నదాతలు సిద్ధమవుతున్నారు. ధాన్యం దిగుబడులు ఎక్కువగా సాధించేందుకు బలమైన నారు తయారు చేసుకోవాలని వ్యవసాయ అధికారులు రైతులకు సూచిస్తున్నారు. ఇందుకోసం యాజమాన్య పద్ధతులు పాటిస్తూ వరి నారు తయారు చేసుకోవాలని చెబుతున్నారు. దీని ద్వారా వరి సాగులో చీడపీడల బెడదను నివారించవచ్చని చెబుతున్నారు. నాణ్యమైన నారు తయారీకి వ్యవసాయ శాస్త్రవేత్తలు, అధికారులు పలు యాజమాన్య పద్ధతులు సూచిస్తున్నారు.

విత్తన శుద్ధి..
మెట్ట నారుమడులు ఉంటే కిలో విత్తనానికి 3 గ్రాముల కార్బండిజమ్‌ను తడితో పట్టించాలి. ఆరబెట్టి నారు మడుల్లో చల్లుకోవాలి. దమ్ము చేసిన నారుమడులైతే లీటరు నీటికి 1 గ్రాము కార్బండిజమ్‌ను కలిపిన ద్రావణంలో 24 గంటలు నానబెట్టి తర్వాత మండె కట్టిన మొలకలను నారుమడిలో చల్లుకోవాలి. కిలో విత్తనాలకు లీటరు నీరు సరిపోతుంది. నిద్రావస్థను తొలిగించడానికి లీటరు నీటికి నత్రికామ్లాన్ని కలిపి ఆ ద్రావణంలో 24 గంటలు నానబెట్టాలి. అనంతరం కడిగి మండె కట్టాలి. తక్కువ నిద్రావస్థ (2-3 వారాలు) ఉన్న విత్తనాలైతే 6.3 మిల్లీ లీటర్లు, ఎక్కువ నిద్రావస్థ (4-5 వారాలు) ఉన్న విత్తనాలైతే 10 మిల్లీ లీటర్ల నైట్రిక్‌ యాసిడ్‌ను వినియోగించాలి.

నారుమడి పెంపకం..

• విత్తన మోతాదులో దొడ్డు రకాలైతే ఎకరాకు 25 కిలోలు, సన్నరకం అయితే 20 కిలోల చొప్పున విత్తనాలు అవసరం.
• నారుమడిని బాగా దున్నిన తర్వాత 2 లేదా 3 సార్లు దమ్ము చేసి చదును చేసుకోవాలి. కొంచెం ఎత్తులో నీరు ఉంచడానికి, తీయడానికి వీలుగా కాలువలను ఏర్పాటు చేసుకుంటే మంచిది.
• రెండు గుంటల నారుమడికి 2 కిలోల నత్రజని (విత్తనం చల్లే ముందు కిలో, 12-14 రోజులకు మరో కిలో), కిలో భాస్వరం, కిలో పొటాష్‌నిచ్చే ఎరువులను దుక్కిలో వేయాలి. పశువుల పేడ లేదా సేంద్రియ ఎరువులను దుక్కిలో వేయడం మంచిది.
• మొలక కట్టిన విత్తనాన్ని చల్లి, మొదట్లో (వారం రోజులు) ఆరు సార్లు తడులు ఇచ్చి ఆ తర్వాత మొక్క దశలో పలుచగా (2-3 సెంటీమీటర్లు) నీరు ఉంచాలి.
• జింకు లోప సవరణకు లీటరు నీటికి 2 గ్రాముల జింక్‌ సల్ఫేట్‌ కలిపిన ద్రావణాన్ని పిచికారీ చేయాలి.
• మెట్ట నారుమడిలో ఇనుప ధాతులోపాన్ని గమనిస్తే సరిచేసుకోవాలి.
• నారు సేకరించే సమయంలో ఏడు రోజుల ముందు ఒక్కో గుంట మడికి 400 గ్రాముల కార్బోఫ్యూరన్‌ 3జీ గుళికలు ఇసుకలో కలిపి చల్లుకోవాలి. పలుచగా నీరు ఉంచాలి.
• అవసరాన్ని బట్టి మడిలో ఇతర సస్యరక్షణ చర్యలు తీసుకోవాలి. నాట్లు ఆలస్యమయ్యే ప్రదేశాల్లో రెండో దఫా నత్రజని వేసి నారు ముదరకుండా చూసుకోవాలి. ఈ పరిస్థితుల్లో తామర పురుగులను నివారించుకోవాలి.
• నారుమడిలో బ్యూటాక్లోర్‌ 15 మి.లీ. లేదా ప్రెటిలాక్లోర్‌, సేఫసర్‌ 25 మి.లీ. ఏదైనా ఒక దానికి ఎకరాకు సరిపడా నారుమడికి 5 లీటర్ల నీటిలో కలిపి విత్తిన 8-10 రోజులకు పిచికారీ చేసుకోవాలి. నారుమడిలో గడ్డి జాతి కలుపు ఉంటే విత్తిన 15-20 రోజుల్లోపు లీటరు నీటికి సైహాలోఫాస్‌-పీ-బ్యూలైట్‌ కలుపుమందును 1.5 మి.లీ. కలిపి పిచికారీ చేయాలి.
• ఇలా చేయడం వల్ల నారుమడి ఆ రోగ్యంగా పెరుగుతుంది. నాటు వేసిన తర్వాత రోగాలను తట్టుకుంటుంది. నాణ్యమైన పంట దిగుబడి వస్తుంది.

అధికారుల సూచనలు పాటించాలి..
రైతులు నాణ్యమైన నారు తయారు చేసుకునేందుకు వ్యవసాయాధికారుల సూచనలు పాటించాలి. బలమైన నారు తయారు చేయడం ద్వారా పంటలో రోగ నిరోధక శక్తి పెరుగుతుంది. తద్వారా నాణ్యమైన అధిక దిగుబడులు పొందొచ్చు. లేకుంటే పెట్టుబడి ఖర్చు పెరుగుతుంది. పంట దిగుబడిలో నాణ్యత దెబ్బతింటుంది. వ్యవసాయ శాస్త్రవేత్తలు, వ్యవసాయాధికారులు ఎల్లప్పుడూ రైతులకు అందుబాటులో ఉంటారు. వారి సూచనల మేరకు యాజమాన్య పద్ధతులు పాటిస్తే మంచి ఫలితాలు వస్తాయి.
–వై.నవీన్‌, మండల వ్యవసాయ అధికారి, అశ్వారావుపేట