Visit:
కూసుమంచి (నేలకొండపల్లి), నవంబర్‌ 30 : ‘అన్నా.. రైతులుగా వ్యవసాయం చేసి ప్రతీ ఒక్కరికీ అన్నం పెడుతున్నామన్నా. రైతుల కష్టాలను చూడాలని ప్రతి ఒక్కరినీ వేడుకుంటున్నానన్నా. ఈ వ్యవసాయంలో ఎన్నో నష్టాలు, ఎన్నో కష్టాలు ఉన్నాయన్నా. పంటలకు ధరల్లేక ఎన్నో ఇబ్బందులు పడుతున్నామన్నా. ఈ నష్టాన్ని ఎవరూ పూడ్చలేరన్నా. ప్రభుత్వమే ఆదుకోవాలన్నా. రైతుల కష్టాన్ని గుర్తించి వారు పండిస్తున్న పంటలకు గొప్ప రేట్లు ఇవ్వాలన్నా. వారిని ఆదుకోవాలన్నా. కౌలు రైతులకు కూడా సబ్సిడీలు ఇవ్వాలన్నా. భూమిని కౌలుకు ఇచ్చిన రైతులు కూడా.. కౌలు కట్టలేని రైతులను ఆదుకోవాలన్నా. వాళ్లను అర్థం చేసుకోవాలన్నా.’ అంటూ కౌలు రైతు వీరన్న ఆవేదన వ్యక్తం చేశాడు. పురుగులమందు తాగుతూ అతడు తీసుకున్న సెల్ఫీ వీడియో ప్రతి ఒక్కరినీ కలిచివేసింది.
పదిన్నర ఎకరాల్లో నాలుగు పంటలు సాగుచేసినా నష్టాలు రావడంతో కౌలు రైతు బలవన్మరణం పొందిన విషాదకర ఘటన ఖమ్మం జిల్లా నేలకొండపల్లి మండలంలో చోటుచేసుకుంది. సదరు రైతు శనివారం పురుగులమందు ఆత్మహత్యాయత్నం చేయగా.. చికిత్స పొందుతూ ఆదివారం కన్నుమూశాడు. గ్రామస్తులు, కుటుంబ సభ్యుల కథనం ప్రకారం.. ఖమ్మం జిల్లా నేలకొండపల్లి మండలం శంకరగిరి తండాకు చెందిన బానోత్‌ వీరన్న (40) వ్యవసాయ భూమిలేని పేద గిరిజన కౌలు రైతు. పొరుగునే ఉన్న కూసుమంచి మండలం మునిగేపల్లి రెవెన్యూలో ఓ రైతు వద్ద ఐదున్నర ఎకరాలను కౌలుకు తీసుకొని వరి, పత్తి వేశాడు. నేలకొండపల్లి మండలంలోని మోటాపురంలో మరో రైతు వద్ద నాలుగు ఎకరాలు కౌలుకు తీసుకొని పత్తి, చెరకు వేశాడు. ఇదే గ్రామంలోని ఇంకో రైతు వద్ద మరో ఎకరం కౌలుకు తీసుకొని మిర్చి పంట వేశాడు.
భూముల కౌలు సహా పంటల పెట్టుబడికి కలిపి మొత్తం రూ.15 లక్షల వరకు అప్పులు చేశాడు. ఈ క్రమంలో ఇటీవల తుపాన్ల వల్ల పంటలు పూర్తిగా దెబ్బతిన్నాయి. కొన్ని పంటలు కొద్దోగొప్పో చేతికొచ్చినా వాటికి సరైన ధర పలక లేదు. పదిన్నర ఎకరాలు కౌలుకు తీసుకొని రేయింబవళ్లూ చెమటోడ్చి నాలుగు రకాల పంటలు సాగుచేసినా ఒక్క పంట కూడా చేతికి రాకుండాపోయింది. తుపాన్లు, అధిక వర్షాలు, వరదలు వంటివి పంటలను తుడిచిపెట్టుకుపోయాయి. దిగుబడి అనే మాటే లేకుండా పోయింది. కాస్తోకూస్తో వచ్చిన దిగుబడికి గిట్టుబాటు ధర కూడా రాలేదు. అతడు పెట్టిన పెట్టుబడికీ ఆ దిగుబడికీ పొంతనే లేదు. దీంతో కౌలు రైతు వీరన్న గుండె చెరువైంది. కానీ, పెట్టుబడులు, ఖర్చులు కలిపి కళ్లముందే రూ.15 లక్షల అప్పులు కన్పిస్తున్నాయి. పదిన్నర ఎకరాల్లో కౌలు వ్యవసాయం చేసి ఇంతలా చెమటోడ్చినా దిగుబడి రాకపోగా అప్పులు మిగిలాయన్న ఆవేదనతో మనస్తాపానికి గురయ్యాడు.
ఇదే మనోవేదనతో పురుగులమందు డబ్బా తీసుకొని శనివారం తాను కౌలుకు తీసుకున్న పొలం వద్దకు వెళ్లాడు. ఆ పొలంలోనే పురుగులమందు తాగుతూ సెల్ఫీ వీడియో తీసుకున్నాడు. వ్యవసాయంలో తన కష్టనష్టాలను, తనలాంటి రైతుల బాధలను, ప్రభుత్వాల బాధ్యతలను ఆ సెల్ఫీ వీడియోలో వివరించాడు. అయితే, కౌలు రైతు వీరన్న తాను కౌలుకు తీసుకున్న పొలంలో పురుగులమందు తాగి ఆత్మహత్యాయత్నం చేశాడన్న విషయం తెలుసుకున్న అతడి కుటుంబ సభ్యులు హుటాహుటిన అక్కడికి చేరుకున్నారు. వెంటనే ఖమ్మంలోని ప్రైవేటు ఆసుపత్రికి తరలించారు. అక్కడ చికిత్స పొందుతూ ఆదివారం ఉదయం మరణించాడు. నేలకొండపల్లి ప్రభుత్వ ఆసుప్రతి వైద్యులు పోస్టుమార్టం నిర్వహించారు. వీరన్నకు భార్య, కుమారుడు ఉన్నారు. భార్య ఫిర్యాదు మేరకు నేలకొండపల్లి ఎస్‌ఐ సంతోశ్‌ కేసు నమోదు చేసి దర్యాప్తు చేస్తున్నారు.
