ఏమరుపాటు వద్దు.. అప్రమత్తతే ముద్దు..

పంట పొలాల్లో పురుగుమందులు పిచికారీ చేసే సమయంలో నిర్లక్ష్యంగా వ్యవహరిస్తే ప్రాణానికి ముప్పు వాటిల్లే ప్రమాదం ఉంటుందని వ్యవసాయ శాస్త్రవేత్తలు, అధికారులు సూచిస్తున్నారు. సరైన అవగాహన లేకపోతే అనర్థాలూ తప్పవని హెచ్చరిస్తున్నారు. పంట పొలాలకు సోకిన చీడపీడల నివారణ కోసం రైతులు పురుగుమందులను పిచికారీ చేస్తుంటారు

• పురుగుమందుల పిచికారీ సమయంలో జాగ్రత్తలు తప్పనిసరి
• నిర్లక్ష్యం వహిస్తే ప్రాణానికే ముప్పు వాటిల్లే ప్రమాదం
• అవగాహన లేమితో అనారోగ్యం పాలవుతున్న రైతులు

ఖమ్మం వ్యవసాయం, నవంబర్‌ 10: పంట పొలాల్లో పురుగుమందులు పిచికారీ చేసే సమయంలో నిర్లక్ష్యంగా వ్యవహరిస్తే ప్రాణానికి ముప్పు వాటిల్లే ప్రమాదం ఉంటుందని వ్యవసాయ శాస్త్రవేత్తలు, అధికారులు సూచిస్తున్నారు. సరైన అవగాహన లేకపోతే అనర్థాలూ తప్పవని హెచ్చరిస్తున్నారు. పంట పొలాలకు సోకిన చీడపీడల నివారణ కోసం రైతులు పురుగుమందులను పిచికారీ చేస్తుంటారు. ఆ సమయంలో సరైన జాగ్రత్తలు తీసుకోకపోవడంతో వారు అనారోగ్యాల పాలవుతున్నారు. కొంతమంది రైతుల ప్రాణాలు పోయిన ఘటనలూ ఉన్నాయి. రసాయనిక మందుల వినియోగం పెరిగిపోవడం, మందుల్లో మోతాదు పెరగడం, అందుకు తగ్గట్టుగా రైతులు రక్షణ చర్యలు తీసుకోకపోవడం వంటి కారణాల వల్ల అనేక అనర్థాలు ఎదురవుతున్నాయి. వారితోపాటు వారికి సహాయకులుగా ఉన్న కుటుంబ సభ్యులూ అనారోగ్యం బారిన పడుతున్నారు. ఏ మందు ఎలా వాడాలి? పిచికారీ సమయంలో ఎలాంటి జాగ్రత్తలు తీసుకోవాలి? అనే విషయాలు కచ్చితంగా తెలుసుకోవాలి.

పిచికారీ సమయంలో తీసుకోవాల్సిన జాగ్రత్తలు..

• పైరుకు సోకిన చీడపీడల నివారణకు ఏ మందులు వాడాలో అనుభవం కలిగిన వ్యవసాయ, ఉద్యాన అధికారి సూచన మేరకు తగిన మోతాదులో పిచికారీ చేయాలి.
• డీలర్ల నుంచి కొనుగోలు చేసిన రసాయనిక మందులను ఇంట్లో చిన్న పిల్లలకు దూరంగా ఉంచాలి. పంట పొలాల దగ్గర ఉంచినట్లయితే మంచిది.
• పిచికారీ సమయంలో రక్షణ దుస్తులు ధరించడం తప్పనిసరి. కాళ్లు, చేతులు పూర్తిగా కప్పి ఉండే విధంగా చొక్కాలు, ప్యాంట్లు ధరించాలి. ముఖానికి మాస్క్‌ లేదా రక్షణ వస్త్రం కట్టుకోవాలి. కళ్లకు అద్దాలు పెట్టుకుంటే మంచిది.
• పురుగుమందు కలిపేటప్పుడు చేతులకు తప్పనిసరిగా గ్లౌజులు ధరించాలి. కర్ర సహాయంతో కలపడం ఉత్తమం.
• మందు సీసాలను ఎట్టి పరిస్థితుల్లో నోటితో తీయరాదు. పిచికారీ సమయంలో స్ప్రేయర్‌ నాజిల్‌కు ఏదైనా అడ్డు తగిలినట్లయితే నోటితో తీయడం ప్రమాదకరం.
• ఎరువులను పొలాల్లో చల్లేటప్పుడు గాలికి ఎదురుగా చల్లడం మంచిది కాదు. మందు చల్లే సమయంలో పొగ తాగడం, తమలపాకు నమలడం వంటివి అత్యంత ప్రమాదకరం.
• కాలపరిమితి దాటిన మందులు వినియోగించొద్దు. ముందుగా మందు డబ్బాల మీద ఉన్న గడువు తేదీని గుర్తించాలి.
• చీడపీడల నివారణ కోసం మందులు వాడేటప్పుడు ఉప్పునీటిని వాడరాదు. ఉదజని సూచిక 8కి మించి ఉన్న, ఉదజని సూచిక 5కు తక్కువగా ఉన్న నీటిని ఉపయోగించరాదు.
• మందు పిచికారీ చేసేటప్పుడు, ఆకులపై, కిందిభాగంలో తడిసేలా స్ప్రేయర్లు ఉపయోగించాలి.
• రెండు లేదా మూడు రకాల మందులు వాడేటప్పుడు అవి కలిసిపోయే
  తత్వాన్ని గమనించిన తర్వాతనే మందును పిచికారీ చేయాలి.
• మందును పిచికారీ చేసేముందు డ్రమ్ములో లేదా బకెట్లో కలుపుకున్న తర్వాతనే స్ప్రేయర్‌లో నింపుకొని పిచికారీ చేయాలి.