విద్యుదాఘాతానికి గురై మూడు బర్రెలు మృతి

దమ్మపేట మండలం గోపాలపురం గ్రామంలో విద్యుదాఘాతానికి గురై మూడు బ‌ర్రెలు మృతి చెందాయి. ​గతరాత్రి మండలంలో ఈదురుగాలులతో కూడిన భారీ వర్షం కురిసింది. ఈ క్రమంలో గోపాలపురం గ్రామంలోని ఒక పామాయిల్ తోటలో ఉన్న చెట్లు గాలివాన ధాటికి విరిగి పక్కనే ఉన్న..

దమ్మపేట, జూలై 04 : ​దమ్మపేట మండలం గోపాలపురం గ్రామంలో విద్యుదాఘాతానికి గురై మూడు బ‌ర్రెలు మృతి చెందాయి. ​గతరాత్రి మండలంలో ఈదురుగాలులతో కూడిన భారీ వర్షం కురిసింది. ఈ క్రమంలో గోపాలపురం గ్రామంలోని ఒక పామాయిల్ తోటలో ఉన్న చెట్లు గాలివాన ధాటికి విరిగి పక్కనే ఉన్న విద్యుత్ తీగలపై పడ్డాయి. దీంతో విద్యుత్ వైర్లు తెగి నేలకొరిగాయి. ఈ విషయం తెలియని స్థానిక రైతు దండి జయమ్మ అనే మహిళ శనివారం ఉదయం తన బ‌ర్రెల‌ను మేపడానికి ఆ పామాయిల్ తోట వైపు తోలుకెళ్లింది. ​తోటలో కిందపడి ఉన్న విద్యుత్ తీగలు త‌గ‌ల‌డంతో మేత‌మేస్తున్న బ‌ర్రెలు అక్కడికక్కడే ప్రాణాలు విడిచాయి. పక్కనే ఉన్న జయమ్మ తృటిలో ప్రాణాపాయం నుండి తప్పించుకోవడంతో అంతా ఊపిరి పీల్చుకున్నారు. ​తమ జీవనాధారమైన మూడు బ‌ర్రెలు ఒకేసారి మృత్యువాత పడడంతో బాధితురాలు కన్నీరుమున్నీరుగా విలపించింది. దాదాపు రెండున్నర లక్షల రూపాయల మేర నష్టం వాటిల్లిందని, ప్రభుత్వం స్పందించి తగిన నష్ట పరిహారం అందించి ఆదుకోవాలని బాధితురాలు, స్థానిక గ్రామస్తులు కోరుతున్నారు.