ఆర్టీసీలో సమ్మె సైరన్‌.. యాజమాన్యంతో చర్చలు విఫలం

గత కొంత కాలంగా తమ సమస్యలు పరిష్కరించాలని ఆర్టీసీ కార్మికులు ఇటు ప్రభుత్వం, అటు యాజమాన్యానికి విజ్ఞప్తులు చేస్తూ వస్తున్నారు. పలు సార్లు సమ్మెకు వెళ్తామని ఆర్టీసీ జేఏసీ నోటీసులు కూడా ఇవ్వగా, సమస్యలు పరిష్కరించేందుకు సమయం కావాలని యాజమాన్యం కోరుతూ వచ్చింది.

• అర్ధరాత్రి నుంచి నిలిచి పోయిన బస్సులు
• కరీంనగర్‌ రీజియన్‌లోని 11 డిపోల పరిధిలో ఎఫెక్ట్‌

ఆర్టీసీలో సమ్మె సైరన్‌ మోగింది. మంగళవారం యాజమాన్యానికి, ఆర్టీసీ యూనియన్ల మధ్య జరిగిన చర్చలు విఫలమయ్యాయి. అర్ధరాత్రి నుంచే బస్సులు నిలిపివేసి సమ్మెకు వెళ్తున్నట్లు ఆర్టీసీ జేఏసీ అన్ని డిపోల పరిధిలోని వివిధ యూనియన్లకు సమాచారం అందించింది. దీంతో మంగళవారం అర్ధరాత్రి నుంచి చివరి బస్సు డిపోకు చేర్చిన తర్వాత కార్మికులు సమ్మెకు దిగుతున్నారు.

కరీంనగర్‌, ఏప్రిల్‌ 21 (నమస్తే తెలంగాణ)/ తెలంగాణ చౌక్‌ : గత కొంత కాలంగా తమ సమస్యలు పరిష్కరించాలని ఆర్టీసీ కార్మికులు ఇటు ప్రభుత్వం, అటు యాజమాన్యానికి విజ్ఞప్తులు చేస్తూ వస్తున్నారు. పలు సార్లు సమ్మెకు వెళ్తామని ఆర్టీసీ జేఏసీ నోటీసులు కూడా ఇవ్వగా, సమస్యలు పరిష్కరించేందుకు సమయం కావాలని యాజమాన్యం కోరుతూ వచ్చింది. కానీ, ఇప్పటి వరకు ఎలాంటి పరిష్కారం చూపక పోవడంతో ఇటీవల సమ్మె నోటీస్‌ ఇచ్చింది. డిపోల వారీగా సమ్మెకు సమాయత్తమవుతూ సభలు, సమావేశాలు నిర్వహించుకున్నారు. ఆర్టీసీ బస్టేషన్లు, డిపోలు, వర్క్‌షాపుల ఎదుట ధర్నాలు, నిరసనలు వ్యక్తం చేశారు.

అయినా, ఇటు ప్రభుత్వం, అటు యాజమాన్యం దిగి రాలేదు. 22న అర్ధరాత్రి నుంచి సమ్మెకు వెళ్లాలని నిర్ణయించడంతో జేఏసీతో చర్చలు జరిపేందుకు ప్రభుత్వం ఒక కమిటీని నియమించింది. మంగళవారం ఆర్టీసీ జేఏసీ నాయకులతో ఆ కమిటీ చర్చలు జరిపింది. సమస్యలు పరిష్కరించేందుకు నాలుగు వారాల గడువు కావాలని కమిటీ కోరగా, అందుకు జేఏసీ నాయకులు అంగీకరించలేదు. దీంతో ఆర్టీసీ సమ్మె అనివార్యమైంది. మంగళవారం రాత్రి పొద్దు పోయే వరకు జరిగిన చర్చలు విఫలమైనట్లు, అర్ధరాత్రి నుంచి బస్సులు నిలిపి వేయాలని, మొదటి డ్యూటీ నుంచి సమ్మెకు వెళ్లాలని జేఏసీ నాయకులు ఆయా డిపోల పరిధిలోని యూనియన్‌ నాయకులకు సమాచారం అందించారు.

11 డిపోల పరిధిలో ప్రభావం

ఆర్టీసీ సమ్మె కరీంనగర్‌ ఉమ్మడి జిల్లాలో తీవ్ర ప్రభావం చూపనుంది. రీజియన్‌ పరిధిలోని 11 డిపోల్లో 556 ఆర్టీసీ బస్సులు, 330 అద్దె బస్సులు 102 ఎలక్ట్రికల్‌ బస్సులు ఉన్నాయి. అందులో ఎలక్ట్రికల్‌ బస్సులు మినహా ఆర్టీసీ, అద్దె బస్సులకు సంబంధించిన 988 మంది డ్రైవర్లు, 989 మంది కండక్టర్లు సమ్మెలో ప్రత్యక్షంగా పాల్గొంటున్నారు. ఆర్టీసీలో సమ్మె అనివార్యమైన నేపథ్యంలో డిపోల ఎదుట పటిష్ట బందోబస్తు ఏర్పాట్లు చేయాలని ఆయా డిపోల మేనేజనర్లు పోలీసులకు సమాచారం అందించారు. బుధవారం ఉదయం 4 గంటల నుంచి ఆర్టీసీ కార్మికులు ప్రత్యక్ష ఆందోళనలకు దిగే అవకాశమున్నది.

ఇవే ప్రధాన డిమాండ్లు

• ఆర్టీసీని ప్రభుత్వంలో విలీనం చేసే ప్రక్రియను వెంటనే ప్రారంభించాలి
• 2021 వేతన సవరణ 30 శాతం ఫిట్మెంట్‌లో అమలు చేయాలి
• మహాలక్ష్మి పథకం కింద ప్రభుత్వం ఇవ్వాల్సిన డబ్బులు ప్రతి నెలా రూ.350 కోట్లు కోత విధించడకుండా చెల్లించాలి
• పాత బకాయిలు సుమారు రూ.2,500 కోట్లు వెంటనే విడుదల చేయాలి
• ఆర్టీసీ ఉద్యోగులకు ఉద్యోగ భద్రత కల్పించాలి. బ్రీడ్‌ విన్నర్‌ స్కీంలో పనిచేస్తున్న వారందరినీ రెగ్యులర్‌ చేయాలి. ఈ పోస్టులను పర్మినెంట్‌ ఉద్యోగాల కింద భర్తీ చేయాలి
• ట్రేడ్‌ యూనియన్లపై ఆంక్షలు ఎత్తి వేయాలి. గుర్తింపు సంఘం ఎన్నికలు నిర్కహించాలి.
• అన్ని కేటగిరీల్లో పనిచేస్తున్న ఉద్యోగులపై ఆధిక పని భారం తగ్గించాలి
• ఎలక్ట్రికల్‌ బస్సులను రాష్ట్ర ప్రభుత్వమే కొని ఆర్టీసీకి ఇవ్వాలి. ఆర్టీసీ స్థలాలను ఈవీ బస్సులకు ఇవ్వొద్దు
• రద్దీకనుగుణంగా బస్సుల సంఖ్యను పెంచాలి. అన్ని కేటగిరీ ఖాళీలను భర్తీ చేయాలి
• రిటైరైన ఉద్యోగుల బకాయిలన్నింటినీ చెల్లించాలి
• రిజెక్ట్‌ అయిన వారికి హయ్యర్‌ పెన్షన్‌ పొందేందుకు మరొక అవకాశం ఇవ్వాలి. డిమాండ్‌ నోటీస్‌ రానివారికి ఈపీఎఫ్‌ నుంచి డిమాండ్‌ నోటీసులు ఇప్పించాలి