వస్త్ర తయారీ ఆర్డర్లు సిరిసిల్లకే ఇవ్వాలి

‘బతుకమ్మ, క్రిస్మస్‌, రంజాన్‌ లాంటి వస్త్ర ఉత్పత్తులు, కేసీఆర్‌ కిట్‌ బట్టల తయారీ, ఆర్‌వీఎం బట్టల తయారీ ఆర్డర్లు అధిక శాతం సిరిసిల్లకే ఇచ్చి నేతన్నలను ఆదుకోవాలి.

• ఏడు విలీన గ్రామాలను తిరిగి పంచాయతీలుగా కొనసాగించాలి
• దివ్యాంగులకూ ఉచిత బస్సు సౌకర్యం కల్పించాలి
• ఆటో కార్మికులకు నెలకు రూ.10వేల భృతి ఇవ్వాలి
• కిరాయిదారులకు 200 యూనిట్ల వరకు విద్యుత్‌ రాయితీ కల్పించాలి
• 18 అంశాలపై సిరిసిల్ల మున్సిపల్‌ కౌన్సిల్‌ ఏకగ్రీవ తీర్మానం
• వివరాలు వెల్లడించిన చైర్‌పర్సన్‌ జిందం కళ

రాజన్న సిరిసిల్ల, డిసెంబర్‌ 30 (నమస్తే తెలంగాణ)/ సిరిసిల్లటౌన్‌: ‘బతుకమ్మ, క్రిస్మస్‌, రంజాన్‌ లాంటి వస్త్ర ఉత్పత్తులు, కేసీఆర్‌ కిట్‌ బట్టల తయారీ, ఆర్‌వీఎం బట్టల తయారీ ఆర్డర్లు అధిక శాతం సిరిసిల్లకే ఇచ్చి నేతన్నలను ఆదుకోవాలి. సిరిసిల్లలో అధిక శాతం మంది పవర్‌లూం పరిశ్రమపై ఆధారపడి జీవిస్తున్నందున సిరిసిల్లలో ఉన్న 20 వేల పైచిలుకు మరమగ్గాలకు 90శాతం విద్యుత్‌ సబ్సిడీ ఇవ్వాలి’ అని సిరిసిల్ల మున్సిపల్‌ కౌన్సిల్‌ కోరింది.

శనివారం చైర్‌పర్సన్‌ జిందం కళ అధ్యతక్షన నిర్వహించిన సమావేశంలో నేత కార్మికులు, ప్రజల సంక్షేమం, పట్టణ అభివృద్ధిని దృష్టిలో ఉంచుకుని 18 అంశాలతో రూపొందించిన ఎజెండాను ప్రవేశపెట్టగా, సభ్యులు అన్ని అంశాలను చర్చించి ఆమోదించారు. ఏకగ్రీవంగా తీర్మానం చేసి, వాటి ప్రతులను ప్రభుత్వానికి పంపించారు. ఈ సమావేశంలో మున్సిపల్‌ కమిషనర్‌ సమ్మయ్య, వైస్‌ చైర్మన్‌ మంచె శ్రీనివాస్‌, కమిషనర్‌ మీర్జా ఆలీబేగ్‌, టీపీవో అన్సారీ, సెస్‌ ఎండీ సూర్యచందర్‌రావు, సిరిసిల్ల ఆర్టీసీ డిపో మేనేజర్‌ మనోహర్‌, కౌన్సిలర్లు తదితరులు పాల్గొన్నారు. అనంతరం ఏర్పాటు చేసిన విలేకరుల సమావేశంలో మున్సిపల్‌ చైర్‌పర్సన్‌ జిందం కళ వివరాలను వెల్లడించారు.

తీర్మానాలివే..

• నేతన్నల జీవన ప్రమాణాలు పెంపొందించేలా కేసీఆర్‌ సర్కారు అత్యధిక శాతం వస్త్ర ఉత్పత్తి ఆర్డర్లు మరమగ్గాల పరిశ్రమకే ఇచ్చింది. అలాగే ప్రస్తుత ప్రభుత్వం ఆర్డర్లు ఇచ్చి కార్మికులను ఆదుకోవాలి.
  సిరిసిల్లలో ఎక్కువగా పవర్‌లూమ్‌పై పరిశ్రమపై ఆధారపడి జీవిస్తున్నారు. 14 వేల పైచిలుకు సాంచాలకు 90శాతం విద్యుత్‌ సబ్సిడీ ఇవ్వాలి.
• 2018లో సిరిసిల్ల మున్సిపాలిటీలో విలీనం చేసిన ఏడు గ్రామాలను ప్రజల కోరిక మేరకు తిరిగి గ్రామాపంచాయతీలుగా కొనసాగించాలి.
• ఆరు గ్యారంటీలలో భాగంగా ఇంటి కిరాయిదారులకు, అన్ని గృహ విద్యుత్‌ సర్వీసులకు గృహ జ్యోతి పథకం కింద 200యూనిట్ల రాయితీ ఇవ్వాలి.
• మహాలక్ష్మీ పథకంలో భాగంగా ఆర్టీసీ బస్సుల్లో ప్రయాణించే ప్రయాణికుల సంఖ్య పెరిగినందున అందుకు అనుగుణంగా బస్సుల సంఖ్యను పెంచాలి.
• కాంగ్రెస్‌ ఇచ్చిన హామీ ప్రకారం దివ్యాంగులకు ఉచిత బస్సు ప్రయాణ సౌకర్యం కల్పించాలి.
  మహిళలకు ఫ్రీ బస్సుతో ఆటో కార్మికుల ఉపాధి దెబ్బతిన్నందున ఇస్తానన్న నెలకు వెయ్యి జీవన భృతి వారికి ఏ మాత్రం సరిపోదని, ప్రస్తుత పరిస్థితులలో దానిని 10వేలకు పెంచాలి. భృతిని ఈ నెల నుంచే కార్మికులకు అందించాలి. ఇతర ఆదాయ మార్గాలను చూపాలి. ఇంకా ఆటో డ్రైవర్లకు రూ.5లక్షల ప్రమాద బీమా సదుపాయం కల్పించాలి.
• పట్టణంలో పార్కులు, జంక్షన్లు, సెంట్రల్‌ మీడియన్స్‌, గ్రీనరీ, వైకుంఠ ధామాలు ఇతరత్రా పనుల నిర్వహణకు టెండర్లు నిర్వహించాలి.
• విధ వార్డుల్లో ఉన్న పవర్‌ బోర్ల నిర్వహణ చూడాలి. రాజీవ్‌నగర్‌ ప్రజల కోరిక మేరకు అంబా భవాని ఆలయానికి ఇంటి నెంబర్‌ను కేటాయించాలి. ప్రత్యేక పారిశుధ్య నిర్వహణ పనులు చేపట్టాలి.
  ఇందిరానగర్‌, బీవైనగర్‌, పద్మనగర్‌ ఏరియాలోని ప్రభుత్వ పట్టా భూములు పొందిన లబ్ధిదారులకు పూర్తి యజమాన్య హక్కులు, క్రయ, విక్రయాలు చేసుకునే వీలు కల్పించాలి.