మా వాళ్లా.. అయితే వదిలెయ్‌.. పోలీస్‌ శాఖపై అదృశ్యశక్తుల ఒత్తిళ్లు

ఎవరికైనా ఆపద వస్తే పోలీసులే ముందుగా గుర్తుకు వస్తారు. వారిని ఆశ్రయిస్తే న్యాయం జరుగుతుందనే ఒక నమ్మకంతో ఉంటారు. అలాగే, పోలీసులు సైతం క్షేత్రస్థాయిలో పరిశీలన చేసి కేసులు నమోదు చేస్తారు. కానీ, మానకొండూర్‌ నియోజకవర్గంలో మాత్రం అదృశ్య శక్తుల ఒత్తిళ్లతో అందుకు విరుద్ధంగా జరుగుతున్నదనే ఆరోపణలు వెల్లువెత్తుతున్నాయి.

• తమ వాళ్లపై చర్యలు లేకుండా ఆదేశాలు
• కేసులను నీరుగార్చే ప్రయత్నాలు
• వెల్లువెత్తుతున్న విమర్శలు
• మానకొండూర్‌ నియోజకవర్గంలో జోరుగా చర్చ

తిమ్మాపూర్‌, మార్చి 12 : ఎవరికైనా ఆపద వస్తే పోలీసులే ముందుగా గుర్తుకు వస్తారు. వారిని ఆశ్రయిస్తే న్యాయం జరుగుతుందనే ఒక నమ్మకంతో ఉంటారు. అలాగే, పోలీసులు సైతం క్షేత్రస్థాయిలో పరిశీలన చేసి కేసులు నమోదు చేస్తారు. కానీ, మానకొండూర్‌ నియోజకవర్గంలో మాత్రం అదృశ్య శక్తుల ఒత్తిళ్లతో అందుకు విరుద్ధంగా జరుగుతున్నదనే ఆరోపణలు వెల్లువెత్తుతున్నాయి. ఏకంగా పోలీస్‌ వ్యవస్థను తమ చేతుల్లో పెట్టుకొని, తమ వాళ్లపై చర్యలు లేకుండా కాపాడుకుంటున్నారనే విమర్శలు వినిపిస్తున్నాయి. ఫిర్యాదులు వచ్చినట్టు తెలిస్తే చాలు.. ‘మా వాళ్లా.. వదిలెయ్‌’ అన్న ఆదేశాలు ఇస్తూ కేసులను పక్కదారి పట్టిస్తున్నారని తెలుస్తున్నది.

అందుకు అనేక ఉదాహరణలు ఉన్నట్టు తెలుస్తుండగా, గత ఆదివారం ‘నమస్తే తెలంగాణ’లో ప్రచురితమైన ‘ఎస్‌ఐపై దౌర్జన్యం?’ కథనం ప్రకంపనలు సృష్టించింది. పోలీస్‌ శాఖలో కలకలం రేపగా, మూడు నాలుగు రోజులుగా ఈ కథనం సోషల్‌ మీడియాలో వైరల్‌ అవుతున్నది. ఎస్‌ఐపై బరితెగించిన ఆ అధికారపార్టీ నాయకుడు ఎవరా? అనే చర్చ జోరుగా సాగింది. తమపైన దాడి జరిగినా కేసు పెట్టరా? అని మరికొందరు పోలీసులు చర్చించుకుంటున్నట్టు తెలిసింది. అయితే ఇలాంటి ఎన్నో ఘటనలు ఉన్నా బయటికి రానివి అనేకం ఉంటున్నట్టు తెలుస్తున్నది. ఏదైనా ఘటన జరిగిప్పుడు విచారించి చర్యలు తీసుకోవాల్సిన పోలీస్‌ శాఖలో అదృశ్య శక్తుల ప్రమేయంతో పలుచన పడుతున్నదన్న విమర్శలు వ్యక్తమవుతున్నాయి.

• తిమ్మాపూర్‌ మండలం మొగిలిపాలెంలో శ్రీ చెన్నకేశవ స్వామివారి బ్రహ్మోత్సవాల్లో భాగంగా జరిగిన సబ్‌ ఇన్‌స్పెక్టర్‌పై దాడి జరిగినా.. కేసు నమోదులో జాప్యం జరిగింది. దాడి చేసిన వ్యక్తి అధికారపార్టీకి చెందిన వాడు కావడంతో కేసు నమోదు చేయకుండా కొందరు అడ్డుకున్నట్లు సమాచారం. విషయం బయటికి పొక్కి విమర్శలు రావడంతో కేసు నమోదైంది.
• ఓ మండలానికి చెందిన మేజర్‌ గ్రామంలో మాజీ సర్పంచి భర్త, ప్రస్తుత పంచాయతీ పాలకవర్గానికి గొడవ జరిగింది. ఈ క్రమంలో గొడవ పెద్దది అవడంతో పాలకవర్గం పోలీసులకు ఫిర్యాదు చేసింది. ఈ క్రమంలో ఏదో ఒక చర్య తీసుకోవాల్సిన పోలీసులు.. దాన్ని పెండింగ్‌లోనే ఉంచినట్టు సమాచారం. పాలకవర్గ సభ్యులు ఇచ్చిన ఫిర్యాదుకే దిక్కు లేకపోతే సామాన్యునికి న్యాయం ఎక్కడిదని వాపోతున్నారు.
• ఒక వాగు నుంచి ఇసుక సరాఫరా చేస్తున్న ట్రాక్టర్ల విషయంలో పెద్దవాళ్లు ఎంటరై వారికి నచ్చిన వాళ్ల ట్రాక్టర్లకు కొంత వెసులుబాటు కల్పించినట్టు ప్రచారం సాగుతున్నది. ఇసుక అక్రమ రవాణా ట్రాక్టర్లను పట్టుకునే సమయంలో నచ్చిన ట్రాక్టర్లను వదిలేసి, కొన్నింటిని మాత్రమే టార్గెట్‌ చేస్తున్నారనే ఆరోపణలున్నాయి. అయితే ఇది ఇసుక అక్రమ రవాణాను కట్టడి చేస్తున్న పోలీసులకు ఇది పెద్ద ఇబ్బందిగా మారింది.
• ఇటీవల ఓ పోలీస్‌స్టేషన్‌ పరిధిలోని వాగు నుంచి ఇందిరమ్మ ఇండ్ల కోసం ఇసుక సరాఫరా చేయడానికి అధికారులు ఇచ్చిన కూపన్లను పట్టుకొని కొన్ని ట్రాక్టర్లు వాగులోకి వెళ్లగా పోలీసులు పట్టుకున్నారు. కూపన్లను ఆసరాగా చేసుకుని అక్రమ రవాణా చేస్తున్నారనే సమాచారంతో పెద్ద సంఖ్యలో ట్రాక్టర్లు పట్టుకున్నారు. కొద్ది రోజులు విచారించి కేసులు నమోదు చేసేందుకు సిద్ధమైన పోలీసులకు వదిలేయమని ఆదేశాలు రావడంతో వదిలేశారు.
• తిమ్మాపూర్‌ మండలంలోని రాజీవ్‌ రహదారికి ఆనుకొని ఉన్న గ్రామంలో ఓ ఇందిరమ్మ లబ్ధిదారుడు ఇల్లు ముగ్గు పోసుకునే సమయంలో.. కొంత భూమి ఆక్రమణ గురైందని అడ్డు చెప్పిన ఓ కుటుంబంపై నిర్ధాక్షిణ్యంగా కేసు నమోదైంది. కేవలం అధికార పార్టీ నాయకులు ఎంటరై కక్షపూరితంగా కేసు నమోదు చేయించినట్లు తెలిసింది.