ఉపాధ్యాయ బదిలీలకు ముహూర్తం ఖరారు

ఎప్పుడెప్పుడా అని ఎదురుచూస్తున్న ఉపాధ్యాయ బదిలీలకు ముహూర్తం ఖరారైంది. అందుకు సంబంధించి తేదీలను ఖరారు చేస్తూ రాష్ట్ర విద్యాశాఖ గురువారం ప్రభుత్వానికి ప్రతిపాదనలు పంపింది. ఈ మేరకు శుక్రవారం షెడ్యూల్‌ విడుదల కానున్నది.

• నెల రోజుల పాటు ప్రక్రియ
• ఈ నెల 3 నుంచే దరఖాస్తుల స్వీకరణ
• అక్టోబర్‌ 3లోగా పూర్తి
• ఎనిమిదేండ్లు దాటిన టీచర్లు, ఐదేండ్లు దాటిన హెచ్‌ఎంలకు తప్పనిసరి బదిలీ
• రిటైర్మెంట్‌కు మూడేండ్లలోపు సర్వీసున్న వారికి మినహాయింపు
• ప్రభుత్వానికి ప్రతిపాదనలు పంపిన రాష్ట్ర విద్యాశాఖ
• నేడు అధికారికంగా షెడ్యూల్‌ విడుదల
• సిద్ధంగా ఉండాలని డీఈవోలకు ఆదేశాలు
• ఉమ్మడి జిల్లాలో 8 నుంచి 10వేల మందికి ట్రాన్స్‌ఫర్లు అయ్యే అవకాశం
• పెద్ద ఎత్తున పదోన్నతులు
• 1200 మంది ఎస్జీటీలకు స్కూల్‌ అసిస్టెంట్లుగా ప్రమోషన్లు?

ఎప్పుడెప్పుడా అని ఎదురుచూస్తున్న ఉపాధ్యాయ బదిలీలకు ముహూర్తం ఖరారైంది. అందుకు సంబంధించి తేదీలను ఖరారు చేస్తూ రాష్ట్ర విద్యాశాఖ గురువారం ప్రభుత్వానికి ప్రతిపాదనలు పంపింది. ఈ మేరకు శుక్రవారం షెడ్యూల్‌ విడుదల కానున్నది. అందులో భాగంగానే గురువారం మధ్యాహ్నం జిల్లా విద్యాధికారులతో రాష్ట్ర విద్యశాఖాధికారులు వీడియోకాన్ఫరెన్స్‌ నిర్వహించారు. బదిలీలు, పదోన్నతులకు కావాల్సిన కసరత్తు పూర్తి చేసి సిద్ధంగా ఉండాలని ఆదేశించారు. తాజాగా విడుదలయ్యే షెడ్యూల్‌ ప్రకారం చూస్తే ఉమ్మడి జిల్లాలో దాదాపు 8 నుంచి 10వేల మంది ఉపాధ్యాయులు ట్రాన్స్‌ఫర్‌ అయ్యే అవకాశమున్నది. అలాగే సుమారు 350 హెచ్‌ఎం పోస్టులు భర్తీ కానుండగా, దాదాపు 1200 మంది ఎస్జీటీలకు స్కూల్‌ అసిస్టెంట్లుగా పదోన్నతులు వచ్చే అవకాశముండగా, టీచర్ల ట్రాన్స్‌ఫర్లపై ఉత్కంఠ నెలకొన్నది.

– కరీంనగర్‌, ఆగస్టు 31 (నమస్తే తెలంగాణ ప్రతినిధి)

కరీంనగర్‌, ఆగస్టు 31 (నమస్తే తెలంగాణ ప్రతినిధి) : ఉపాధ్యాయ బదిలీలకు సంబంధించి శుక్రవారం అధికారికంగా షెడ్యూల్‌ విడుదల కానున్నది. ఈ మేరకు బదిలీలు, పదోన్నతుల ప్రక్రియకు సబంధించి తేదీలను ఖరారు చేస్తూ రాష్ట్ర విద్యాశాఖ గురువారం ప్రభుత్వానికి ప్రతిపాదనలు పంపింది. సదరు ప్రతిపాదనల ప్రకారం చూస్తే ఈ నెల 3 నుంచి దరఖాస్తుల స్వీకరణ ప్రారంభించి, అక్టోబర్‌ 3 వరకు బదిలీల ప్రక్రియను పూర్తి చేయనున్నది. అందుకు సంబంధిత అధికారులు కసరత్తు చేస్తుండగా, రాష్ట్ర విద్యశాఖ జిల్లా విద్యాధికారులను అప్రమత్తం చేసింది. 2018 జూలైలో చివరి సారిగా ఉపాధ్యాయ బదిలీలు జరిగాయి. ఆ తదుపరి వివిధకారణాలతో జరగలేదు. తిరిగి 2023 జనవరిలో ఉపాధ్యాయ బదిలీలకోసం ప్రభుత్వం దరఖాస్తులను ఆహ్వానించింది. అందులో స్పౌజ్‌ కేటగిరికి అదనంగా పది పాయింట్లు, అలాగే యూనియన్‌ నాయకులకు అదనంగా పది పాయింట్లు ఇవ్వడాన్ని వ్యతిరేకిస్తూ కొంత మంది ఉపాధ్యాయలు హైకోర్టును ఆశ్రయించారు. దాంతో బదిలీలకు బ్రేక్‌ పడింది. ఈ నేపథ్యంలో తాజాగా రాష్ట్ర కోర్టు బదిలీలకు గ్రీన్‌ సిగ్నల్‌ ఇచ్చింది. స్పౌజ్‌ అదనపు పాయింట్లు ఉంచుతూ.. యూనియన్‌ నాయకులకు మాత్రం పాయింట్లను అనుమతించలేదు. ఆ మేరకు కోర్టు తీర్పునకు లోబడి.. ఉపాధ్యాయ బదిలీలను చేసేందుకు ప్రభుత్వం అంతా సిద్ధం చేస్తున్నది.

8 నుంచి 10వేల బదిలీలు

ఉమ్మడి జిల్లాలో ఈసారి పెద్ద ఎత్తున ఉపాధ్యాయుల బదిలీలు జరిగే అవకాశాలున్నాయి. 2018 నుంచి నేటి వరకు ఉపాధ్యాయులు బదిలీల కోసం వేచి చూస్తున్నారు. ఈ నేపథ్యంలో షెడ్యూల్‌ విడుదలైతే భారీగా దరఖాస్తులు చేసుకునే అవకాశమున్నది. ఆ మేరకు ఉపాధ్యాయ బదిలీలు భారీగానే జరుగుతాయని అధికారులు పేర్కొంటున్నారు. గత బదిలీలు, అలాగే తాజా షెడ్యూల్‌లో రాబోయే నిబంధనల ప్రకారం ఉమ్మడి జిల్లా మొత్తం మీద దాదాపు 8 నుంచి పదివేల బదిలీలు జరుగుతాయని అధికారులు అంచనా వేస్తున్నారు. దీంతోపాటు అర్హులైన స్కూల్‌ అసిస్టెంట్‌లకు భారీగా హెచ్‌ఎంలుగా పదోన్నతులు రానున్నాయి. అధికారుల అంచనా ప్రకారం సుమారు 350 మంది స్కూల్‌ అసిస్టెంట్లకు హెచ్‌ఎంలుగా పదోన్నతులు రానున్నాయి. దీంతోపాటు ఉమ్మడి జిల్లాలో 1200లకుపైగా ఎస్జీటీలకు స్కూల్‌ అసిస్టెంట్లుగా పదోన్నతులు రానున్నాయి. తద్వారా ఎస్జీటీ ఖాళీలు ఏర్పడనున్నాయి. వాటిని తాజా డీఎస్సీ ద్వారా భర్తీ చేసేందుకు అవకాశాలున్నాయి.

ప్రభుత్వానికి పంపిన ప్రతిపాదనలు

• ఈ నెల 3 నుంచి 5 వరకు దరఖాస్తులు అన్‌లైన్‌లో సమర్పించాలి.
• 6,7 తేదీల్లో ఆన్‌లైన్‌లో దరఖాస్తు చేసిన కాపీలను డీఈవో కార్యాలయంలో సమర్పించాలి.
• 8, 9 తేదీల్లో దరఖాస్తు చేసుకున్న వారి పేర్లు అధికారులు డిస్‌ప్లే చేయాలి.
• 10,11 అభ్యంతరాల స్వీకరణ
• 12,13 సీనియారిటీ జాబితాలను డిస్‌ప్లే చేస్తారు
• 14న ఎడిట్‌ చేసుకునేందుకు ఆప్షన్‌
• 15న ఆన్‌లైన్‌ ద్వారా ప్రధానోపాధ్యాయుల బదిలీలు
• 16న ప్రధానోపాధ్యాయుల ఖాళీలను ప్రదర్శిస్తారు.
• 17,18,19 తేదీల్లో స్కూల్‌ అసిస్టెంట్‌ నుంచి హెచ్‌ఎంలుగా పదోన్నతులు
• 20,21 తేదీల్లో ఖాళీ అయిన స్కూల్‌ అసిస్టెంట్‌ పోస్టుల ప్రదర్శన
• 21న వెబ్‌ ఆప్షన్లు పెట్టుకోవాలి
• 22 ఎడిట్‌ ఆప్షన్‌ను వినియోగించుకునే అవకాశం
• 23,24 స్కూల్‌ అసిస్టెంట్‌ బదిలీలు
• 24 స్కూల్‌ అస్టింట్‌ ఖాళీల ప్రదర్శన
• 26,27,28 ఎస్టీటీ నుంచి స్కూల్‌ అసిస్టెంట్‌గా పదోన్నతులు
• 29,30,31 ఎస్టీటీ ఖాళీల ప్రదర్శన
• అక్టోబర్‌ 2న ఎడిట్‌ ఆప్షన్స్‌ ఉంటాయి.
• అక్టోబర్‌ 3న ఎస్టీటీ, భాషాపండితులు, పీఈటీల బదిలీలు
• అక్టోబర్‌ 5 నుంచి 19వరకు అప్పీల్‌ చేసుకునే అవకాశం.

ప్రతిపాదిత నిబంధనలు ఇవే..

• ఉపాధ్యాయ బదిలీల షెడ్యూల్‌ శుక్రవారం వచ్చే అవకాశమున్న నేపథ్యంలో గురువారం జిల్లా విద్యాధికారులతో రాష్ట్ర విద్యశాఖాధికారులు వీడియో కాన్ఫరెన్స్‌ నిర్వహించారు. కాగా.. రాష్ట్ర విద్యాశాఖ పంపిన ప్రతిపాదనల ప్రకారం చూస్తే నిబంధనలు ఇలా ఉన్నాయి.
• సెప్టెంబర్‌ ఒకటో తేదీ కటాఫ్‌ డేట్‌గా లాంగ్‌ స్టాండింగ్‌కు ఉపాధ్యాయులకు 8 సంవత్సరాలు, ప్రధానోపాధ్యాయులకు 5 సంవత్సరాల నిబంధన వర్తించేలా ప్రతిపాదించింది.
• 5/8 సంవత్సరాలు పూర్తి చేసుకున్న ఉపాధ్యాయులు/ ప్రధానోపాధ్యాయుల స్థానాలను ఖాళీలుగా జాబితాలో చేరుస్తారు.
  రిటైర్మెంట్‌కు మూడు సంవత్సరాలలోపు సర్వీసున్న ఉపాధ్యాయులు, ప్రధానోపాధ్యాయులకు తప్పనిసరి బదిలీ నుంచి మినహాయింపు ఉంది.
• అన్ని రకాల పదోన్నతులకు సంబంధించి సీనియారిటీ జాబితాలను సిద్ధం చేసుకోవాలని రాష్ట్రస్థాయి అధికారులు జిల్లా అధికారులకు సూచనలు ఇచ్చారు.
• కొత్తగా దరఖాస్తు చేసుకోవడానికి, ఎడిట్‌ చేసుకోవడానికి అవకాశం ఇచ్చారు.
• గతంలో దరఖాస్తు చేసుకున్న ఉపాధ్యాయుల దరఖాస్తులను ఎడిట్‌ చేసుకునే అవకాశాన్ని, అదనంగా స్పాజ్‌ బదిలీలకు పాయింట్లు దరఖాస్తు చేసుకునే అవకాశం కల్పించారు.
• సెప్టెంబర్‌ ఒకటి నాటికి 50 సంవత్సరాల లోపు వయసు ఉండి బాలికల పాఠశాలలో పనిచేస్తున్న ప్రధానోపాధ్యాయులు, ఉపాధ్యాయులకు నిర్బంధ బదిలీ వర్తింప జేస్తూ ప్రతిపాదనలు పంపింది.