Visit:
Donald Trump : అమెరికా అధ్యక్షుడు (US president) డొనాల్డ్‌ ట్రంప్ (Donald Trump) అఫ్గానిస్థాన్‌ (Afghanistan) కు ఓ హెచ్చరిక చేశారు. బగ్రామ్ ఎయిర్‌బేస్‌ (Bagram air base) ను తిరిగి ఇవ్వకపోతే అఫ్గాన్‌పై కఠిన చర్యలు తీసుకుంటామని వార్నింగ్‌ ఇచ్చారు. ఈ మేరకు ట్రూత్‌ సోషల్‌ (Truth social) లో ఆయన ఒక పోస్టు పెట్టారు.
అఫ్గానిస్థాన్‌లోని బగ్రామ్ ఎయిర్‌బేస్‌ను దాన్ని నిర్మించిన వారికి అంటే అమెరికాకు తిరిగి ఇవ్వాలని డొనాల్డ్‌ ట్రంప్ డిమాండ్‌ చేశారు. అలా చేయకపోతే తాను తీసుకునే నిర్ణయం చాలా కఠినంగా ఉంటుందని హెచ్చరించారు. ఇదే విషయంపై ఆయన విలేకరులతో మాట్లాడుతూ.. బగ్రామ్ ఎయిర్‌బేస్‌ స్వాధీనం చేసుకునే అంశంపై అఫ్గాన్‌తో చర్చలు జరుపుతామని చెప్పారు. దాన్ని తిరిగి తీసుకుంటామని, వారు ఇవ్వకపోతే తాను ఏం చేస్తానో ఎవరూ ఊహించలేరని పేర్కొన్నారు.
ఎయిర్‌బేస్‌ను స్వాధీనం చేసుకునేందుకు అమెరికా దళాలను అక్కడికి పంపుతారా..? అని ఈ సందర్భంగా ఓ మీడియా ప్రతినిధి ప్రశ్నించగా బదులిచ్చేందుకు ట్రంప్ నిరాకరించారు. చైనా అణు క్షిపణులు తయారు చేసే ప్రదేశానికి సమీపంలో ఉన్న అత్యంత వ్యూహాత్మకమైన బగ్రామ్ ఎయిర్‌ బేస్‌ను తిరిగి స్వాధీనం చేసుకోవాలని అనుకుంటున్నట్లు ఇటీవల ట్రంప్ ప్రకటించారు.
చైనా అణ్వాయుధ ఉత్పత్తి కేంద్రాలకు ఇది అతి దగ్గరగా ఉంటుందని, కేవలం గంట వ్యవధిలో వెళ్లొచ్చని అభిప్రాయపడ్డారు. ట్రంప్ హెచ్చరికపై చైనా స్పందిస్తూ అఫ్గాన్‌ భవిష్యత్తు అక్కడి ప్రజల చేతుల్లోనే ఉందని పేర్కొంది. ప్రాంతీయ ఉద్రిక్తతలను పెంచడంవల్ల మద్దతు లభించదని ఆ దేశ విదేశాంగశాఖ అధికార ప్రతినిధి లిన్‌ జియాన్‌ అన్నారు. కాగా ఎయిర్‌బేస్‌ను వదులుకునేందుకు సిద్ధంగా లేమని అఫ్గాన్‌ అధికారులు ఇప్పటికే స్పష్టంచేశారు.
