న్యూఢిల్లీ : మైక్రోసాఫ్ట్ సహ వ్యవస్ధాపకుడు, బిలియనీర్ బిల్ గేట్స్ రోటీ చేసేందుకు ప్రయత్నించిన వీడియో సోషల్ మీడియాలో వైరల్గా మారింది. అమెరికన్ సెలబ్రిటీ చెఫ్ ఇటన్ బెనత్తో కలిసి బిల్ గేట్స్ రోటీ తయారు చేసేందుకు ట్రై చేయడం ఈ వీడియోలో కనిపిస్తుంది. ఈ వీడియోను ట్విట్టర్లో పోస్ట్ చేసిన ఇటన్ తానూ బిల్గేట్స్ కలిసి ఇండియన్ రోటీని తయారు చేశామని రాసుకొచ్చారు.
.@BillGates and I had a blast making Indian Roti together. I just got back from Bihar, India where I met wheat farmers whose yields have been increased thanks to new early sowing technologies and women from "Didi Ki Rasoi" canteens who shared their expertise in making Roti. pic.twitter.com/CAb86CgjR3
— Eitan Bernath (@EitanBernath) February 2, 2023
తాను ఇటీవల భారత్లోని బిహార్ను సందర్శించి తిరిగి వచ్చానని, అక్కడ గోధుమ రైతులను కలిసి అక్కడ టెక్నాలజీతో పంట త్వరగా చేతికందడం చూశానని చెప్పారు. దీదీ కీ రసోయి క్యాంటిన్లలో మహిళలు తనకు రోటీలు చేయడంలో మెళకువలు నేర్పించారని ఈ పోస్ట్లో రాసుకొచ్చారు. ఈ వీడియోలో ఇటన్, బిల్గేట్స్ రోటీలు తయారు చేస్తుండగా గేట్స్ రోటీని గుండ్రంగా చేయలేకపోవడం కనిపిస్తుంది. ఇటన్ పర్ఫెక్ట్గా రోటీలు తయారు చేయడం ఆపై ఇద్దరూ వాటిని రుచిచూడటం గమనించవచ్చు.
ఇక గేట్స్ ప్రస్తుతం తన కుటుంబ సభ్యులతో ఆనందంగా గడపడంతో పాటు ఆరోగ్యం, ఏఐ, వాతావరణ మార్పుల వంటి అంశాలపై దృష్టి సారించారు. రెండు దశాబ్ధాల కిందట చేపట్టిన ప్రాజెక్టులపై పనిచేయడం కొనసాగిస్తానని గేట్స్ ఇటీవల వెల్లడించారు. రాబోయే రోజుల్లో చాట్జీపీటీ వంటి కృత్రిమ మేథ ప్రాధాన్యత సంతరించుకుంటుందని చెప్పుకొచ్చారు. పర్సనల్ కంప్యూటర్ల తరహాలో రాబోయే సంవత్సరాల్లో కృత్రిమ మేథ మానవ జీవితాల్లో భాగం కానుందని అన్నారు.