Israel vs Iran | ఇరాన్‌ మాట తప్పింది.. గట్టిగా బదులిస్తాం : ఇజ్రాయెల్‌

Israel vs Iran | ఇజ్రాయెల్‌-ఇరాన్ (Israel vs Iran) దేశాల మధ్య గత 12 రోజులుగా జరుగుతున్న యుద్ధంతో పశ్చిమాసియా అల్లకల్లోలంగా మారింది. ఈ క్రమంలో మంగళవారం ఉదయం ఇరుదేశాల మధ్య కాల్పుల విరమణ ఒప్పందం కుదిరింది.

Israel vs Iran : ఇజ్రాయెల్‌-ఇరాన్ (Israel vs Iran) దేశాల మధ్య గత 12 రోజులుగా జరుగుతున్న యుద్ధంతో పశ్చిమాసియా అల్లకల్లోలంగా మారింది. ఈ క్రమంలో మంగళవారం ఉదయం ఇరుదేశాల మధ్య కాల్పుల విరమణ ఒప్పందం కుదిరింది. అయితే ఒప్పందం కుదిరిన కొన్ని గంటలకే టెహ్రాన్ (Tehran) ఆ ఒప్పందాన్ని ఉల్లంఘించిందని, తమపై క్షిపణులతో దాడులకు దిగిందని టెల్‌అవీవ్‌ (Tel Aviv) ఆరోపిస్తోంది. ఒప్పందాన్ని ఉల్లంఘించిన ఇరాన్‌కు గట్టిగా బదులిస్తామని హెచ్చరించింది.

కాల్పుల విరమణ ఒప్పందం కుదిరిన రెండు గంటలకే తమ గగనతలంపైకి ఇరాన్‌ నుంచి రెండు బాలిస్టిక్‌ క్షిపణులు దూసుకొచ్చాయని ఇజ్రాయెల్‌ సైన్యం తెలిపింది. ఈ నేపథ్యంలో ఉత్తర ఇజ్రాయెల్‌లో సైరన్‌లు మోగాయని, ఆయా ప్రాంతాల ప్రజలు తదుపరి ఆదేశాలు వచ్చే వరకు సురక్షిత ప్రాంతాల్లోనే ఉండాలని ఆదేశాలు వెళ్లాయని వెల్లడించింది.

కాల్పుల విరమణ ఒప్పందాన్ని ఉల్లంఘించిన ఇరాన్‌పై గట్టిగా స్పందించాలని తాను ఐడీఎఫ్‌ను ఆదేశించానని ఇజ్రాయెల్‌ రక్షణ మంత్రి కాట్జ్‌ తెలిపారు. టెహ్రాన్‌లోని అతి ముఖ్యమైన ప్రాంతాలే లక్ష్యంగా దాడులు చేయాలని సూచించినట్లు వెల్లడించారు. తమ వైమానిక దళాన్ని, సైన్యాన్ని అప్రమత్తంగా ఉండాలని హెచ్చరికలు జారీ చేసినట్లు చెప్పారు.

ఇరాన్- ఇజ్రాయెల్‌ మధ్య కాల్పుల విరమణ ఒప్పందం జరగనుందని తొలుత అమెరికా అధ్యక్షుడు డొనాల్డ్‌ ట్రంప్‌ ప్రకటించారు. ఆ తర్వాత ఇరాన్‌ దీనిపై స్పందించిన తీరు గందరగోళానికి దారితీసింది. ఇంకా కాల్పుల విరమణ ఒప్పందం చేసుకోలేదని చెబుతూనే.. సైనిక కార్యకలాపాలు ముగిశాయని అర్థం వచ్చేలా పేర్కొంది. తర్వాత ఇరుదేశాల మధ్య దాడులు జరిగాయి. ఆ వెంటనే కాల్పుల విరమణ అమల్లోకి వచ్చిందని ఇరాన్‌ ప్రకటించింది. ఇజ్రాయెల్‌ కూడా ట్రంప్ ప్రతిపాదనను అంగీకరించినట్లు తెలిపింది.

Read More >>

ముగిసిన ఇజ్రాయెల్‌-ఇరాన్‌ యుద్ధం.. భారత స్టాక్‌ మార్కెట్లలో జోష్‌

కాల్పుల విరమణ మాకు ఒకే.. థ్యాంక్యూ ట్రంప్‌ : నెతన్యాహు

చెన్నై నుంచి పోటీ చేసే దమ్ముందా?.. పవన్ కళ్యాణ్‌కు తమిళనాడు మంత్రి స‌వాల్

పిచ్చుకల్లోనూ అద్భుతమైన ఇంజినీర్.. అబ్బురపరుస్తున్న గూళ్ల నిర్మాణం

ఆ వ్యాఖ్యలు బీజేపీలో చేరికకు సంకేతాలు కావు : శశిథరూర్‌