ట్రంప్‌నకు మోదీ కాల్‌ చేయనందుకే!

భారత్‌-అమెరికా మధ్య వాణిజ్య ఒప్పందం కుదరకపోవడానికి కారణం ప్రధాన మంత్రి నరేంద్ర మోదీ అని అమెరికా వాణిజ్య శాఖ మంత్రి హోవార్డ్‌ లుట్నిక్‌ చెప్పారు. ఆయన ఓ పాడ్‌కాస్ట్‌ ఇంటర్వ్యూలో మాట్లాడుతూ, ఈ ఒప్పందం ఫ్రేమ్‌వర్క్‌ సిద్ధమైందని, అయితే, తుది ఆమోదం ఓ వ్యక్తిపై ఆధారపడి ఉన్న విషయం మొదటి నుంచి స్పష్టమేనని తెలిపారు.

• భారత్‌, అమెరికా మధ్య వాణిజ్య ఒప్పందం ఆగింది
• అమెరికా వాణిజ్య శాఖ మంత్రి హోవార్డ్‌ లుట్నిక్‌
• తోసిపుచ్చిన భారత్‌

న్యూఢిల్లీ: భారత్‌-అమెరికా మధ్య వాణిజ్య ఒప్పందం కుదరకపోవడానికి కారణం ప్రధాన మంత్రి నరేంద్ర మోదీ అని అమెరికా వాణిజ్య శాఖ మంత్రి హోవార్డ్‌ లుట్నిక్‌ చెప్పారు. ఆయన ఓ పాడ్‌కాస్ట్‌ ఇంటర్వ్యూలో మాట్లాడుతూ, ఈ ఒప్పందం ఫ్రేమ్‌వర్క్‌ సిద్ధమైందని, అయితే, తుది ఆమోదం ఓ వ్యక్తిపై ఆధారపడి ఉన్న విషయం మొదటి నుంచి స్పష్టమేనని తెలిపారు. ఆ వ్యక్తికి ఇటువంటి ఒప్పందాలకు అధికారికంగా ఆమోదం తెలిపే అధికారం ఉందన్నారు. ఈ ఒప్పందం ముందుకు కదలాలంటే మోదీ అమెరికా అధ్యక్షుడు డొనాల్డ్‌ ట్రంప్‌నకు వ్యక్తిగతంగా ఫోన్‌ చేయవలసి ఉంటుందని తాను భారత వాణిజ్య ప్రతినిధులకు చెప్పానని తెలిపారు.

భారత ప్రతినిధులు దీన్ని అసౌకర్యంగా భావించారని, మోదీ ట్రంప్‌నకు ఫోన్‌ చేయలేదని చెప్పారు. ఫలితంగా ఈ ప్రక్రియ నిలిచిపోయిందన్నారు.“మేం అంగీకరించిన ఒప్పందాన్ని భారత ప్రతినిధులు మాకు గుర్తు చేశారు. నాకు గుర్తుంది. ఈ ఒప్పందానికి మీరు ఒప్పుకున్నారని వారు నాకు చెప్పారు. అప్పుడు అంగీకరించాను, కానీ ఇప్పుడు కాదు అని నేను వారికి చెప్పాను” అని లుట్నిక్‌ తెలిపారు. “మోదీ ట్రంప్‌నకు ఫోన్‌ చేయలేదు. ఆ తర్వాత మేం అనేక ఒప్పందాలు చేసుకున్నాం. అనంతరం భారత్‌ ఫోన్‌ చేసింది, మేం సిద్ధమని చెప్పింది. దేనికి సిద్ధం? అని నేను అన్నాను.

అది అవాస్తవం: భారత్‌

భారత్‌ స్పందిస్తూ, లుట్నిక్‌ వివరణ సరిగ్గా లేదని చెప్పింది. విదేశాంగ శాఖ అధికార ప్రతినిధి రణధీర్‌ జైశ్వాల్‌ మీడియాతో మాట్లాడుతూ, అమెరికా, భారత్‌ అనేక సందర్భాల్లో ట్రేడ్‌ డీల్‌ కుదిరే దశకు వచ్చాయని తెలిపారు. ఈ చర్చల స్వభావం గురించి లుట్నిక్‌ ఇచ్చిన వివరణ, చేసిన వ్యాఖ్యలు కచ్చితమైనవి కావన్నారు.