బీఆర్‌ఎస్‌ నిర్మించింది.. కాంగ్రెస్‌ విస్మరించింది..

ఎస్‌పీఆర్‌హిల్స్‌ వాసులకు తాగునీటి కష్టాలు తప్పేలా లేవు. జూబ్లీహిల్స్‌ నియోజకవర్గం రహమత్‌ నగర్‌, బోరబండ తదితర ప్రాంతాల్లోని 50కు పైగా బస్తీల్లోని వేలాది మంది ప్రజల చిరకాల వాంఛగా ఉన్న వాటర్‌ రిజర్వాయర్‌ ఈ వేసవిలోనైనా అందుబాటులోకి వస్తుందా అన్న అనుమానాలు వ్యక్తమవుతున్నాయి.

• ఎస్‌పీఆర్‌హిల్స్‌లో అలంకారప్రాయంగా భారీ రిజర్వాయర్‌
• బీఆర్‌ఎస్‌ హయాంలో నిర్మాణం..
• ప్రారంభోత్సవానికి మీనవేషాలు లెక్కిస్తున్న ప్రస్తుత పాలకులు
• బస్తీల్లో తప్పని తాగునీటి కష్టాలు

జూబ్లీహిల్స్‌, మే 14: ఎస్‌పీఆర్‌హిల్స్‌ వాసులకు తాగునీటి కష్టాలు తప్పేలా లేవు. జూబ్లీహిల్స్‌ నియోజకవర్గం రహమత్‌ నగర్‌, బోరబండ తదితర ప్రాంతాల్లోని 50కు పైగా బస్తీల్లోని వేలాది మంది ప్రజల చిరకాల వాంఛగా ఉన్న వాటర్‌ రిజర్వాయర్‌ ఈ వేసవిలోనైనా అందుబాటులోకి వస్తుందా అన్న అనుమానాలు వ్యక్తమవుతున్నాయి. బీఆర్‌ఎస్‌ ప్రభుత్వ హయాంలో నిర్మాణం పూర్తి చేసుకున్న ఈ భారీ వాటర్‌ రిజర్వాయర్‌ ఇటీవల పైప్‌లైన్‌ విస్తరణ.. ఇతర పనులతో తుది మెరుగులు దిద్దుకున్నా.. ప్రారంభానికి నోచుకోకపోవడంతో ప్రజలకు నీటి కోసం తిప్పలు తప్పడం లేదు.

రిజర్వాయర్‌ పక్కనే ఉన్నా..

ఎస్‌పీఆర్‌హిల్స్‌లోని నిర్మించిన వాటర్‌ రిజర్వాయర్‌ ప్రారంభానికి నోచుకోకపోవడంతో ప్రజలు అవస్థలు పడుతున్నారు. ప్రతిభానగర్‌లో 2 నెలలుగా నీటికి ఇబ్బందులు పడుతున్నారు. ఈ బస్తీలో 100కు పైగా కనెక్షన్లు ఉన్నాయని..ఇటీవల బస్తీకి కింద ప్రాంతంలో 20కు పైగా కొత్త కనెక్షన్లు ఇవ్వడంతో మరింత నీటికి కటకట ఏర్పడిందని స్థానికులు ఆవేదన వ్యక్తం చేస్తున్నారు.

2 నెలలుగా తీవ్ర ఇబ్బందులు

ప్రతిభానగర్‌లో 2 నెలలుగా నీటి కోసం ఇబ్బందులు పడుతున్నాం. వాటర్‌ ప్రెషర్‌ లేకపోవడంతో వేసవిలో మా కష్టాలు రెట్టింపయ్యాయి..

-ఇస్మాయిల్‌ బీ, స్థానికురాలు