ట్రై కమిషనరేట్లకు కొత్త బాస్‌లు

హైదరాబాద్‌ మహానగర ట్రై పోలీస్‌ కమిషనరేట్లకు కొత్త పోలీస్‌ బాస్‌లను నియమిస్తూ ప్రభుత్వం మంగళవారం ఉత్తర్వులు జారీ చేసింది.

• నగర నయా కొత్వాల్‌గా కొత్తకోట శ్రీనివాస్‌రెడ్డి
• సైబరాబాద్‌ పోలీస్‌ కమిషనర్‌గా అవినాశ్‌ మహంతి
• రాచకొండ పోలీస్‌ కమిషనర్‌గా సుధీర్‌ బాబు
• ఉత్తర్వులు జారీ చేసిన ప్రభుత్వం

హైదరాబాద్‌ మహానగర ట్రై పోలీస్‌ కమిషనరేట్లకు కొత్త పోలీస్‌ బాస్‌లను నియమిస్తూ ప్రభుత్వం మంగళవారం ఉత్తర్వులు జారీ చేసింది. అదనపు డీజీపీగా (అర్గనైజేషన్‌ అండ్‌ లీగల్‌) ఉన్న 1994 బ్యాచ్‌కు చెందిన కొత్తకోట శ్రీనివాస్‌రెడ్డిని హైదరాబాద్‌ పోలీస్‌ కమిషనర్‌గా నియమించింది. సైబరాబాద్‌ జాయింట్‌ సీపీ (అడ్మిన్‌)గా కొనసాగుతున్న ఐజీ 2005 బ్యాచ్‌కు చెందిన అవినాశ్‌ మహంతిని సైబరాబాద్‌ పోలీస్‌ కమిషనర్‌గా, 2001 (ఏపీఎస్‌) బ్యాచ్‌కు చెందిన జి.సుధీర్‌బాబును రాచకొండ పోలీస్‌ కమిషనర్‌గా నియమించారు. హైదరాబాద్‌ సీపీగా పనిచేస్తున్న సందీప్‌ శాండిల్యను తెలంగాణ స్టేట్‌ యాంటీ నార్కొటిక్‌ బ్యూరో డైరెక్టర్‌గా నియమించింది. రాచకొండ, సైబరాబాద్‌ సీపీలుగా కొనసాగిన డీఎస్‌ చౌహాన్‌, స్టీఫెన్‌ రవీంద్రలను డీజీ కార్యాలయంలో రిపోర్టు చేయాల్సిందిగా ఆదేశాలు జారీ చేశారు.

– సిటీబ్యూరో, డిసెంబర్‌ 12 (నమస్తే తెలంగాణ)

సిటీబ్యూరో, డిసెంబర్‌ 12 (నమస్తే తెలంగాణ): హైదరాబాద్‌ మహానగర ట్రై పోలీస్‌ కమిషనరేట్లకు కొత్త పోలీస్‌ బాస్‌లను నియమిస్తూ ప్రభుత్వం మంగళవారం ఉత్తర్వులు జారీ చేసింది. అదనపు డీజీపీ (ఆర్గనైజేషన్‌ అండ్‌ లీగల్‌) కొత్తకోట శ్రీనివాస్‌రెడ్డిని హైదరాబాద్‌ పోలీస్‌ కమిషనర్‌గా, సైబరాబాద్‌ జాయింట్‌ సీపీ (అడ్మిన్‌)గా కొనసాగుతున్న ఐజీ (2005 బ్యాచ్‌) అవినాష్‌ మహంతిని సైబరాబాద్‌ పోలీస్‌ కమిషనర్‌గా, 2001 బ్యాచ్‌కు చెందిన జి.సుధీర్‌బాబును రాచకొండ పోలీస్‌ కమిషనర్‌గా నియమించారు.

హైదరాబాద్‌ సీపీగా పనిచేస్తున్న సందీప్‌ శాండిల్యను తెలంగాణ స్టేట్‌ యాంటీ నార్కొటిక్‌ బ్యూరో డైరెక్టర్‌గా నియమించారు. రాచకొండ, సైబరాబాద్‌ సీపీలుగా కొనసాగిన డీఎస్‌ చౌహాన్‌, స్టీఫెన్‌ రవీంద్రను డీజీపీ కార్యాలయంలో రిపోర్టు చేయాల్సిందిగా ఆదేశాలు జారీ చేశారు. సిబ్బందికి దిశా నిర్దేశం చేయడం.. ప్రజలకు పారదర్శకంగా సేవలందించేలా చేయడంతో పాటు చట్టాన్ని అతిక్రమించే వారికి సింహ స్వప్నంలా ఉంటారని ట్రై పోలీసు కమిషనరేట్ల కొత్త కమిషనర్లకు పేరుంది.

సిన్సియర్‌ అధికారిగా గుర్తింపు..

• 1994 ఐపీఎస్‌ బ్యాచ్‌కు చెందిన కొత్తకోట శ్రీనివాస్‌రెడ్డి ఎక్కడ పనిచేసినా అక్కడ ఒక ప్రత్యేక గుర్తింపును తెచ్చుకుంటారు. సిన్సియర్‌ అధికారిగా ఆయనకు పేరుంది. అత్యధికంగా బదిలీ అయ్యే ఐపీఎస్‌ అధికారుల్లో శ్రీనివాస్‌రెడ్డి ఒకరు అనే పేరుంది.
• నిజామాబాద్‌ జిల్లా బోధన్‌ అదనపు ఎస్పీగా మొదటి పోస్టింగ్‌ పొందారు. ఆ తరువాత కామారెడ్డి, మెదక్‌, 8వ బెటాలియన్‌ కమాండెంట్‌, 2000 నుంచి 2002 వరకు నెల్లూరు ఎస్పీగా పనిచేశారు. 2002 నుంచి 2004 వరకు హైదరాబాద్‌ కమిషనరేట్‌లో ట్రాఫిక్‌ డీసీపీగా పనిచేశారు. వరంగల్‌ ఎస్పీ, గ్రే హౌండ్స్‌ కమాండర్‌, మహబూబ్‌నగర్‌ ఎస్పీ, ఏసీబీ జాయింట్‌ డైరెక్టర్‌గా పనిచేశారు. హైదరాబాద్‌ రేంజ్‌ డీఐజీగా, ఏసీబీ అదనపు డైరెక్టర్‌గా విధులు నిర్వహించారు. 2012 నుంచి 2014 వరకు వైజాగ్‌లో కోస్టల్‌ సెక్యూరిటీ పోలీస్‌ ఐజీగా బాధ్యతలు నిర్వహించారు. తెలంగాణ రాష్ట్రం ఏర్పడిన తరువాత ఐజీ ట్రైనింగ్‌ అండ్‌ లీగల్‌, గ్రేహౌండ్స్‌, అక్టోపస్‌ ఐజీగా పనిచేశారు. ఈ ఏడాది జనవరి నెలలో అదనపు డీజీగా పదోన్నతి పొందడంతో ఆయనకు అదనపు డీజీ ఆర్గనైజేషన్‌ అండ్‌ లీగల్‌ బాధ్యతలను అప్పగించారు. తాజాగా.. హైదరాబాద్‌ సీపీగా నియమిస్తూ ప్రభుత్వం ఉత్తర్వులు జారీ చేసింది.
• నక్సల్స్‌ ప్రభావిత ప్రాంతాలలో పనిచేశారు. మహబూబ్‌నగర్‌ ఎస్పీగా పనిచేస్తున్న సమయంలో మావోయిస్టులకు సంబంధించిన రాకెట్‌ లాంచర్లను గుర్తించి పట్టుకున్నారు. ఇది దేశ వ్యాప్తంగా సంచలనం రేపింది. నెల్లూరులో పనిచేస్తున్న సమయంలో క్రిమినల్స్‌ గ్యాంగ్‌పై ఉక్కుపాదం మోపారు. ఏసీబీలో పనిచేస్తున్న సమయంలో లిక్కర్‌ సిండికేట్‌ మాఫియాతో ఊచలు లెక్కించేలా చేశారు. తెలంగాణ రాష్ట్రం ఏర్పడిన తరువాత పోలీస్‌ రిక్రూట్‌మెంట్‌లో 12,000 మందికి శిక్షణ ఇచ్చారు. యూనియన్‌ హోం మినిస్టర్‌ నుంచి 2021లో ఉత్తమ శిక్షణా అవార్డును స్వీకరించారు. గ్రే హౌండ్స్‌కు సంబంధించి దీర్ఘకాలికంగా పెండింగ్‌లో ఉన్న 143 ఎకరాలకు సంబంధించిన కేసును పకడ్బందీగా ఆధారాలతో సుప్రీం కోర్టులో గెలిచే విధంగా చేయడంలో ఆయన తనవంతు పాత్ర పోషించారు.
• శ్రీనివాస్‌రెడ్డి సేవలను గుర్తించిన కేంద్ర ప్రభుత్వం 2010లో ఇండియన్‌ పోలీస్‌ మెడల్‌ను, 2019లో ప్రెసిండెన్సియల్‌ పోలీస్‌ మెడల్‌, 2023లో అతి ఉత్‌కర్షిత్‌ సేవా పతకం అవార్డును స్వీకరించి.. బెస్ట్‌ పోలీస్‌ అధికారిగా దేశ వ్యాప్తంగా గుర్తింపు తెచ్చుకున్నారు. అహ్మదాబాద్‌ ఐఐఎంలో నిర్వహించిన చీఫ్‌ ఇన్‌ఫర్మేషన్‌ ఆఫీసర్స్‌ కోర్సు, యూకే కేంబ్రిడ్జి యూనివర్సిటీలో ఐపీఎస్‌ ఆఫీసర్స్‌ మిడ్‌టర్మ్‌ కోర్సు, యాంటీ టెర్రరిజం అసిస్టెన్స్‌ (ఏటీఏ) కోర్సును హంగేరీలోని ఇంటర్నేషనల్‌ లా ఎన్‌ఫోర్స్‌మెంట్‌ అకాడమీలో చేశారు.

సంచలన కేసుల ఛేదనలో దేశవ్యాప్త గుర్తింపు..

• 2005వ బ్యాచ్‌కు చెందిన అవినాష్‌ మహంతి ప్రస్తుతం సైబరాబాద్‌ జాయింట్‌ సీపీ (అడ్మిన్‌)గా కొనసాగుతున్నారు. అక్కడ పని చేస్తుండగానే ఈ ఏడాది మే నెలలో ఐజీగా పదోన్నతి పొంది.. అదనపు సీపీ (అడ్మిన్‌)గా విధులు నిర్వహిస్తున్నారు. అవినాష్‌ మహంతి కుటుంబంలో ముగ్గురు ఐపీఎస్‌ అధికారులు ఉన్నారు. ఇందులో తండ్రి ఏకే. మహంతి మాజీ డీజీపీ. సోదరుడు అభిషేక్‌ మహంతి ప్రస్తుతం కరీంనగర్‌ కమిషనర్‌గా పనిచేస్తున్నారు. ఎన్నికల వచ్చాయంటే ఈ కుటుంబంలోని ముగ్గురు ఐపీఎస్‌ అధికారులు అందరికీ గుర్తుకు వస్తారు. 2009 ఎన్నికల సమయంలో అప్పటి డీజీపీ ఎస్‌ఎస్‌పీ యాదవ్‌ చేసిన వ్యాఖ్యల నేపథ్యంలో ఆయనపై ఎన్నికల కమిషన్‌ బదిలీ వేటు వేసింది. ఆయన స్థానంలో 1975 బ్యాచ్‌కు చెందిన ఏకే. మహంతిని నియమించింది. 2018లో జరిగిన ఎన్నికల సందర్భంగా కొడంగల్‌లో కాంగ్రెస్‌ నుంచి పోటీ చేసిన (ప్రస్తుత సీఎం) రేవంత్‌రెడ్డి ఇంటిపై పోలీసులు చేసిన దాడి వివాదాస్పదమైంది. దీనిని సీరియస్‌గా తీసుకున్న ఎన్నికల సంఘం వికారాబాద్‌ ఎస్పీ అన్నపూర్ణను బదిలీ చేస్తూ.. ఆ స్థానంలో హైదరాబాద్‌ సీసీఎస్‌ డీసీపీగా బాధ్యతలు నిర్వహిస్తున్న అవినాష్‌ మహంతిని నియమించింది. 2023 ఎన్నికలలో కరీంనగర్‌ పోలీస్‌ కమిషనర్‌ను బదిలీ చేస్తూ.. ఆ స్థానంలో 2011 బ్యాచ్‌కు చెందిన ఐపీఎస్‌ అధికారి అభిషేక్‌ మహంతిని నియమించింది.
• మొదటి పోస్టింగ్‌ చత్తీస్‌ఘడ్‌. ఆ తరువాత ఏపీ క్యాడర్‌కు వచ్చారు. మెదక్‌ ఎస్పీగా, సైబరాబాద్‌ ట్రాఫిక్‌ డీసీపీ, హైదరాబాద్‌ కమిషనరేట్‌లో డిటెక్టివ్‌ డిపార్టుమెంట్‌ (సీసీఎస్‌) డీసీపీగా పనిచేస్తూ.. ఎన్నికల సంఘం నియామకంతో తాత్కాలికంగా వికారాబాద్‌కు వెళ్లారు. తిరిగి సీసీఎస్‌ డీసీపీగా కొనసాగుతూ.. డీఐజీగా పదోన్నతి పొందారు. అక్కడి నుంచి సైబరాబాద్‌ జాయింట్‌ సీపీగా బదిలీ అయ్యారు. అక్కడే ఐజీగా పదోన్నతి పొందారు. ప్రస్తుతం సైబరాబాద్‌ పోలీస్‌ కమిషనర్‌గా నియమితులయ్యారు.
• హైదరాబాద్‌ సీసీఎస్‌లో పనిచేస్తూ తనకంటూ ఓ ప్రత్యేక ముద్ర వేసుకున్నారు. వేల కోట్ల విలువైన ప్రభుత్వ భూములు పరాధీనం కాకుండా.. ప్రభుత్వానికి చెందేలా ఆయా కేసులపై దర్యాప్తు జరిపి.. పక్కా సాక్ష్యాలను సేకరించి, న్యాయస్థానాలలో ఆ భూములు ప్రభుత్వ పరం అయ్యే విధంగా తన వంతు పాత్ర పోషించారు. దేశ వ్యాప్తంగా సంచలనం సృష్టిస్తూ.. అమాయక ప్రజలను పట్టి పీడించిన కలర్‌ ప్రిడిక్షన్‌, లోన్‌ యాప్‌ కేసులను ఛేదించి విదేశీయులను సైతం అరెస్ట్‌ చేశారు. మొదటి సారిగా భారతీయుల సొమ్ము విదేశాలకు వెళ్తుందని గుర్తించి.. కేంద్రానికి చెప్పారు. జీహెచ్‌ఎంసీలో జరిగిన మట్టి కుంభకోణంలో ఎవరినీ వదిలిపెట్టలేదు.

కమిషనరేట్‌పై పట్టు..

హైదరాబాద్‌ ట్రాఫిక్‌ అదనపు సీపీగా కొనసాగుతున్న జి.సుధీర్‌బాబుకు హైదరాబాద్‌తో పాటు రాచకొండ కమిషనరేట్‌పై గట్టి పట్టుంది. మహబూబ్‌నగర్‌ ఎస్పీగా, టాస్క్‌ఫోర్స్‌, అల్వాల్‌, శంషాబాద్‌ డీసీపీగా, వరంగల్‌ సీపీగా పనిచేశారు. అనంతరం రాచకొండ జాయింట్‌ సీపీగా పనిచేసిన ఆయన.. ఐజీగా పదోన్నతి పొందిన తరువాత హైదరాబాద్‌ ట్రాఫిక్‌ అదనపు సీపీగా బాధ్యతలు చేపట్టారు. ఎక్కడ పనిచేసినా అక్కడ ఆయన తనకంటూ ఒక ముద్ర వేసుకుంటారు. సిబ్బంది కచ్చితంగా విధులు నిర్వహించేలా చేయడం, ప్రజలకు పారదర్శకంగా సేవలందించేలా సిబ్బందికి దిశా నిర్దేశం చేస్తూ సేవలందిస్తారు. రాచకొండలో జాయింట్‌ సీపీగా పనిచేసిన అనుభవం ఉండటంతో కమిషనరేట్‌పై మంచి పట్టుంది. దీంతో ప్రభుత్వం ఆయనను రాచకొండ పోలీస్‌ కమిషనర్‌గా నియమించింది.