నిబంధనల ప్రకారమే అనుమతులు

సికింద్రాబాద్‌ కంటోన్మెంట్‌ బోర్డు కార్యాలయంలో గురువారం బోర్డు పాలకమండలి సమావేశం జరిగింది. గత 30 ఏండ్లుగా నివాస గృహాలనుంచి 24.60%, వాణిజ్య సముదాయాలనుంచి 27.60% చొప్పున పన్నును వసూలు చేస్తున్నామని, 3% చొప్పున పెంచాలన్న ప్రతిపాదనపై పాలకమండలి సుదీర్ఘ చర్చలు

బస్‌షెల్టర్ల ఏర్పాటు టెండర్‌ ప్రక్రియకు నిర్ణయం
సాదాసీదాగా సాగిన బోర్డు సమావేశం

సికింద్రాబాద్‌, ఏప్రిల్‌ 7: సికింద్రాబాద్‌ కంటోన్మెంట్‌ బోర్డు కార్యాలయంలో గురువారం బోర్డు పాలకమండలి సమావేశం జరిగింది. గత 30 ఏండ్లుగా నివాస గృహాలనుంచి 24.60%, వాణిజ్య సముదాయాలనుంచి 27.60% చొప్పున పన్నును వసూలు చేస్తున్నామని, 3% చొప్పున పెంచాలన్న ప్రతిపాదనపై పాలకమండలి సుదీర్ఘ చర్చలు జరిపింది. ఈ విషయమై క్షేత్రస్థాయిలో నెలకొన్న పరిస్థితులు, జీహెచ్‌ఎంసీలో ప్రస్తుతం విధిస్తున్న పన్ను తదితర అంశాలను అధ్యయనం చేసిన అనంతరం ఓ నిర్ణయం తీసుకోవాలని నిర్ణయించిన పాలకమండలి సదరు, బాధ్యతలను జాయింట్‌ సీఈవోకు అప్పగించింది. బోర్డు అధ్యక్షుడు బ్రిగేడియర్‌ కే సోమశంకర్‌ నేతృత్వంలో జరిగిన ఈ సమావేశంలో ఎమ్మెల్యే సాయన్న, బోర్డు నామినేటెడ్‌ సభ్యుడు రామకృష్ణ, సీఈవో అజిత్‌రెడ్డి, జాయింట్‌ సీఈవో విజయ్‌కుమార్‌ బాలన్‌ నాయర్‌లు పాల్గొన్నారు.

బోర్డు పాలకమండలి ఆమోదించిన ప్రతిపాదనలు

• ప్లాట్ల సబ్‌ డివిజన్‌కు సంబంధించిన నాలుగు ప్రతిపాదనల్లో ఓ ప్రతిపాదనను పెండింగ్‌లో పెట్టి ఇతర మూడింటిని ఆమోదించింది. గిప్టెడ్‌ కేటగిరీలో 34, అన్‌గిఫ్టెడ్‌ కేటగిరీలో 14, ఓపెన్‌ ప్లాట్‌ కేటగిరిలో 12, ఓల్డ్‌ హౌస్‌ కేటగిరి కింద ప్రతిపాదించిన 5 ప్రతిపాదనలకు బోర్డు ఆమోదముద్ర వేసింది. కాగా, మహేంద్రాహిల్స్‌ లో మూడు భవన నిర్మాణాల అనుమతులకు సంబంధించి నిబంధనల ప్రకారమే అనుమతులు ఇస్తామని స్పష్టం చేసిన బ్రిగేడియర్‌, మూడు ప్రతిపాదనలను ఆమోదించారు.
• రోడ్లు, భవనాలు, భూగర్భ డ్రైనేజీ, మంచినీటి పైపులైన్ల నిర్మాణాలకు సంబంధించిన ప్రతిపాదనలకు బోర్డు ఆమోదముద్ర వేసింది.
• బొల్లారం ఆసుపత్రికి మందులు, సర్జికల్‌ సామగ్రి, హార్టికల్చర్‌ పనుల నిర్వాహణకుగాను నాలుగు వాహనాలను అద్దెకు తీసుకోవాలని నిర్ణయించింది.
• బోర్డు పరిధిలో అధునాతన బస్‌షెల్టర్లను ఏర్పాటు చేసే టెండరును ప్రకాశ్‌ ఆర్ట్స్‌ ప్రైవేటు లిమిటెడ్‌కు అప్పగించాలని పాలకమండలి నిర్ణయించింది. సదరు సంస్థ ఏడు సంవత్సరాలపాటు షెల్టర్ల నిర్వహణ బాధ్యతలను వహిస్తుందని సీఈవో స్పష్టం చేశారు.
• అసిస్టెంట్‌ మెడికల్‌ ఆఫీసర్స్‌కు సంబంధించిన రెండు పోస్టులను రెసిడెంట్‌ మెడికల్‌ ఆఫీసర్స్‌ అప్‌గ్రేడ్‌ చేయాలని నిర్ణయించింది. కంటోన్మెంట్‌ బిల్డింగ్‌ ప్లాన్లు, లేఅవుట్లను గీయడానికి ఎనిమిది మంది ఇంజినీర్లు/ ఆర్కిటెక్చర్‌కు అధికారిక లైసెన్సులను జారీ చేయాలన్న ప్రతిపాదనకు బోర్డు ఆమోదముద్ర వేసింది.