ప్రజాపాలనంతా.. గందరగోళమే..

‘మీకు రేషన్‌ కార్డు ఉందా.. ఆధార్‌ కార్డులో అడ్రస్‌ ఇక్కడే ఉందా.. రేషన్‌ కార్డు లేకుంటే స్కీమ్స్‌ రావు.. రేషన్‌ కార్డు కోసం తెల్లకాగితంలో రాసివ్వండి.. ఒక కుటుంబంలో ఒకటే స్కీమ్‌ వస్తుంది” అంటూ ‘ప్రజాపాలన’ కార్యక్రమంలో దరఖాస్తులు చేసుకునేందుకు వచ్చిన వారికి అధికారులు చుక్కలు చూపించారు.

• నియోజకవర్గంలోని ‘ప్రజాపాలన’ప్రారంభం
• రేషన్‌ కార్డుల కోసమే భారీగా డిమాండ్‌..
• జనంతో కిక్కిరిసిన జీరాక్స్‌ సెంటర్లు
• సౌకర్యాల కల్పనలో అధికారుల విఫలం..

బంజారాహిల్స్‌/బన్సీలాల్‌పేట్‌/బేగంపేట్‌/అమీర్‌పేట్‌/ఖైరతాబాద్‌/హిమాయత్‌నగర్‌, డిసెంబర్‌ 28: ‘మీకు రేషన్‌ కార్డు ఉందా.. ఆధార్‌ కార్డులో అడ్రస్‌ ఇక్కడే ఉందా.. రేషన్‌ కార్డు లేకుంటే స్కీమ్స్‌ రావు.. రేషన్‌ కార్డు కోసం తెల్లకాగితంలో రాసివ్వండి.. ఒక కుటుంబంలో ఒకటే స్కీమ్‌ వస్తుంది” అంటూ ‘ప్రజాపాలన’ కార్యక్రమంలో దరఖాస్తులు చేసుకునేందుకు వచ్చిన వారికి అధికారులు చుక్కలు చూపించారు. దరఖాస్తులు ఎలా నింపాలో.. రేషన్‌ కార్డుల కోసం ఎవర్ని అడగాలో తెలియక జనం ఆయోమయానికి గురయ్యా రు. ఇదీ మొదటిరోజు ప్రజాపాలన పరిస్థితి.

• గురువారం ఖైరతాబాద్‌ నియోజకవర్గంలోని బం జారాహిల్స్‌, వెంకటేశ్వరకాలనీ, జూబ్లీహిల్స్‌, సోమాజిగూడ, ఖైరతాబాద్‌, హిమాయత్‌నగర్‌ డివిజన్లలో ‘ప్రజాపాలన’ ప్రారంభమయింది. బంజారాహిల్స్‌ డివిజన్‌లోని జీహెచ్‌ఎంసీ ట్రైనింగ్‌ సెంటర్‌లో మంత్రి పొన్నం ప్రభాకర్‌, ఎమ్మెల్యే దానం నాగేందర్‌, మేయర్‌ గద్వాల్‌ విజయలక్ష్మి కలిసి ‘ప్రజాపాలన’ కార్యక్రమం ప్రారంభించారు. ఖైరతాబాద్‌ నియోజకవర్గంలో ఎన్నికలకు ముందు గృహలక్ష్మి కింద మంజూరైన 3 వేల ప్రొసీడింగ్‌ కాపీలను మంత్రికి అందజేశారు. పలు కేంద్రాల వద్ద జనం పెద్ద సంఖ్య లో దరఖాస్తుల కోసం వచ్చారు. అయితే చాలామందికి దరఖాస్తు ఫారమ్స్‌ అందకపోవడంతో జిరాక్స్‌ సెంటర్లవద్ద రూ.20 నుంచి రూ.50 డబ్బులు వెచ్చించి ఫారమ్స్‌ కొనుగోలు చేశారు.
• దరఖాస్తు ఫారమ్స్‌ నింపడం ఎలాగో తెలియకపోవడంతో పలుచోట్ల జనం అయోమయానికి గురయ్యా రు. రేషన్‌ కార్డు నంబర్‌, ఆధార్‌ నంబర్‌ దరఖాస్తులో పేర్కొనాలని చెప్పడంతో పాటు జిరాక్స్‌ కాపీలు పెట్టాలని నిబంధన పెట్టడంతో సమీపంలోని జిరాక్స్‌ సెంటర్లన్నీ జనంతో కిక్కిరిసిపోయాయి. పలువురు దరఖాస్తుదారులు జిరాక్స్‌ సెంటర్లలో లభించే ఆహారభద్రత ఆన్‌లైన్‌ ఫారమ్స్‌లో వివరాలు నింపి ఇవ్వగా సిబ్బంది వాటిని నిరాకరించారు. కొత్త రేషన్‌ కార్డు కోసం కేవలం తెల్లకాగితంపై మాత్రమే వివరాలు రాసివ్వాలని సిబ్బంది చెప్పడంతో పలుచోట్ల తీవ్ర గందరగోళానికి దారితీసింది. తెల్లపేపర్‌ మీద దరఖాస్తులు తీసుకోవడంపై దరఖాస్తుదారులు అనుమానాలు వ్యక్తం చేస్తున్నారు. వెస్ట్‌జోన్‌ డీసీపీ విజయ్‌కుమార్‌ ఆయా కేంద్రా ల్లో ఆకస్మిక తనిఖీలు నిర్వహించి బందోబస్తు ఏర్పాట్లను పరిశీలించారు.
• ప్రజాపాలన కార్యక్రమంలో దరఖాస్తుల స్వీకరణ కార్యక్రమంలో ఎక్కువమంది రేషన్‌కార్డుల కోసం కేంద్రాల వద్దకు వచ్చారు.రేషన్‌ కార్డులో తమ పేర్లు లేవని, కొత్తగా పేర్లు ఎక్కించాలని కొందరు, ఆధార్‌ కార్డులో ఉన్న చిరునామాలో వేరుగా ఉండడంతో తమకు రేషన్‌ కార్డులు వస్తాయో లేదో అని పలువురు సిబ్బందితో ఆరా తీయడం కనిపించింది. రేషన్‌కార్డుల దరఖాస్తుల స్వీకరణ కోసం ప్రత్యేకంగా కౌంటర్లు ఏర్పా టు చేస్తే బాగుంటుందని దరఖాస్తుదారులు కోరారు.
• బన్సీలాల్‌పేట్‌ డివిజన్‌లో కీస్‌ బ్లాక్స్‌, చాచానెహ్రూనగర్‌, ఎవర్‌గ్రీన్‌ కమ్యూనిటీ హాలు, తుంగభద్ర కమ్యూనిటీ హాలులో నాలుగు కేంద్రాలకు వచ్చే ప్రజల కోసం క్యూలైన్‌లో నిలబడేందుకు బ్యారికేడ్లు ఏర్పాటు చేశారు. జలమండలి జీఎం ప్రభు, డీజీఎం బ్రహ్మారెడ్డి పర్యవేక్షణలో అన్ని కేంద్రాల వద్ద తాగునీటి వసతి కల్పించారు. బన్సీలాల్‌పేట్‌ కార్పొరేటర్‌ కే.హేమలత అన్ని కేంద్రాలకు వెళ్లి పర్యవేక్షించారు.
• బేగంపేట్‌ సర్కిల్‌ పరిధిలో జీహెచ్‌ఎసీ సర్కిల్‌ అధికారులు దరఖాస్తులను స్వీకరించేందుకు ప్రత్యేక కౌంటర్లను ఏర్పాటు చేసినప్పటికీ లబ్ధిదారులు అధిక సంఖ్య లో తరలిరావడంతో అవస్థలు పడాల్సి వచ్చింది. బేగంపేట్‌ సర్కిల్‌ పరిధిలోని బేగంపేట్‌, రాంగోపాల్‌పేట్‌, మోండామార్కెట్‌, బన్సీలాల్‌పేట్‌ డివిజన్లలో ప్రత్యేక కౌంటర్లను ఏర్పాటు చేసి దరఖాస్తులను స్వీకరించారు. రాంగోపాల్‌పేట్‌ డివిజన్లోని చుట్టలబస్తీలో ఏర్పాటు చేసిన ప్రజాపాలన కేంద్రాన్ని కార్పొరేటర్‌ చీర సుచిత్ర సందర్శించి, అధికారుల తీరు పరిశీలించారు.
• ‘ప్రజాపాలన’ కార్యక్రమంలో భాగంగా కాంగ్రెస్‌ ప్రభుత్వం ప్రకటించిన ఆరు గ్యారెంటీలకు దరఖాస్తులు స్వీకరించే సనత్‌నగర్‌ డివిజన్‌లోని శిబిరాలను ఖైరతాబాద్‌ జీహెచ్‌ఎంసీ డిప్యూటీ కమిషనర్‌ జగన్‌, ఈఈ ఇందిర గురువారం సందర్శించారు. డివిజన్‌లోని నెహ్రూ పార్క్‌, దాసారం బస్తీ, అల్లాద్దీన్‌ కోఠీ, వెల్ఫేర్‌ సెంటర్‌లలో ఏర్పాటు చేసిన శిబిరాలను వారు సందర్శించారు.
• ‘ప్రజాపాలన’లో ప్రజల సందేహాలను నివృత్తి చేసి, అర్హులైన ప్రతి ఒక్కరికీ ప్రభుత్వ పథకాలు అందేలా చర్యలు తీసుకోవాలని హిమాయత్‌నగర్‌ కార్పొరేటర్‌ జి.మహాలక్ష్మీరామన్‌గౌడ్‌ అధికారులను ఆదేశించారు. గురువారం విఠల్‌వాడి, శంషీర్‌బాగ్‌, గాంధీకుటీర్‌, సంజయ్‌గాంధీనగర్‌లో ప్రభుత్వం అమలు చేసే ఆరు గ్యారంటీలకు సంబంధించి ‘ప్రజాపాలన’లో దరఖాస్తుల స్వీకరించారు. ఈ కార్యక్రమంలో బీఆర్‌ఎస్‌ నాయకులు జి.రామన్‌గౌడ్‌ పాల్గొన్నారు.
• లబ్ధిదారుల నుంచి స్వీకరించిన దరఖాస్తులను ఎప్పటికప్పుడు ఏ రోజుకారోజు సర్కిల్‌ కార్యాలయం అధికారులకు అందజేస్తామని, ఎనిమిది రోజుల పాటు స్వీకరించడం పూర్తయిన తర్వాతనే.. ఆన్‌లైన్‌లో నమో దు చేయనున్నామని అధికారులు వెల్లడించారు.