GHMC | పనితీరు బాగా లేదు.. కమిషనర్‌ ఇలంబర్తి తీరుపై మేయర్‌ ఆగ్రహం

మేయర్‌ గద్వాల్‌ విజయలక్ష్మి అధ్యక్షతన గురువారం జరిగిన 7వ స్టాండింగ్‌ కమిటీ సమావేశం హాట్‌ హాట్‌గా జరిగింది. మేయర్‌ గద్వాల్‌ విజయలక్ష్మితో పాటు బీఆర్‌ఎస్‌, ఎంఐఎం పార్టీ సభ్యులు కమిషనర్‌, అధికారుల తీరుపై తీవ్ర స్థాయిలో మండిపడ్డారు. కమిషనర్‌ ఇలంబర్తి పనితీరుపై మేయర్‌ తీవ్ర స్థాయిలో ఆగ్రహం వ్యక్తం చేశారు. స్టాండింగ్‌ కమిటీ సభ్యుల విజ్ఞప్తి మేరకు డివిజన్లలో క్షేత్రస్థాయిలో మేయర్‌ పర్యటిస్తుంటే కమిషనర్‌ హాజరు కాకపోవడం ఏంటని ప్రశ్నించారు.

• క్షేత్రస్థాయిలో పర్యటిస్తేనే సరైన ప్రతిపాదనలు వస్తాయని హితవు
• 13 అంశాలకు స్టాండింగ్‌ కమిటీ ఆమోదం

GHMC | సిటీబ్యూరో: మేయర్‌ గద్వాల్‌ విజయలక్ష్మి అధ్యక్షతన గురువారం జరిగిన 7వ స్టాండింగ్‌ కమిటీ సమావేశం హాట్‌ హాట్‌గా జరిగింది. మేయర్‌ గద్వాల్‌ విజయలక్ష్మితో పాటు బీఆర్‌ఎస్‌, ఎంఐఎం పార్టీ సభ్యులు కమిషనర్‌, అధికారుల తీరుపై తీవ్ర స్థాయిలో మండిపడ్డారు. కమిషనర్‌ ఇలంబర్తి పనితీరుపై మేయర్‌ తీవ్ర స్థాయిలో ఆగ్రహం వ్యక్తం చేశారు. స్టాండింగ్‌ కమిటీ సభ్యుల విజ్ఞప్తి మేరకు డివిజన్లలో క్షేత్రస్థాయిలో మేయర్‌ పర్యటిస్తుంటే కమిషనర్‌ హాజరు కాకపోవడం ఏంటని ప్రశ్నించారు. కమిషనర్‌ నుంచి అధికారులు క్షేత్రస్థాయిలో తిరుగుతుంటేనే సరైన ప్రతిపాదనలు వస్తాయని మేయర్‌ హితవు పలికారు.

బీఆర్‌ఎస్‌, ఎంఐఎం సభ్యులు సైతం కమిషనర్‌ వ్యవహార శైలిని తప్పుపట్టారు. ఈ సందర్భంగా వీధి దీపాల నిర్వహణపై సభ్యులంతా అసంతృప్తిని వ్యక్తం చేశారు. గడిచిన ఆరు నెలలుగా వీధి దీపాల నిర్వహణ బాగలేదని, ఎన్నిసార్లు చెప్పినా.. అధికారులు మాట వినడం లేదని కమిషనర్‌ దృష్టికి తీసుకొచ్చారు. ఆనంతరం స్టాండింగ్‌ కమిటీలో తొలి మూడు అంశాల్లో భాగంగా కేబీఆర్‌ పార్కు చుట్టూ హెచ్‌ సిటీ ప్రాజెక్టు కింద ఫ్లై ఓవర్లు, అండర్‌పాస్‌ల నిర్మాణానికిగానూ మూడు జంక్షన్లలో 105 ఆస్తులకు సంబంధించి కమిటీలో చర్చ పెట్టారు. దీనిపై బీఆర్‌ఎస్‌ పార్టీ సభ్యులు ఆర్‌డీపీ ప్లాన్‌పై స్పష్టత లేదని అభ్యంతరం వ్యక్తం చేశారు. ఎవరి ఆస్తులు ఎక్కడెక్కడ పోతున్నాయి? వారి వివరాలు సభ్యులు తెలియపర్చాలని డిమాండ్‌ చేశారు. ప్రముఖుల నివాసాలు, ఆస్తులకు సంబంధించి గోప్యత ఎందుకు పాటిస్తున్నారని, తొలుత వారి ఆస్తులను స్వాధీనం చేసుకున్నాకే మిగతా వారి జోలికి వెళ్లాలని, భూ సేకరణ లోపభూయిష్టంగా ఉందని ఆరోపించారు. దీంతో కేబీఆర్‌ పార్కు ఫ్లై ఓవర్‌ ఆస్తుల సేకరణ ఆర్‌డీపీ ప్లాన్‌ను కమిటీ ఆమోదించలేదు.

స్టాండింగ్‌ కమిటీలో ఆమోదించిన అంశాలివీ..

• గుల్మొహర్‌ పార్కు జంక్షన్‌ నుంచి తారానగర్‌ మీదుగా బీహెచ్‌ఈఎల్‌ జంక్షన్‌ వరకు, రైల్వే క్రాసింగ్‌ లింగంపల్లి నుంచి 1100 మీటర్ల పొడవు రోడ్డు విద్యానికేతన్‌ స్కూల్‌ నుంచి గుల్మోహర్‌ జంక్షన్‌ వరకు 30 మీటర్లు, 36 మీటర్ల వెడల్పుతో రోడ్డు విస్తరణ 227 ఆస్తుల సేకరణకు ప్రభుత్వ అనుమతి కోసం కార్పొరేషన్‌ చేసిన సిఫారసుకు కమిటీ ఆమోదించింది.
• ప్రభుత్వ ఉత్తరు మేరకు నేషనల్‌ హైవే 4పై జూపార్కు నుంచి ఆరాంఘర్‌ వరకు నిర్మించి ప్రారంభించిన ఆరు లేన్ల గ్రేడ్‌ సపరేటర్‌(ైఫ్లై ఓవర్‌)కు డాక్టర్‌ మన్మోహన్‌ సింగ్‌ ఎక్స్‌ప్రెస్‌ వేగా నామకరణం చేస్తూ కమిటీ ఆమోదించింది.
• కేబీఆర్‌ పార్కు ప్రవేశ ద్వారం వద్ద ఫైబర్‌, సిమెంట్‌ కుండీలతో పూల మొక్కలతో గ్రీనరీ కోసం సీఎస్‌ఆర్‌ విధానంతో ఏర్పాటు చేసి నిర్వహణకు మెస్సర్స్‌ క్రియేటివ్‌ థాట్స్‌ మీడియా హైదరాబాద్‌ సంస్థకి మూడేండ్ల పాటు ఎంఓయూకు కమిటీ ఆమోదించింది.
• చార్మినార్‌, ఖైరతాబాద్‌, కూకట్‌పల్లి, శేరిలింగంపల్లి జోన్లలో 2025 సంవత్సరానికి ఆరు డీ సిల్టింగ్‌ పనులకు మొత్తం రూ. 2231.75 లక్షల అంచనా వ్యయంతో చేపట్టే నాలా పూడికతీత పనులకు పరిపాలన అనుమతితో పాటు టెండర్‌ నోటిఫికేషన్‌కు కమిటీ ఆమోదించింది.
• సీఆర్‌ఎంపీ ఫేస్‌-1 కింద చేపట్టిన పనులకు కొనసాగింపుగా సీఆర్‌ఎంపీ ఫేస్‌-2 కింద రూ. 744.22 కిలోమీటర్ల రోడ్డు నిర్వహణకు జోన్‌ వారీగా ప్యాకేజీలతో 2025 నుంచి 2030 కాలానికి ఐదు సంవత్సరాల పాటు రూ. 2491 కోట్ల అంచనా వ్యయంతో ప్రతిపాదించిన పనులకు నిబంధనల ప్రకారంగా బడ్జెట్‌ కేటాయింపు, రూ. 3828 కోట్లతో 1142 కిలోమీటర్ల మేర ఫేస్‌-2 పనుల టెండర్‌ అనుమతికి కమిటీ ఆమోదించింది.
• లాలాపేట ఫ్లై ఓవర్‌ నుంచి మౌలాలి ఫ్లై ఓవర్‌ వరకు 100 ఫీట్ల రోడ్డు విస్తరణకు మంజూరైన రూ. 3కోట్లకు అదనంగా రూ.1.30 కోట్ల రివైజ్డ్‌ పరిపాలన అనుమతికి ఆమోదం.
• కేబీఆర్‌ పార్కు చుట్టూ ఫ్లై ఓవర్లు, అండర్‌పాస్‌ల నిర్మాణ హెచ్‌ సిటీ ప్రాజెక్టుకు ఆమోదం.
• నల్గొండ ఎక్స్‌రోడ్‌ నుంచి సైదాబాద్‌ వయా ఐఎస్‌ సదన్‌ మీదుగా ఒవైసీ వరకు ఫ్లై ఓవర్‌ రూ.620 కోట్ల అంచనా వ్యయానికి రాటిఫికేషన్‌కు కమిటీ ఆమోదం
• నారాయణగూడలో ఓల్డ్‌ మున్సిపల్‌ మార్కెట్‌ స్థలంలో మోడల్‌ భవన నిర్మాణంలో చేసిన మార్పులకు కమిటీ ఆమోదం తెలిపింది.
• టేబుల్‌ ఐటమ్స్‌లో భాగంగా ఎంజే మార్కెట్‌ నుంచి భూ లక్ష్మీ దేవాలయం (ముస్లిం జంగ్‌ బ్రిడ్జి) వయా మాలకుంట బేగంబజార్‌ రోడ్డు వరకు 30 మీటర్ల వెడల్పుతో అభివృద్ధి పనులకు కమిటీ ఆమోదించారు.
• ఎస్‌ఆర్‌డీపీలో భాగంగా గచ్చిబౌలి జంక్షన్‌ వద్ద రెండో లెవల్‌ కొండాపూర్‌ వైపు, ఓఆర్‌ఆర్‌ వైపు ఆరు లేన్ల టూ వే ఫ్లై ఓవర్ల నిర్మాణ, శిల్పా లే అవుట్‌ నుంచి గ్యాస్‌ కంపెనీ మీదుగా గచ్చిబౌలి జంక్షన్‌ వరకు 120 అడుగుల వెడల్పు రహదారి ఏర్పాటుకు కమిటీ ఆమోదించారు.
• రోడ్‌ డెవలప్‌మెంట్‌ ప్లాన్‌ కింద ప్రతిపాదించిన గోషామహల్‌ పోలీస్‌ గ్రౌండ్‌ వద్ద అప్రోచ్‌ రోడ్‌ నుంచి ఉస్మానియా జనరల్‌ ఆసుపత్రి వరకు 9 మీటర్లు, 12 మీటర్లు, 18 మీటర్ల విస్తరణతో అప్రోచ్‌ రోడ్ల నిర్మాణానికి కమిటీ ఆమోదం తెలిపింది. ఈ సమావేశంలో స్టాండింగ్‌ కమిటీ సభ్యులు బన్నాల గీత ప్రవీణ్‌ ముదిరాజ్‌ తదితరులు పాల్గొన్నారు.