బల్దియా అక్రమాల పుట్ట

జీహెచ్‌ఎంసీ కౌన్సిల్‌ సమావేశం వాడీవేడీగా జరిగింది. బోరబండ డివిజన్‌ కార్పొరేటర్‌ బాబా ఫసియుద్దీన్‌ వేధింపులకు బీఆర్‌ఎస్‌ మైనార్టీ నేత సర్దార్‌ చనిపోయాడని, అతడి మృతికి కారణమైన బాబా ఫసియుద్దీన్‌ను సస్పెండ్‌ చేయాలంటూ బీఆర్‌ఎస్‌ కార్పొరేటర్లు జీహెచ్‌ఎంసీ కార్యాలయం ముందు, కౌన్సిల్‌లో పట్టుబట్టారు.

• రోడ్లు వేయకుండానే బిల్లులు
• నాలా పూడికతీతలో అన్నీ లోపాలే
• ప్రకటనల విభాగంలో అవినీతి తాండవం
• ఖజానాకు గండికొడుతున్న అధికారులు
• నవనిర్మాణ్‌కు అడ్డదారిలో టెండర్‌
• క్రీడలను పూర్తిగా విస్మరించిన బల్దియా
• పార్కుల నిర్వహణలో అంతులేని లోపాలు
• వీధి దీపాలే లేకుంటే మహానగరం ఎలా అవుతుంది
• జనన, మరణ ధ్రువీకరణ పత్రాల జారీలో ఏ జోన్‌లో చూసినా అక్రమాలే
• సర్దార్‌ చావుకు కారణమైన ఫసియుద్దీన్‌పై చర్యలు తీసుకోండి
• జీహెచ్‌ఎంసీ కౌన్సిల్‌ సమావేశంలో దుమ్మెత్తిపోసిన కార్పొరేటర్లు
• కాంగ్రెస్‌ కార్పొరేటర్‌ బాబాను వెనకేసుకొస్తూ బీజేపీ ఎంపీ రఘునందన్‌ వ్యాఖ్యలు
• ఎంపీ వ్యాఖ్యలకు విస్మయపోయిన బీజేపీ కార్పొరేటర్లు
• జీహెచ్‌ఎంసీ తీరుపై గళమెత్తిన కౌన్సిలర్లు

సిటీబ్యూరో, జూన్‌ 4 (నమస్తే తెలంగాణ) : జీహెచ్‌ఎంసీ కౌన్సిల్‌ సమావేశం వాడీవేడీగా జరిగింది. బోరబండ డివిజన్‌ కార్పొరేటర్‌ బాబా ఫసియుద్దీన్‌ వేధింపులకు బీఆర్‌ఎస్‌ మైనార్టీ నేత సర్దార్‌ చనిపోయాడని, అతడి మృతికి కారణమైన బాబా ఫసియుద్దీన్‌ను సస్పెండ్‌ చేయాలంటూ బీఆర్‌ఎస్‌ కార్పొరేటర్లు జీహెచ్‌ఎంసీ కార్యాలయం ముందు, కౌన్సిల్‌లో పట్టుబట్టారు. రాజకీయ కక్షతోనే బాబా ఫసియుద్దీన్‌ అనేక మందిని ఇబ్బందులకు గురి చేస్తున్నారంటూ మండిపడ్డారు. ఆత్మహత్య బాధాకరమని, పోలీసులు కేసు నమోదు చేశారని, బాబా ఫసియుద్దీన్‌ పాత్ర ఉందా? లేదా అనే విషయం విచారణలో వెలుగు చూస్తుందని మేయర్‌ చెప్పగా, బీఆర్‌ఎస్‌ సభ్యులు అభ్యంతరం తెలిపారు.

ఎక్స్‌ఆఫిషియో సభ్యుడిగా వచ్చిన ఎంపీ రఘునందన్‌ రావు సంబంధం లేని విషయంలో జోక్యం చేసుకుని అందరినీ ఆశ్చర్యపరిచారు. ఒకానొక దశలో అధికార పార్టీ కార్పొరేటర్‌ను సపోర్టు చేస్తూ మాట్లాడిన తీరు బీజేపీ కార్పొరేటర్లు సైతం ఆశ్చర్యపోవడం గమనార్హం. అంతేకాకుండా కాంగ్రెస్‌ పార్టీకి మా ఎంపీ సపోర్టు చేశారని బీజేపీ కార్పొరేటర్‌ కొప్పుల నర్సింహారెడ్డి సభలోనే చెప్పడం గమనార్హం. నాలా పూడితీతత పనులపై పార్టీలకు అతీతంగా అధికారుల పనితీరులో లోపాలను తూర్పారా పట్టారు. మేయర్‌ సైతం ఒకానొక దశలో సీఈ మెయింటనెన్స్‌ సహదేవ్‌ రత్నాకర్‌పై మండిపడ్డారు. పూడికతీత, నాలా అభివృద్ధి పనుల్లో కార్పొరేటర్లను భాగస్వామ్యం చేయాలని మేయర్‌ ఆదేశించారు.

అధికారుల సమాధానంపై అసంతృప్తి వ్యక్తం చేయగా..మేయర్‌ జోక్యం చేసుకుని వచ్చే వారం నుంచి జోనల్‌ వారీగా సమీక్ష సమావేశాలు నిర్వహిస్తామని, అన్ని అంశాలను అందులో చర్చించి తగు నిర్ణయం తీసుకుంటామని మేయర్‌ తెలిపారు. అనంతరం జీహెచ్‌ఎంసీ ప్రకటనల విభాగంలో అవినీతి తాండవిస్తుందని, సంస్థకు వచ్చే ఆదాయం పక్కదారి పడుతుందని సభ్యులు ఆధారాలతో సహా ప్రస్తావించారు. ప్రకటనల రూపంలో ఏటా రూ. 1000 కోట్లకు పైగా ఆదాయం వచ్చే చోట అధికారులు సంస్థ ఖజానాకు గండికొడుతున్నారని బీజేపీ కార్పొరేటర్‌ వంగ మధుసూదన్‌రెడ్డి మండిపడ్డారు.

అడ్డదారిలో వచ్చిన నవ నిర్మాణ్‌ అసోసియేట్‌కు కేబీఆర్‌ పార్కు మల్టీ లెవల్‌ కారు పార్కింగ్‌ టెండర్‌ను అప్పజెప్పారని ఆరోపించారు. గోపన్‌పల్లి ఫ్లై ఓవర్‌, గగన్‌ పహాడ్‌లో రెండు హోర్డింగ్‌లు, ట్రాఫిక్‌ అంబెరిల్లాలో అక్రమాలు జరిగాయన్నారు. స్పందించిన అదనపు కమిషనర్‌ స్నేహ శబరీష్‌ 624 ట్రాఫిక్‌ అంబెరిల్లాలో 100 వరకు జీహెచ్‌ఎంసీ అనుమతి లేకుండా ట్రాఫిక్‌ పోలీసులు ఏర్పాటు చేశారని, 30 అక్రమంగా ఉన్నట్లు గుర్తించి వాటిని తొలగించామని చెప్పారు. బుధవారం జీహెచ్‌ఎంసి ప్రధాన కార్యాలయంలో 11వ సాధారణ సమావేశం మేయర్‌ గద్వాల్‌ విజయలక్ష్మి అధ్యక్షతన జరిగింది. పహల్గాం, గుల్జార్‌ హౌస్‌ ఘటనల్లో మరణించిన వారి ఆత్మకు శాంతి చేకూరాలని కౌన్సిల్‌ సభ్యులు రెండు నిమిషాల పాటు మౌనం పాటించారు.

కూల్చే అధికారం మీకెక్కడిది?

బస్తీవాసులు ఇళ్ల నిర్మాణానికి పడుతున్న ఇబ్బందులపై అన్ని పార్టీలకు సంబంధించిన కార్పొరేటర్లు సభలో ప్రస్తావించారు. నోటరీ స్థలాలకు అనుమతులు ఇవ్వలేమని వివరణ జీహెచ్‌ఎంసీ చట్ట ప్రకారం రిజిస్టర్డ్‌ సేల్‌ డీడ్‌ ఉన్న స్థలాలకు నిర్మాణ అనుమతిని మంజూరు చేయగలమని సీసీపీ శ్రీనివాస్‌ చెప్పారు. దీంతో మేయర్‌తో పాటు పలువురు కార్పొరేటర్లు ఆగ్రహం వ్యక్తం చేశారు. ఈ సమయంలోనే మేయర్‌ వివాదస్పద వ్యాఖ్యలు చేశారు. అనుమతి ఇచ్చే అధికారం లేనప్పుడు..పేదల ఇళ్లను కూల్చే అధికారం కూడా మీకు లేదని మేయర్‌ అనడం తీవ్ర చర్చకు దారి తీసింది.

క్రీడా నిర్వహణపై అసంతృప్తి

• క్రీడా విభాగం పనితీరుపై సభ్యులు తీవ్ర అసంతృప్తిని వ్యక్తం చేశారు. మొఘల్‌ పుర స్పోర్ట్స్‌ కాంప్లెక్స్‌లో ప్రభుత్వ కార్యాలయం ఉన్నందున క్రీడలకు అంతరాయం ఏర్పడుతుందని, క్రీడాకారులుగా తీర్చిదిద్దడానికి ఈ ప్రాగంణం నుంచి చార్మినార్‌ డీసీ కార్యాలయాన్ని వెంటనే అకడి నుండి తొలగించాలని సయ్యద్‌ సోహెల్‌ ఖాద్రీ కోరారు. కాటేదాన్‌ స్పోర్ట్స్‌ కాంప్లెక్స్‌ను కూడా అభివృద్ధి చేయాల్సి ఉందని ఎమ్మెల్సీ మిర్జా రహమత్‌ బేగ్‌ , కార్పొరేటర్‌ తోకల శ్రీనివాస్‌ రెడ్డి తెలిపారు. వనస్థలిపురం ప్రభుత్వ ప్లే గ్రౌండ్‌లో ప్రైవేట్‌ వ్యక్తులు సేటింగ్‌ రుసుం రూ.1200లు వసూలు చేస్తున్నారని కార్పొరేటర్‌ వెంకటేశ్వర్‌ రెడ్డి ఆరోపించారు.
  కార్పొరేటర్లు లేవనెత్తిన ప్రధాన అంశాలు
• ఐఏఎస్‌ సదన్‌లో రోడ్డు వేయకుండా రూ.10 లక్షలు బిల్లు పొందారని ఇంజినీరింగ్‌ అక్రమాలను స్థానిక కార్పొరేటర్లు భాగ్యలక్ష్మి, శ్వేత మేయర్‌ దృష్టికి తీసుకువచ్చారు. విజిలెన్స్‌ విభాగంలో తప్పు జరిగినట్లు తేలిందని, క్రమ శిక్షణ చర్యలు తీసుకుంటామని కమిషనర్‌ ఆర్‌ వీ కర్ణన్‌ తెలిపారు.
• ఉప్పల్‌లో ఏడున్నర ఎకరాల ప్రభుత్వ భూమిని ఓ బిల్డర్‌ అక్రమించాడని, కలెక్టర్‌, తహసీల్దార్‌ ధ్రువీకరణ చేసిన నిర్మాణ అనుమతిని రద్దు చేయకుండా ఉన్నారని బీజేపీ కార్పొరేటర్‌ శ్రీనివాస్‌రెడ్డి ఆరోపించారు. ఆ అంశం కోర్టు పరిధిలో ఉందని కమిషనర్‌ వివరణ ఇచ్చే ప్రయత్నం చేయగా, కోర్టు కేసు పేరుతో తాత్సారం చేయడంపై అభ్యంతరం వ్యక్తం చేశారు.
• గ్రేటర్‌లోని ఫె్లైఓవర్లకు ఉర్దూ భాషలో బోర్డులు పెట్టాలని ఎమ్మెల్సీ మిర్జా రహమత్‌ బేగ్‌ తెలిపారు. రైల్వే శాఖతో సమన్వయ లోపం ఉందని, జీహెచ్‌ఎంసీ ఎన్‌వోసీలు ఇస్తే ఆర్వోబీ, ఆర్‌యూబీల నిర్మాణానికి రైల్వే శాఖ సిద్ధంగా ఉందని మల్కాజ్‌గిరి ఎమ్మెల్యే మర్రి రాజశేఖర్‌రెడ్డి తెలిపారు.
• మూసీ సుందరీకరణకు బీజేపీ కేంద్ర ప్రభుత్వం సహకరించాలని కార్పొరేటర్‌ దర్పల్లి రాజశేఖర్‌రెడ్డి డిమాండ్‌ చేయగా..మూసీకి తాము వ్యతిరేకం కాదని అడ్డదారిలో పేదల ఇళ్లను కూల్చే చర్యలను మాత్రమే అడ్డుకున్నామని, నిర్వాసితులకు న్యాయమైన పరిహారం ఇచ్చి పనులు చేపట్టాలని ఈటెల తెలిపారు.
• రైల్వే స్థలాలను డబుల్‌ బెడ్‌ ర్రూం ఇళ్ల నిర్మాణానికి కేటాయిస్తే పేదలకు స్థానికంగానే ఇళ్లను కేటాయించగలమని డిప్యూటీ మేయర్‌, కార్పొరేటర్‌ సునీత చేసిన ప్రతిపాదనలపై ఎంపీ రఘునందన్‌ రావు సానుకూలంగా స్పందించారు. ప్రభుత్వంతో కలిసి చర్చలకు వస్తే రైల్వే అధికారులను పిలిపించి మాట్లాడతామన్నారు.
• వీధి దీపాలు లేని మహా నగరం అవసరమా? అని పలువురు కార్పొరేటర్లు మండిపడ్డారు. రెండు నెలల్లో కొత్త టెండర్‌ ప్రక్రియ పూర్తవుతుందని, అప్పటి వరకు తాత్కాలికంగా ఏర్పాట్లతో సమస్య లేకుండా చూస్తామని అదనపు కమిషనర్‌ వివరణ ఇచ్చారు.
• పార్కుల నిర్వహణ లోపాలపై యుబిడి విభాగంపై సభ్యులు మండిపడ్డారు. పార్కు సుందరీకరణ పనులు, మొక్కలను అశాస్త్రీయంగా నాటుతున్నారని కార్పొరేటర్లు జగదీశ్వర్‌ గౌడ్‌, బొంతు శ్రీదేవిలు ఆగ్రహం వ్యక్తం చేశారు.

సభ అసంతృప్తిగా జరిగింది

కౌన్సిల్‌ సమావేశం అసంతృప్తిగా జరిగింది. ప్రజా సమస్యలపై సరైన స్పందన ఇవ్వలేదు. మాన్‌సూన్‌ విషయంలో చర్చించాలని అడిగిన మైక్‌ ఇవ్వలేదు. పదే పదే గత ప్రభుత్వం గుర్తించి మాట్లాడుతున్న కాంగ్రెస్‌ ప్రభుత్వం ఎక్కడ అభివృద్ధి పనులు చేపట్టారో సమాధానం చెప్పాలి. నాలాలలో పూడికతీత తీయకపోవడంతో ఇబ్బందులు పడుతున్నారు.

– సామల హేమ, బీఆర్‌ఎస్‌ కార్పొరేటర్‌

ఫసియుద్దీన్‌ను సస్పెండ్‌ చేయాలి

మేము కొట్టినట్లు చేస్తాం…మీరు ఏడ్చినట్లు చేయండి అన్నట్లుగా సభ జరిగింది. బీజేపీ, కాంగ్రెస్‌ రెండు ఒక్కటేనని మరోమారు తేలిపోయింది బాబా ఫసియుద్దీన్‌ను సస్పెండ్‌ చేయాలని కోరుదామంటే కనీస సమయం ఇవ్వలేదు. చర్చించే అవకాశం కల్పించలేదు.

– ఆవుల రవీందర్‌ రెడ్డి, బీఆర్‌ఎస్‌ కార్పొరేటర్‌

ప్రత్యేక ఆకర్షణగా జపాన్‌ బృందం

కౌన్సిల్‌ సమావేశంలో జపాన్‌ బృందం ప్రత్యేక ఆకర్షణగా నిలిచింది. సమావేశం పూర్తయ్యే వరకు వారు సభ తీరును పరిశీలించారు. ఈ సమావేశంలో స్పోర్ట్స్‌ కాంప్లెక్స్‌, శానిటేషన్‌, బర్త్‌ అండ్‌ డెత్‌, వీధి లైట్లు, ప్రకటనలు డీ-సిల్టింగ్‌ తదితర అంశాలపై సభ్యులు లేవనెత్తిన ప్రశ్నలకు ఆయా విభాగాల అధికారులు వివరణ ఇచ్చారు. ఈ సమావేశంలో ఎంపీలు ఈటల రాజేందర్‌, రఘునందన్‌ రావు, ఎమ్మెల్సీలు విజయశాంతి, బల్మూరి వెంకట్‌, మిర్జా రియాజ్‌ ఉల్‌ హస్సన్‌, మిర్జా రహమత్‌ బేగ్‌, అద్దంకి దయాకర్‌, ఎమ్మెల్యేలు జుల్ఫికర్‌ అలీ, మాజీద్‌ హుస్సేన్‌, కౌసర్‌ మొయినుద్దీన్‌, రాజశేఖర్‌రెడ్డి, బండారి లక్ష్మారెడ్డి, కమిషనర్‌ ఆర్‌వీ కర్ణన్‌, అడిషనల్‌ కమిషనర్లు స్నేహ శబరీష్‌, వేణుగోపాల్‌, వేణుగోపాల్‌రెడ్డి తదితరులు పాల్గొన్నారు.

అధికారులపై చర్యలేవీ?

నకిలీ జనన, మరణ ధ్రువీకరణ పత్రాల జారీలో ఔట్‌సోర్సింగ్‌ ఉద్యోగులను బలి చేస్తున్నారు. సంబంధిత అధికారులపై చర్యలు తీసుకోవడం లేదని బీజేపీ కార్పొరేటర్‌ కొప్పుల నరసింహారెడ్డి అన్నారు. రోహింగ్యాలు, ఇతర దేశాల నుంచి వచ్చిన వారికి ఇక్కడ బర్త్‌ సర్టిఫికెట్లు ఇస్తున్నారని ఆరోపించారు. ఈ సందర్భంగా ఆయన విదేశాల ముస్లింలు అని వ్యాఖ్యానించడంపై ఎంఐఎం సభ్యులు అభ్యంతరం వ్యక్తం చేశారు. ఆ పదాలను రికార్డుల నుంచి తొలగిస్తున్నట్లు సభాధ్యక్షత వహించిన డిప్యూటీ మేయర్‌ మోతె శ్రీలతారెడ్డి చెప్పారు.

‘21001 జనన, 1906 మరణ ధ్రువీకరణ పత్రాలు రద్దు చేశాం. 16 మంది ఆపరేటర్లు, 15 మంది హెల్త్‌ అసిస్టెంట్లను విధుల నుంచి తొలగించాం. వారిపై క్రిమినల్‌ కేసులు నమోదు చేశాం. అక్రమాలు జరగకుండా సంస్కరణలు అమలు చేస్తున్నాం’ అని అదనపు కమిషనర్‌ పంకజ తెలిపారు. కాగా, నకిలీ జనన, మరణ ధ్రువీకరణ పత్రాలపై ఆసక్తికర చర్చ జరుగుతున్న సమయంలో బాధ్యతగా ఉండాల్సిన అదనపు కమిషనర్‌ వేణుగోపాల్‌ రెడ్డి కునుకు తీయడం గమనార్హం.

ఫసియుద్దీన్‌పై చర్యలు తీసుకోండి

బోరబండ డివిజన్‌లో బీఆర్‌ఎస్‌ నేత సర్థార్‌ మృతికి కారణమైన కార్పొరేటర్‌ బాబా ఫసియుద్దీన్‌పై బీఆర్‌ఎస్‌ కార్పొరేటర్లు తీవ్ర స్థాయిలో ఆగ్రహం వ్యక్తం చేశారు. సమావేశానికి ముందు జీహెచ్‌ఎంసీ ప్రధాన కార్యాలయం ముందు నిరసన చేపట్టారు. నోటరీపై భవన నిర్మాణం చేసిన సర్దార్‌పై బాబా ఫసియుద్దీన్‌ వేధింపులకు పాల్పడ్డారని, టౌన్‌ప్లానింగ్‌ అధికారులకు ఫిర్యాదు చేయించి మరీ నిర్మాణాన్ని కూల్చివేయించారని, అంతటితో ఆగకుండా పార్టీ మారాలంటూ వేధింపులకు పాల్పడి సర్దార్‌ చావుకు కారణం అయ్యాడని బీఆర్‌ఎస్‌ కార్పొరేటర్‌ దేదీప్య ఆరోపించారు.

ప్రజలను భయబ్రాంతులకు గురి చేస్తున్న బాబా ఫసియుద్దీన్‌పై వెంటనే చర్యలు తీసుకోవాలని ఈ సందర్భంగా డిమాండ్‌ చేశారు. సర్దార్‌ మృతికి కారణమైన కార్పొరేటర్‌ బాబా ఫసియుద్దీన్‌పై వెంటనే చర్యలు తీసుకోవాలని కార్పొరేటర్‌ వెంకటేశ్‌ డిమాండ్‌ చేశారు. చనిపోయిన సర్దార్‌ కుటుంబానికి బీఆర్‌ఎస్‌ పార్టీ అండగా ఉంటుందని భరోసా ఇచ్చారు. బీఆర్‌ఎస్‌ కార్పొరేటర్ల ఆందోళనకు జడిసిన బాబా ఫసియుద్దీన్‌ కౌన్సిల్‌ హాల్‌లోకి రాకుండా మేయర్‌ చాంబర్‌లో కూర్చోవడం, నిరసన కార్యక్రమం తగ్గిన తర్వాత కౌన్సిల్‌ హాల్‌లోకి రావడం గమనార్హం.