బండ్లు కొని.. బార్డర్‌ దాటించి రుణాలు ఎగవేత

రుణాలపై నిర్మాణ, మైనింగ్‌ రంగానికి చెందిన భారీ వాహనాలను కొనుగోలు చేసి, వాటిని అడ్డదారిలో విదేశాలకు తరలిస్తున్న ముఠాలపై సీసీఎస్‌ పోలీసులకు ఫైనాన్స్‌ సంస్థలు, బ్యాంకుల నుంచి ఫిర్యాదులు అందుతున్నాయి.

• ఫైనాన్స్‌ సంస్థలకు టోకరా
• దేశ వ్యాప్తంగా జరుగుతున్న స్కామ్‌
• సీసీఎస్‌లో తాజాగా మరో కేసు నమోదు
• పోర్టులకు లేఖలు రాసిన సీసీఎస్‌ పోలీసులు

సిటీబ్యూరో, ఆగస్టు 1 (నమస్తే తెలంగాణ): రుణాలపై నిర్మాణ, మైనింగ్‌ రంగానికి చెందిన భారీ వాహనాలను కొనుగోలు చేసి, వాటిని అడ్డదారిలో విదేశాలకు తరలిస్తున్న ముఠాలపై సీసీఎస్‌ పోలీసులకు ఫైనాన్స్‌ సంస్థలు, బ్యాంకుల నుంచి ఫిర్యాదులు అందుతున్నాయి. మన రాష్ట్రంలోనే కాకుండా దేశ వ్యాప్తంగా ఈ స్కామ్‌ జరుగుతున్నట్లు పోలీసులు అనుమానిస్తున్నారు. మూడంచల్లో ఈ దందా నడుస్తున్నది. సముద్ర మార్గం నుంచి ఈ వాహనాలను ఆఫ్రికా దేశాలకు తరలిస్తున్నారు. ఈ మోసంపై సీసీఎస్‌ పోలీసులు లోతుగా దర్యాప్తు చేస్తున్నారు. ఇందులో భాగంగా దేశ వ్యాప్తంగా సరుకు రవాణా చేసే ఓడ రేవులలోని కస్టమ్స్‌ అధికారులకు లేఖలు రాసి ఎన్ని వాహనాలు విదేశాలకు ఎగుమతి అవుతున్నాయనే విషయాలు తెప్పించుకుంటున్నారు. ఇటీవల కొటక్‌ మహేంద్ర, తాజాగా హెచ్‌డీబీ ఫైనాన్స్‌ సంస్థలు సీసీఎస్‌ పోలీసులకు ఫిర్యాదు చేయడంతో కేసు నమోదు చేశారు. మరో ఫైనాన్స్‌ సంస్థ కూడా ఫిర్యాదు ఇవ్వడానికి సిద్ధమవుతున్నది.

స్కామ్‌ జరుగుతున్నదిలా..

• కొన్ని ఫైనాన్స్‌, బ్యాంకులు వాహనాలకు సంబంధించిన రుణాలు ఇస్తుంటాయి. రుణాలు ఇచ్చే సమయంలో రుణగ్రహీత బ్యాంకు ఖాతాలోని ఆర్థిక లావాదేవీలు, బ్యాంకు బాలెన్స్‌లను పరిశీలిస్తారు.
• నిర్మాణ రంగం, భూములు, మైనింగ్‌ పనుల్లో ఉపయోగించే జేసీబీలు, పొక్లేనర్లు, ఎగ్జావేటర్‌, లోడర్స్‌, బుల్డోజర్స్‌, మోటర్‌ గ్రేడర్‌, ట్రెంచర్‌, వీల్‌ ట్రాక్టర్‌ స్క్రాపర్‌ తదితర వాహనాలు, యంత్రాలను ఉపయోగించే డ్రైవర్లు, వాటి యజమానులు, ఇతర అమాయకులను స్కామ్‌ నిర్వహించే ముఠాలు సంప్రదిస్తాయి.
• వారితో పరిచయాలు పెంచుకొని వాళ్ల పేరుతో బ్యాంకు ఖాతాలు తెరిచి, బ్యాంకు ఖాతాల్లో నాలుగు నుంచి ఆరు నెలల పాటు భారీగా నగదును డిపాజిట్‌ చేసి, ఆ తరువాత వాటిని డ్రా చేసుకుంటారు. ఆయా ఖాతాల పాస్‌బుక్‌లు, ఏటీఎం కార్డులు, ఇంటర్‌నెట్‌ బ్యాంకింగ్‌ అంతా తమ వద్దే ఉంటాయి.
• బ్యాంకు ఖాతాలోని ఆర్థిక లావాదేవీలు ఆయా బ్యాంకు ఖాతాల్లోని నగదు నిల్వలను ఫైనాన్స్‌ సంస్థలకు చూపించి, ఆయా వాహనాలపై రుణాలు కావాలని, వాళ్లంతా అదే వృత్తిలో ఉన్నారని సూచించి రూ.20లక్షల నుంచి కోటి రూపాయల వరకు రుణాలు పొంది ఆయా వాహనాలు, యంత్రాలను కొనుగోలు చేస్తారు.
• ఇక్కడ ఖాతా దారుడికి రూ.3లక్షలు ఇచ్చి అతడి వ్యవహారాన్ని అక్కడితో ముగించేస్తారు, బ్యాంకులో మాత్రం మూడు నాలుగు నెలలు రుణం వాయిదాల్లో ముఠాకు చెందిన వారే చెల్లిస్తారు.
• అప్పటికే ఆ వాహనానికి సంబంధించి ఇంజిన్‌, ఛాసెస్‌ నంబర్లను ట్యాంపరింగ్‌ చేస్తారు. ఇందుకు నగర శివారులో ప్రత్యేక ముఠాలుంటాయి. ఒక వేళ ఆయా యంత్రాలు ఆయా ఫైనాన్స్‌ సంస్థలపై హైపోథికేషన్‌లో ఉంటే వాటిని కూడా మార్చేస్తారు.
• ట్యాంపరింగ్‌ పూర్తయిన తరువాత ఆయా వాహనాలను, యంత్రాలను ముంబై, చెన్నై, విశాఖపట్టణం, కాకినాడ తదితర ఓడరేవుల ద్వారా ఆఫ్రికా దేశాలకు తరలిస్తున్నారు. కస్టమ్స్‌ తనిఖీల్లో ఆయా వాహనాలకు సంబంధించిన ట్యాంపరింగ్‌, నకిలీ డాక్యుమెంట్లను చూపించి అవి సరైనవే అని నమ్మిస్తున్నారు.

రుణాలు ఎగ్గొట్టేస్తారు…!
మూడు నాలుగు నెలలు వాయిదాలు చెల్లిస్తారు. వాయిదాలు బ్యాంకులకు వస్తుండటంతో ఆయా వాహనాల గురించి అంతగా పట్టించుకోరు. ఒకవేళ అనుమానం ఉండి రుణం పొందిన వాళ్లను సంప్రదిస్తే, వాహనం ఇక్కడే ఉందని, వేరే వాళ్ల వద్ద పని నడుస్తుందంటూ నమ్మిస్తారు. వాహనం, యంత్రాలు ఎప్పుడైతే దేశం దాటిపోతాయో ఇక, వాయిదాల చెల్లింపు జరగదు. ఒకటి రెండు నెలలు వాయిదాలు రాకపోయే వరకు బ్యాంకు అధికారులు రంగంలోకి దిగి ఆరా తీసి అది స్కామ్‌గా గుర్తిస్తారు. ఇటీవల కొటక్‌ మహేంద్ర బ్యాంక్‌ నుంచి సీసీఎస్‌కు ఫిర్యాదు రాగా.. తాజాగా హెచ్‌డీబీ ఫైనాన్షియల్‌ సర్వీసెస్‌ సంస్థ లీగల్‌ మేనేజర్‌ నాగేందర్‌ సీసీఎస్‌ పోలీసులకు ఫిర్యాదు చేయడంతో మరో కేసు నమోదైంది.

వనపర్తికి చెందిన కె.రవీందర్‌రెడ్డి, హయత్‌నగర్‌కు చెందిన హైటెక్‌ ఎర్త్‌ మూవర్‌ సర్వీసెస్‌, మేడ్చల్‌కు చెందిన మదాసు అసోసియేట్స్‌, బోడుప్పల్‌కు చెందిన స్వప్న, నాంపల్లికి చెందిన మహ్మద్‌ యాసీ అహ్మద్‌ తదితరులపై ఫిర్యాదు చేయడంతో సీసీఎస్‌ పోలీసులు కేసు నమోదు చేసి దర్యాప్తు చేపట్టారు. ఇదిలా ఉండగా.. కేవలం ఈ ఒక్క సంస్థ నుంచి 38 భారీ వాహనాలపై రుణాలు పొంది ఎగ్గొట్టినట్లు ప్రాథమికంగా నిర్ధారించారు. ఇక్కడ వాహనానికి రూ.5లక్షల నుంచి రూ.10లక్షలు ఈ ముఠా ఖర్చు చేస్తున్నది. ఈ వాహనాలను ఆఫ్రికా దేశాల్లో రెట్టింపు ధరలకు విక్రయిస్తుంటారు. రుణాలతో వాహనాలను తీసుకునేది ఒక ముఠా, నంబర్లు ట్యాంపరింగ్‌ చేసి వాటిని పోర్టుల వరకు తరలించేది మరో ముఠా.. విదేశాల్లో ఉంటూ వాటిని విక్రయించేంది ఇంకో ముఠా. ఇలా మూడంచెల్లో ఈ మాఫియా పనిచేస్తున్నట్లు పోలీసులు గుర్తించారు.