Visit:
Fiber | ఫైబర్ శరీరానికి అత్యంత అవసరమైన పోషకాలలో ఒకటి. ఇది జీర్ణక్రియను మెరుగుపరచడం, పేగుల ఆరోగ్యాన్ని కాపాడడం, రక్తంలో చక్కెర స్థాయిలను నియంత్రించడం, ఎక్కువసేపు ఆకలి వేయకుండా ఉంచడం వంటి అనేక ప్రయోజనాలను అందిస్తుంది. అయినప్పటికీ చాలామంది రోజూ అవసరమైనంత ఫైబర్ తీసుకోలేకపోతున్నారు. రోజూ తినే అన్నంలో ఒక కప్పు పచ్చిబఠానీలను కలిపితే ఫైబర్, ప్రోటీన్ రెండింటినీ సులభంగా పెంచుకోవచ్చని నిపుణులు సూచిస్తున్నారు. ఇలా ఒక కప్పు పచ్చిబఠానీలను కలపడం ద్వారా ఒక్క భోజనంలోనే సుమారు 10 గ్రాముల ఫైబర్, 8.6 గ్రాముల ప్రోటీన్ లభిస్తుంది. ఈ కలయిక ఎక్కువసేపు కడుపు నిండిన భావనను కలిగిస్తుంది. దీంతో తరచూ ఆకలి వేయడం తగ్గడంతోపాటు అనవసరంగా చిరుతిండ్లు తినే అలవాటు కూడా తగ్గే అవకాశం ఉంటుంది. అలాగే రక్తంలో చక్కెర స్థాయిలు అకస్మాత్తుగా పెరగకుండా సమతుల్యంగా ఉండేందుకు ఇది సహాయపడుతుంది. ఫైబర్ అధికంగా ఉండటం వల్ల పేగుల ఆరోగ్యం కూడా మెరుగుపడుతుంది.
తాజా పచ్చిబఠానీలు అందుబాటులో లేకపోతే ఫ్రోజన్ గ్రీన్ పీస్ను కూడా ఉపయోగించవచ్చని నిపుణులు సూచిస్తున్నారు. పోషక విలువల్లో పెద్దగా తేడా ఉండదని చెబుతున్నారు. అమెరికన్ ఇన్స్టిట్యూట్ ఫర్ క్యాన్సర్ రీసెర్చ్ ప్రకారం, చాలా మంది పెద్దలకు రోజుకు సుమారు 30 గ్రాముల ఫైబర్ అవసరం. రోజువారీ ఆహారంలో కొన్ని చిన్న మార్పులు చేయడం ద్వారా ఈ లక్ష్యాన్ని సులభంగా చేరుకోవచ్చు. తెల్ల బ్రెడ్, తెల్ల బియ్యం, సాధారణ పాస్తాకు బదులుగా గోధుమ బ్రెడ్, బ్రౌన్ రైస్, క్వినోవా వంటి సంపూర్ణ ధాన్యాలను ఎంచుకోవడం వల్ల ప్రతి భోజనంలో ఫైబర్ పరిమాణం పెరుగుతుంది. కొనుగోలు చేసే సమయంలో ప్యాకెట్పై హోల్ గ్రెయిన్ ప్రధాన పదార్థంగా ఉందో లేదో పరిశీలించడం మంచిది. బీన్స్, కందిపప్పు, శనగలు వంటి పప్పుధాన్యాలను కూరలు, పులుసులు, సలాడ్లలో చేర్చడం ద్వారా కూడా ఫైబర్ తీసుకునే పరిమాణం గణనీయంగా పెరుగుతుంది.
ఉదయం అల్పాహారంలో ఓట్మీల్, స్మూతీలు లేదా పెరుగులో ఒక టేబుల్ స్పూన్ చియా గింజలు కలిపితే అదనపు ఫైబర్ లభిస్తుంది. ఆపిల్, బేరి, బంగాళాదుంప వంటి వాటిని సాధ్యమైనంత వరకు తొక్కతోనే తినడం మంచిది. అలాగే బాదం, పిస్తా, నూనె లేకుండా తయారు చేసిన పాప్కార్న్ వంటి ఆరోగ్యకరమైన చిరుతిండ్లు కూడా రోజువారీ ఫైబర్ అవసరాన్ని తీర్చడంలో సహాయపడతాయని నిపుణులు తెలియజేస్తున్నారు.
