Back pain | మారుతున్న కాలానికి అనుగుణంగా, మనిషి జీవన శైలిలో పెనుమార్పులు వస్తున్నాయి. సాంకేతిక పరిజ్ఞానం వల్ల కార్యాలయాల్లో భౌతిక శ్రమ తగ్గిపోయింది. సుఖవంతమైన జీవితానికి అలవాటు పడ్డాడు. కొత్త వ్యసనాలు వచ్చి చేరాయి. ముఖ్యంగా ‘డిజిటల్ జీవితం’ మెడ, నడుము తదితర కీలక భాగాలపై తీవ్ర ప్రభావాన్ని చూపుతున్నది. చాలామందిలో కనిపించే మెడ, నడుము నొప్పులు వైద్యపరమైన రుగ్మతలు కావు, నూటికి నూరుశాతం ‘యాంత్రిక’ సమస్యలే. ప్రతి పదిమందిలో ఏడుగురిని ‘స్పాండిలైటిస్’ వెంటాడుతున్నది. ఈ సంక్షోభాన్ని అధిగమించేందుకు తీసుకోవాల్సిన జాగ్రత్తల గురించి ప్రకృతి వైద్య నిపుణులు డాక్టర్ మస్తాన్ యాదవ్ సూచనలు..
మనిషి కండరాలు యంత్రాలతో సమానం. నిరంతరం పనిచేస్తూనే ఉండాలి. అప్పుడే, శరీర వ్యవస్థ బలంగా ఉంటుంది. కానీ, టెక్నాలజీ పెరిగిపోయాక భౌతిక శ్రమ నామమాత్రమైంది. ఉద్యోగులు, వృత్తి నిపుణులు కుర్చీలకే పరిమితం అవుతున్నారు. ఇలా ఒకేచోట కూర్చోవడం వల్ల కండరాలకు తగినంత వ్యాయామం ఉండటం లేదు. ప్రధాన భాగాలు బలహీనపడిపోయి సున్నితంగా మారుతున్నాయి. బరువైన పనిచేయాల్సి వచ్చినప్పుడో, ఎక్కువ దూరం నడవాల్సి వచ్చినప్పుడో తీవ్ర ఒత్తిడికి గురవుతాయి. ఈ క్రమంలో వెన్నుపూసలోని డిస్కులు దెబ్బతింటాయి. ఈ పరిస్థితినే ‘స్పాండిలైటిస్’ ( Back pain ) అంటారు. అపసవ్య జీవన విధానమే స్పాండిలైటిస్కు ప్రధాన కారణం.
నడుములోని వెన్నుపూస, డిస్కులు అరిగిపోవడం వల్ల నడుము నొప్పి వస్తుంది. మెడలోని డిస్కులు అరిగిపోవడం వల్ల మెడ నొప్పి వెంటాడుతుంది. మెడలోని డిస్కులు అరిగిపోతే దాన్ని ‘సర్వైకల్ స్పాండిలైటిస్’ అంటారు. నడుము వద్ద ఉన్న డిస్కులు జారిపోతే దాన్ని ‘లంబార్ స్పాండిలైటిస్’గా వ్యవహరిస్తారు. ఈ లక్షణాలను నిర్లక్ష్యం చేస్తే మాత్రం, సమస్య మరింత జటిలమై తీవ్ర అనారోగ్యానికి దారితీసే ప్రమాదం ఉంది.
రెండు దశాబ్దాల క్రితం వరకూ స్పాండిలైటిస్ అనేది 50 ఏండ్లు పైబడిన వారిలో మాత్రమే కనిపించేది. వయసు రీత్యా డిస్కుల అరుగుదలతో నొప్పులు వచ్చేవి. కానీ కాలక్రమంలో జీవనశైలి లోపాలు, వృత్తిపరమైన ఒత్తిళ్లు తదితర కారణాల వల్ల యువతనూ ఈ సమస్య వెంటాడుతున్నది. సాఫ్ట్వేర్, బ్యాంకింగ్, కాల్సెంటర్ తదితర విభాగాల్లో పనిచేసేవారు నడుము, మెడ నొప్పితో ఇబ్బందిపడుతున్నారు. జీవనశైలి కారణాల వల్ల భౌతిక శ్రమ తగ్గినప్పుడు, ఆ నష్టాన్ని పూరించడానికి వ్యాయామం, నడక, యోగ.. వంటివి నిత్య జీవితంలో భాగం చేసుకోవాలి. కానీ తీవ్ర పని ఒత్తిడి వల్లనో, బద్ధకం వల్లనో వాటికి కూడా సమయం కేటాయించలేక పోతున్నారు. పెరిగిన పని వేళలు, నిద్రలోనూ వెంటాడే డెడ్లైన్ల పుణ్యమా అని రోజుకు పది నుంచి పదిహేను గంటలు ఆఫీసు సీట్లకే అతుక్కుపోతున్నారు. మిగతా సమయాన్ని టీవీలు, సెల్ఫోన్లు మింగేస్తున్నాయి.
కరోనా నేపథ్యంలో ఏడాదిన్నర కాలం నుంచీ పిల్లలు సైతం నాలుగు గోడలకే పరిమితం అవుతున్నారు. గంటల తరబడి సెల్ఫోన్లు, ల్యాప్టాప్లతో కాలక్షేపం చేస్తున్నారు. అసలే చిన్నారుల కండరాలు సున్నితంగా ఉంటాయి. ఫలితంగా చిన్న వయసులోనే నడుము, మెడ నొప్పి మొదలవుతున్నాయి. దీనివల్ల 30-40 ఏండ్లు వచ్చేసరికి డిస్క్లు అరిగిపోయే ప్రమాదం లేకపోలేదు. కండరాల ఎదుగుదల కూడా దెబ్బతినే ఆస్కారం ఉంది. వైరస్ బారినపడి, కోలుకున్న వారిలోనూ కండరాల సమస్యలు, కీళ్లనొప్పులు బయటపడుతున్నాయి. దీన్నే ‘ఇన్ఫ్లమేటరీ ఆర్థరైటిస్’ అంటారు.. అంటే, వాతంతో కూడిన నొప్పులు. సాధారణంగా ఇన్ఫెక్షన్లు వాతాన్ని పెంచుతాయి. రోగి ఏదైనా ఇన్ఫెక్షన్కు గురైనప్పుడు కీళ్లనొప్పులు, కండరాల నొప్పులు సహజం. ఈ లక్షణం చికున్ గున్యాలో మరీ అధికం. డెంగీ, స్వైన్ ఫ్లూలలో కూడా ఈ లక్షణాలు బహిర్గతం అవుతాయి. కరోనా తర్వాత కూడా కొందరిలో ‘ఇన్ఫ్లమేటరీ ఆర్థరైటిస్’ లక్షణాలను గుర్తిస్తున్నారు వైద్యులు.
ప్రకృతి వైద్య విధానంతో ఎలాంటి ఔషధాలూ లేకుండానే స్పాండిలైటిస్ వంటి సమస్యలను పూర్తిగా దూరం చేయవచ్చు. ఈ చికిత్సా పద్ధతిలో రోగి జీవన విధానంలో మార్పులు తీసుకువస్తారు. ఫిజియోథెరపీ, హైడ్రో థెరపీ, యోగా థెరపీ, ఆహార నియమాలు ఇక్కడ చాలా ముఖ్యం. జీవనశైలి మార్పుల ద్వారా జీవితాన్నే మార్చేసే అద్భుత విధానం ఇది.
మెడనొప్పి నియంత్రణ కోసం నిత్యం.. మెడను నెమ్మదిగా ఎడమ నుంచి కుడికి, కుడి నుంచి ఎడమకి 10 సార్లు తిప్పాలి. తరువాత కింద నుంచి పైకి, పై నుంచి కిందికి 10 సార్లు, కుడి భుజం నుంచి ఎడమ భుజం వైపునకు, ఎడమ నుంచి కుడి భుజం వైపునకు 10 సార్లు వంచాలి. దిగువ తెలిపిన ఆసనాలను కూడా నిపుణుల పర్యవేక్షణలో సాధన చేయాలి.
… మహేశ్వర్రావు బండారి
లోకల్ టు గ్లోబల్ వార్తల కోసం.. నమస్తే తెలంగాణ ఫేస్బుక్, ట్విటర్ పేజీలను ఫాలో అవ్వండి
Healthy food | ప్రపంచంలో ఇంతకు మించిన పుష్ఠికరమైన అల్పాహారం లేనే లేదు.. అసలేంటిది?
Healthy food | తరచూ ఈ స్వీట్ తింటే అస్తమా, ఎసిడిటీ దూరం కావాల్సిందే
శృంగార సామర్థ్యం పెరగాలంటే ఇలా చేయండి..
ఆన్లైన్ క్లాసులతో పిల్లలకు కొత్త తంటా.. పెరుగుతున్న మెల్లకన్ను సమస్యలు
తల్లిదండ్రులకు హెచ్చరిక.. డిజిటల్ మాధ్యమాలు ఎక్కువగా వాడే పిల్లల్లో ఊబకాయం ముప్పు