త‌ల్లిదండ్రుల‌కు హెచ్చ‌రిక‌.. డిజిటల్‌ మాధ్యమాలు ఎక్కువ‌గా వాడే పిల్ల‌ల్లో ఊబ‌కాయం ముప్పు

Obesity in Children | ఒప్పుకోక తప్పదు.. వయసుతో సంబంధం లేకుండా డిజిటల్‌ మీడియా ఓ వ్యసనంగా మారిపోయింది. ఆడుతూపాడుతూ చదువుకోవాల్సిన పిల్లలు టీవీ, సోషల్‌ మీడియా, మొబైల్‌ గేమ్స్‌ అంటూ ఏదో ఒక తెరకు అతుక్కుపోతున్నారు. దానికి తోడు ‘ఆన్‌లైన్‌ క్లాసులు’! వీటి పుణ్యమాని స్క్రీన్‌ టైమ్‌ కూడా పెరిగిపోతున్నది. దీనివల్ల సహజంగానే శరీర శ్రమ తగ్గిపోతున్నది. ఫలితం.. టీనేజ్‌లోనే ఊబకాయం వస్తున్నది. ఫిన్లాండ్‌కు చెందిన హెల్సింకీ విశ్వవిద్యాలయ పరిశోధకులు చెబుతున్న మాట ఇది. దీన్ని నిరూపించేందుకు నాలుగువేల మందికి పైగా పిల్లలను ఎంచుకొన్నారు. 11 ఏండ్ల వయసులో విపరీతంగా డిజిటల్‌ మాధ్యమాలకు అలవాటు పడిన పిల్లల్లో 14 ఏండ్లు వచ్చేసరికి ఊబకాయపు లక్షణాలు కనిపించాయట. అయితే, ఈ సమస్యకు ఓ పరిష్కారాన్ని సూచిస్తున్నారు పరిశోధకులు. పిల్లలు కనుక రోజుకో గంట చొప్పున అలసట కలిగేలా బయట తిరిగితే.. ఊబకాయం దరిచేరదని భరోసా ఇస్తున్నారు. స్క్రీన్‌ టైమ్‌ను ఎలాగూ తగ్గించలేం, కనీసం శారీరక వ్యాయామాన్ని అయినా ప్రోత్సహిద్దాం!