Summer | కిడ్నీల్లో రాళ్లు ఎండాకాలంలోనే ఎందుకు ఎక్కువగా వస్తాయి? ఈ సమస్య నుంచి ఎలా బయటపడాలి?

Summer | అప్పుడే ఎండలు మండిపోతున్నాయి. ఓవైపు పెరుగుతున్న ఉష్ణోగ్రతలు, మరోవైపు వాతావరణంలో మితిమీరిన తేమ కిడ్నీలకు చేటు చేస్తాయి. ఆరోగ్యవంతులైనా సరే ఎండాకాలం సూర్యుడి నుంచి తమను తాము కాపాడుకోవాలి.

Summer | అప్పుడే ఎండలు మండిపోతున్నాయి. ఓవైపు పెరుగుతున్న ఉష్ణోగ్రతలు, మరోవైపు వాతావరణంలో మితిమీరిన తేమ కిడ్నీలకు చేటు చేస్తాయి. ఆరోగ్యవంతులైనా సరే ఎండాకాలం సూర్యుడి నుంచి తమను తాము కాపాడుకోవాలి. శరీరంలోని నీరు చెమట రూపంలో అధికంగా బయటికి పోతుంది కాబట్టి, డీహైడ్రేషన్‌ ముప్పు పొంచి ఉంటుంది. దీంతో కిడ్నీ సమస్యలూ తలెత్తుతాయి. ఇప్పటికే మూత్రపిండ వ్యాధులు ఉన్నవాళ్లు మరిన్ని జాగ్రత్తలు తీసుకోవాలి.

రాళ్ల సీజన్‌

ఎండకాలం చెమట కారణంగా శరీరం ఎక్కువ మొత్తంలో నీళ్లను కోల్పోతుంది. అలా డీహైడ్రేషన్‌కు ఆస్కారం ఎక్కువ. కిడ్నీలో రాళ్లకు డీహైడ్రేషన్‌ కూడా ఓ కారణం. ఎండకాలంలో మాంసాహారం లాంటి ప్రొటీన్లు ఎక్కువ ఉండే ఆహారం తీసుకునేవాళ్లలో కూడా కిడ్నీల్లో రాళ్లకు అవకాశం ఉంటుంది. కాబట్టి, మాంసాహారులు తగిన మోతాదులో నీళ్లు తాగాలి. ఇక ఫాస్ట్‌ఫుడ్స్‌లో ఉప్పు, ప్రొటీన్లు, చక్కెరలు ఎక్కువ. ఇవి రాళ్ల ముప్పు పెంచుతాయి. అందువల్ల కిడ్నీల ఆరోగ్యానికి హామీ ఇచ్చే ఆహార పదార్థాల మీదే దృష్టిపెట్టాలి. పెద్దలు రోజుకు 2.5 నుంచి 3 లీటర్ల నీళ్లు తాగాలి. బయటికి వెళ్తున్నప్పుడు నీళ్ల బాటిల్‌ వెంట తీసుకువెళ్లాలి. మూత్రాన్ని ఉగ్గబట్టుకోకూడదు. దీనివల్ల మూత్రం సాంద్రత ఎక్కువై రాళ్లు వృద్ధి చెందుతాయి.

లో బీపీ ముప్పు

ఎండకాలం చెమట ఎక్కువగా పట్టడం వల్ల బీపీ కూడా పడిపోతుంది. కాబట్టి డాక్టరును సంప్రదించి రక్తపోటు పెంచే మందులు వెంట ఉంచుకుంటే మంచిది. వివిధ రుగ్మతలతో డైయూరిటిక్‌ ఔషధాలు తీసుకునే వారిలో మూత్ర విసర్జన సహజంగానే ఎక్కువగా ఉంటుంది. ఇలాంటివారు డాక్టర్‌ను సంప్రదించి తగిన మోతాదులోనే ఆ ఔషధాన్ని సిఫారసు చేయమని అడగాలి.

ఇవీ రక్షణ చర్యలు..

• రోజూ కనీసం మూడు లీటర్ల ద్రవాలు తీసుకోవాలి.
• మాంసాహారం ఎక్కువగా తినకూడదు.
• పెయిన్‌ కిల్లర్లకు దూరంగా ఉండాలి.
• మూత్రం లేత పసుపు రంగులో ఉంటే శరీరంలో తగినన్ని నీళ్లు ఉన్నట్టు. మరీ పచ్చగా ఉండకుండా చూసుకోవాలి.
• పిల్లలు, వృద్ధులు డీహైడ్రేషన్‌ బారినపడే ప్రమాదం ఎక్కువ. వాళ్లు బయటికి వెళ్తున్నప్పుడు తగిన జాగ్రత్తలు తీసుకునేలా చూడాలి.
• ఎండలో తీవ్రమైన వ్యాయామం చేయకూడదు. డీహైడ్రేషన్‌ వల్ల కండరాలు గాయపడే ప్రమాదం ఉంది.
• వదులైన వస్ర్తాలు ధరించాలి.
• బయటికి వెళ్లినప్పుడు టోపీ, కళ్లజోడు తప్పనిసరిగా పెట్టుకోవాలి.
• కిడ్నీ వ్యాధిగ్రస్తులు శరీరంలో తగినన్ని నీళ్లు ఉండేలా చూసుకోవాలి.