Dengue Fever | డేంజర్‌ డెంగీ.. తరిమేద్దాం ఇలా..!

Dengue Fever | దోమలు కుట్టడం వల్ల మనకు వచ్చే విష జ్వరాల్లో డెంగీ కూడా ఒకటి. క్కువగా ఉదయం, సాయంత్రం వేళల్లోనే కుడతాయి. ఈ దోమలు కుట్టగానే మన శరీరంలో...

చినుకుల కాలం మొదలవగానే వాతావరణం చల్లబడిందని సంతోషపడతాం. అయితే, ఈ సంతోషాల వెంటే దుఃఖాలు కూడా మనల్ని చుట్టుముడుతున్నాయి. ముఖ్యంగా వానాకాలంలో వచ్చే సీజనల్ జ్వరాలు మనల్ని చాలా ఇబ్బందులకు గురిచేస్తున్నాయి. వీటిలో ముఖ్యంగా చెప్పుకోవాల్సింది డెంగీ జ్వరం. అన్ని జ్వరాలు ఒకేలా ఉన్నా.. డెంగీగా అనుమానించొద్దు. డెంగీ జ్వరం లక్షణాలు ఎలా ఉంటాయో తెల్సుకుని, వ్యాధి నివారణకు ఎలాంటి చర్యలు తీసుకోవాలో విజ్ఞానం పొందడం ద్వారానే దానిని దూరంగా తరిమేయవచ్చు.

దోమలు కుట్టడం వల్ల మనకు వచ్చే విష జ్వరాల్లో డెంగీ కూడా ఒకటి. డెంగీ వైరస్‌లో ఎన్నో ఉపరకాలు ఉన్నాయి. ఇది ఏడిస్ రకానికి చెందిన దోమలు కుట్టడం వల్ల వస్తుంది. ఈ దోమలు ఎక్కువగా ఉదయం, సాయంత్రం వేళల్లోనే కుడతాయి. ఈ దోమలు కుట్టగానే మన శరీరంలో డెంగీ వైరస్ వ్యాప్తి చెందుతుంది. ఫలితంగా మనకు అనేక డెంగీ జ్వరం లక్షణాలు కనిపిస్తాయి. ఈ రకం దోమలు ఎక్కువ దూరం ఎగరలేనందున ఒకే వ్యక్తిని ఎక్కువ సార్లు గానీ, అక్కడే ఉన్న ఇతరులను గానీ కుడతాయి.

డెంగీ లక్షణాలు
డెంగీ వైరస్‌ సోకిన వ్యక్తిలో దాదాపు వారం రోజుల వరకు ఎలాంటి లక్షణాలు కనిపించవు. డెంగీ సాధారణ జ్వరంలా రావచ్చు. తీవ్ర రక్తస్రావం అయి ప్రాణాంతకం కావచ్చు. మెదడు వంటి ఇతర అవయవాలపై ప్రభావం చూపి మరణానికి కూడా దారితీసే అవకాశాలు ఉన్నాయి.

• డెంగీ వచ్చిన వారికి విపరీతమైన జ్వరం ఉంటుంది. చలిగా అనిపిస్తుంది.
• తీవ్రమైన ఒళ్లు నొప్పులు, తలనొప్పి ఉంటాయి.
• శరీరంపై ఎరుపు రంగులో దద్దుర్లు వస్తాయి.
• దాహం విపరీతంగా అవుతుంది. నోరు ఎక్కువగా తడారిపోతుంది.
• వాంతులు అవుతుంటాయి. కళ్లు నొప్పిగా అనిపిస్తాయి.
• పిల్లల్లో నోరు పొక్కడం, గొంతునొప్పి, పొడి దగ్గులాంటి లక్షణాలు కనిపిస్తాయి.
• జ్వరం వచ్చిన రెండో రోజున చర్మం ఎరుపెక్కి మంటగా ఉంటుంది.
• కడుపు నొప్పి, వాంతి వచ్చినట్లు అనిపిస్తుంది.

జ్వరం బాగా వచ్చిన వారు వెంటనే డాక్టర్‌ను సంప్రదించాలి. రెండు రోజుల కన్నా ఎక్కువ సమయం పాటు జ్వరం ఉంటే ఆలస్యం చేయకూడదు. పాజిటివ్ వస్తే వైద్యులు రోగిని హాస్పిటల్‌లో చేర్చుకుని చికిత్స ప్రారంభిస్తారు. అయితే చికిత్స సమయంలో రోగులు చాలా జాగ్రత్తగా ఉండాలి. మందులు సమయానికి వేసుకోవాలి. ఇంటి పరిసరాలను శుభ్రంగా ఉంచుకోవాలి. ముఖ్యంగా దోమలు లేకుండా చూసుకోవాలి.

తీసుకోవాల్సిన జాగ్రత్తలు..

• వైద్య పరీక్షల్లో డెంగీ ఉందని తేలితే ఏమాత్రం నిర్లక్ష్యం చేయరాదు. వెంటనే చికిత్స తీసుకోవాలి. రోగి శరీరాన్ని చల్లని గుడ్డతో తుడుస్తుండాలి. జ్వరం వచ్చిన వారిని చల్లని ప్రదేశంలో పడుకోబెట్టాలి.
• డెంగీ రావడం వల్ల ప్లేట్‌లెట్ల సంఖ్య బాగా తగ్గిపోతుంది. అలాంటప్పుడు వైద్యులు ప్లేట్లను పెంచేందుకు మందులు ఇస్తారు. వాటితోపాటు బొప్పాయి ఆకుల రసాన్ని చాలా స్వల్ప మోతాదులో సేవిస్తుండాలి. దీంతో ప్లేట్‌లెట్ల సంఖ్యను పెంచుకోవచ్చు.
• డెంగీ వచ్చిన వారు రోగనిరోధక శక్తిని పెంచే పండ్లు, ఇతర ఆహారాలను ఎక్కువగా తీసుకుంటే వ్యాధి నుంచి త్వరగా బయట పడేందుకు అవకాశం ఉంటుంది.
• తాజా పండ్ల రసాలు, కొబ్బరి నీళ్లు, ద్రాక్ష, కివీలు, దానిమ్మ, నారింజ పండ్లను బాగా తీసుకుంటే డెంగీ నుంచి త్వరగా కోలుకోవచ్చు.
• రెండు, మూడు రకాల కూరగాయలను గ్రైండ్‌ చేసి వాటి రసం తీసుకోవడం వల్ల శరీరానికి కావాల్సిన పోషకాలు అందుతాయి.
• శరీరం డీహైడ్రేషన్‌కు గురికాకుండా కొబ్బరి నీరు ఎక్కువగా తాగుతుండాలి.
• డెంగ్యూ జ్వరం నుంచి కోలుకునేందుకు హెర్బల్‌ టీ ఎంతో ఉపకరిస్తుంది.
• వేప ఆకులు డెంగ్యూ వైరస్‌ వ్యాప్తిని అరకడతాయి. వేప ఆకులతో స్నానం చేయడం చాలా మంచిది.
• నూనె పదార్థాలు, వేపుడ్లు, కెఫిన్‌, కార్బొనేటెడ్‌ పానీయాలు, కారం వస్తువులు తినకుండా చూసుకోవాలి.
• కొవ్వులు అధికంగా ఉండే ఆహారాలను డెంగ్యూ జ్వరం తగ్గేంత వరకు తీసుకోకపోవడమే మంచిది.

నివారణ ఇలా..

• దోమలు వృద్ధి చెందకుండా పరిసరాల పరిశుభ్రత
• నిల్వ నీరు ఉండకుండా జాగ్రత్త పడటం
• నీటిపై దోమల మందు చల్లించడం, ఫాగింగ్ చేయించడం
• నీటి కంటైనర్లకు, ఆహారపదార్థాలకు ఎల్లప్పుడూ మూతలు పెట్టాలి
• దోమతెరలు వాడటం కొంతవరకు ఉపయోగం
• పూర్తిగా కప్పి ఉంచే బట్టలు ధరించటం
• ఓడోమాస్ వంటి క్రీములు రాసుకోవడం