ఫుడ్‌ పాయిజనింగ్‌ తస్మాత్‌ జాగ్రత్త

ఫుడ్‌ పాయిజనింగ్‌ విస్తృతంగా కనిపించే జబ్బు. నివారించదగ్గదే అయినప్పటికీ లక్షలాది మంది దీనితో బాధపడుతుంటారు. హానికరమైన బ్యాక్టీరియా, వైరస్‌, పరాన్నజీవుల కారణంగా ఫుడ్‌ పాయిజనింగ్‌ జరుగుతుంటుంది.

ఫుడ్‌ పాయిజనింగ్‌ విస్తృతంగా కనిపించే జబ్బు. నివారించదగ్గదే అయినప్పటికీ లక్షలాది మంది దీనితో బాధపడుతుంటారు. హానికరమైన బ్యాక్టీరియా, వైరస్‌, పరాన్నజీవుల కారణంగా ఫుడ్‌ పాయిజనింగ్‌ జరుగుతుంటుంది. ఆహారాన్ని జాగ్రత్తగా నిల్వ ఉంచకపోవడం, వండకపోవడం వల్ల ఈ సమస్య తలెత్తుతుంది. కలుషిత ఆహారం, పానీయాల వల్ల ఓ మోస్తరు కడుపునొప్పి, అతిసారం, ఇతర పొట్ట సమస్యలు దాపురిస్తాయి. కిడ్నీ వైఫల్యం, ఇతర ప్రాణాంతకమైన పరిస్థితులు కూడా ఎదురుకావచ్చు. కాబట్టి, ఆహార పదార్థాలు వండటం, నిల్వ ఉంచడం, తినే విధానం విషయాల్లో చాలా జాగ్రత్తగా ఉండాలి.

లక్షణాలు

• రోగ కారక క్రిమిని బట్టి ఫుడ్‌ పాయిజనింగ్‌ తీవ్రత ఆధారపడి ఉంటుంది.
• చాలామందిలో వికారం, వాంతులు ఉంటాయి.
• ఓ మోస్తరు నుంచి తీవ్రమైన అతిసారం (డయేరియా) తలెత్తుతుంది.
• కడుపులో అసౌకర్యం, నొప్పి కలుగుతాయి.
• కొంతమందిలో జ్వరం కూడా కనిపిస్తుంది.
• మరికొంతమందిలో తలనొప్పి, మగత లాంటివి కనిపిస్తాయి.

నివారణ

• ఆహారం తినడానికి ముందు, తర్వాత తినే పాత్రలు, చేతులను పరిశుభ్రంగా కడుక్కోవాలి.
• హానికరమైన బ్యాక్టీరియా, వైరస్‌, ఇతర రోగ కారక క్రిములు నశించడానికి తగిన ఉష్ణోగ్రతలో వంట చేయాలి.
• మూత ఉన్న పాత్రల్లో ఆహారాన్ని నిల్వ ఉంచాలి.
• పాడైపోయే పదార్థాలను వీలైనంత త్వరగా రిఫ్రిజిరేటర్‌లో ఉంచాలి.
• ఆహారం కలుషితం కాకుండా ఉండటానికి వండని పదార్థాలను, వండిన పదార్థాలను వేర్వేరుగా ఉంచాలి.