Car racing | అర్థరాత్రి రేసింగ్‌కు పాల్పడుతున్నయువకుడిపై కేసు

బంజారాహిల్స్​‍ : అర్థరాత్రి వేళ జూబ్లీహిల్స్​‍లో మితిమీరిన వేగంతో ప్రయాణిస్తూ రేసింగ్‌కు పాల్పడుతున్న యువకుడిపై జూబ్లీహిల్స్​‍ పోలీసులు కేసు నమోదు చేశారు. పోలీసులు తెలిపిన వివరాల ప్రకారం..

బంజారాహిల్స్​‍లోని ఎన్‌టీఆర్‌ ట్రస్ట్‌ భవన్‌ నుంచి జూబ్లీహిల్స్​‍ చెక్‌పోస్ట్ దాకా అర్థరాత్రి దాటిన తర్వాత కొంతమంది యువకులు మితిమీరిన వేగంతో కార్లు నడిపిస్తూ రేసింగ్‌కు పాల్పడుతున్నారన్న సమాచారం అందుకున్న జూబ్లీహిల్స్​‍ పోలీసులు అక్కడకు చేరుకున్నారు.

ఈ క్రమంలో హోండా అకార్డ్‌ కారు (ఏపీ 10ఏసీ 8181) కు ఉన్న సైలెన్సర్‌ను తొలగించి భారీ శబ్ధం కలిగించే సైలెన్సర్‌ను అమర్చుకున్న ఓ యువకుడు అదుపుతప్పిన వేగంతో దూసుకువెళ్తుండగా చెక్‌పోస్ట్‌ వద్ద పోలీసులు అడ్డుకున్నారు.

అతడిని అదుపులోకి తీసుకుని విచారించగా విజయ్‌నగర్‌ కాలనీకి చెందిన కషిఫ్‌ అహ్మద్ (21) అని తేలింది. కొంతమంది స్నేహితులు ఈ ప్రాంతంలో రేసింగ్‌లు నిర్వ‌హిస్తున్నారని తెలియడంతో అతను కూడా ఇక్కడకు వచ్చాడ‌ని విచారణలో తేలింది.

దాంతో నిందితుడు కషిఫ్‌ అహ్మద్‌పై ఐపీసీ 290,335తో పాటు 177 ఆఫ్‌ ఎంవీ యాక్ట్ కింద కేసు నమోదు చేసిన పోలీసులు దర్యాప్తు చేపట్టారు.