Vijay devarakonda | లైగర్ తర్వాత విజయ్ దేవరకొండ చేయబోయే సినిమాలు ఇవే..

January 21, 2022 / 05:45 PM IST

Vijay devarakonda | కెరీర్ మొదట్లో వరుస సినిమాలు చేసిన విజయ్ దేవరకొండ.. గత రెండేళ్లుగా పూర్తిగా జోరు తగ్గించాడు. భారీ అంచనాలతో వచ్చిన డియర్ కామ్రేడ్, వరల్డ్ ఫేమస్ లవర్ సినిమాలు దారుణంగా ఫ్లాప్ కావడంతో.. మధ్యలో చాలా గ్యాప్ తీసుకుంటున్నాడు. ప్రస్తుతం ఈయన పూరీ జగన్నాథ్ దర్శకత్వంలో లైగర్ సినిమాలో నటిస్తున్నాడు. తెలుగుతో పాటు ఒకేసారి తమిళ, హిందీ, కన్నడ, మలయాళ భాషల్లో ఈ సినిమా విడుదల కానుంది. దాదాపు 100 కోట్ల బడ్జెట్‌తో ఈ సినిమా వస్తోంది. విజయ్ దేవరకొండ ట్రాక్ రికార్డు తో పని లేకుండా ఈ సినిమా కోసం భారీ బడ్జెట్ పెడుతున్నారు.

ఒకేసారి హిందీ, తెలుగులో సినిమా షూట్ చేస్తున్నాడు పూరీ జగన్నాథ్. మిగిలిన భాషల్లో దీనిని డబ్బింగ్ చేయనున్నారు. ఈ మధ్య విడుదలైన టీజ‌ర్‌కు అదిరిపోయే రెస్పాన్స్ వచ్చింది. బాక్సింగ్ నేపథ్యంలో తెరకెక్కుతున్న లైగర్ సినిమాలో బాక్సింగ్ లెజెండ్ మైక్ టైసన్ ఒక ప్రత్యేక పాత్రలో నటిస్తున్నాడు. ఇదంతా ఇలా ఉంటే పూరీ జగన్నాథ్ సినిమా తర్వాత విజయ్ ఎవరితో సినిమాలు చేయబోతున్నాడు అనేది ఆసక్తికరంగా మారింది. ఎందుకంటే అలాంటి మాస్ యాక్షన్ సినిమా చూసిన తర్వాత విజయ్ దేవరకొండ టాలీవుడ్ దర్శకులతో పని చేస్తాడా లేదా అనేది అనుమానమే. అయితే లైగర్ తర్వాత కూడా విజయ్ ప్లానింగ్ సూపర్‌గా ఉంది.

2022 లో సుకుమార్ దర్శకత్వంలో ఓ సినిమా చేయబోతున్నాడు. ఈ విషయంపై ఈ మధ్యే ఓ క్లారిటీ వచ్చింది. సుకుమార్ పుట్టిన రోజు సందర్భంగా విజయ్ దేవరకొండ తమ కాంబినేషన్‌లో సినిమాను అధికారికంగా ప్రకటించాడు. సుకుమార్ తర్వాత మజిలీ, నిన్ను కోరి సినిమాల దర్శకుడు శివ నిర్వాణతో ఫ్యామిలీ ఎంటర్టైనర్ చేయబోతున్నాడు విజయ్ దేవరకొండ. నానితో చేసిన టక్ జగదీశ్ అంచనాలు అందకపోవడంతో శివ కాంబినేషన్‌లో విజయ్ దేవరకొండ సినిమా ఆగిపోయిందని ప్రచారం జరిగింది. అయితే అందులో ఎలాంటి నిజం లేదని.. తమ కాంబినేషన్‌లో సినిమా వస్తుందని క్లారిటీ ఇచ్చాడు శివ నిర్వాణ. మొత్తానికి పూరీ తర్వాత మరో రెండు క్రేజీ ప్రాజెక్ట్స్ సిద్ధం చేసుకున్నాడు రౌడీ హీరో.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి